গ্ৰীণলেণ্ডক লৈ পুনৰ এবাৰ নিজৰ প্ৰতিজ্ঞা দোহাৰিছে ট্ৰাম্পে । শেহতীয়াকৈ ড’নাল্ড ট্ৰাম্পে এআইৰ দ্বাৰা নিৰ্মিত এখন মানচিত্ৰ শ্বেয়াৰ কৰিছে য’ত গ্ৰীণলেণ্ডক আমেৰিকাৰ অংশ হিচাপে দেখুওৱা হৈছে ।

বিশ্বৰ সৰ্ববৃহৎ দ্বীপ তথা ডেনমাৰ্কৰ অৰ্ধ স্বায়ত্তশাসিত ভূখণ্ড গ্ৰীণলেণ্ড বিশ্ব সংঘাতৰ প্ৰধান উৎস হোৱাৰ দিশে আগবাঢ়িছে । আমেৰিকাৰ ৰাষ্ট্ৰপতি ড’নাল্ড ট্ৰাম্পে এআইৰ দ্বাৰা নিৰ্মিত এখন মানচিত্ৰ শ্বেয়াৰ কৰিছে য’ত গ্ৰীণলেণ্ডক আমেৰিকাৰ অংশ হিচাপে দেখুওৱা হৈছে । ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে মানচিত্ৰখনৰ ওপৰত পোনপটীয়াকৈ কোনো মন্তব্য কৰা নাই যদিও তেওঁ যি কৈছে, সেই কথাই ডেনমাৰ্কৰ প্ৰস্তুতিৰ কথা প্ৰকাশ কৰিছে ।

মেট ফ্ৰেডেৰিকচেনে স্পষ্টকৈ কৈছে যে আমি আমাৰ স্বাধীনতা, পৰিচয়, সীমান্ত আৰু গণতন্ত্ৰৰ সৈতে আপোচ কৰিব নোৱাৰো । প্ৰধানমন্ত্ৰী মেট ফ্ৰেডেৰিকচেনে বিশ্বৰ নেতাসকলৰ ওচৰত আবেদন জনাই কয় যে এইটো বিশ্ব ব্যৱস্থাৰ প্ৰশ্ন ।

ডেনমাৰ্কৰ প্ৰধানমন্ত্ৰীয়ে অঞ্চলটোৰ বাবে আটাইতকৈ বেয়া পৰ্যায় আহিব পাৰে বুলি আশংকা প্ৰকাশ কৰে । ট্ৰাম্পৰ নাম নোলোৱাকৈয়ে কয় যে যদি কোনোবাই ইউৰোপৰ সৈতে বাণিজ্য যুদ্ধ আৰম্ভ কৰে তেন্তে আমি নিশ্চিতভাৱে প্ৰত্যুত্তৰ দিম ।

ইয়াৰ পূৰ্বে ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে ২০২৬ চনৰ ১৯-২০ জানুৱাৰীত উল্লেখ কৰিছিল যে ট্ৰাম্পৰ শুল্ক ভাবুকিত ইউৰোপে ভয় নাখায় । ট্ৰাম্পে যদি শুল্ক আৰোপ কৰে তেন্তে ইউৰোপে ইয়াৰ প্ৰতিক্ৰিয়া প্ৰকাশ কৰিব বুলিও কয় তেওঁ । ইউৰোপীয় ইউনিয়ন সম্পূৰ্ণৰূপে একত্ৰিত আৰু শুল্ক ব্যক্তিগত দেশৰ বাবে নহয়, সমগ্ৰ ইউৰোপীয় ইউনিয়নৰ বাবে প্ৰযোজ্য হ’ব বুলি কয় ফ্ৰেডেৰিকচেনে । তেওঁ লগতে কয় যে গ্ৰীণলেণ্ড বিক্ৰীৰ বাবে নহয় ।

ইফালে, আমেৰিকাৰ ৰাষ্ট্ৰপতি ড’নাল্ড ট্ৰাম্পে মঙলবাৰে প্ৰতিজ্ঞা কৰিছিল যে গ্ৰীণলেণ্ডৰ নিয়ন্ত্ৰণ লোৱাৰ লক্ষ্যৰ পৰা কোনো ধৰণে পিছুৱাই যোৱা নাই । তেওঁ আৰ্কটিক দ্বীপটো বলপূৰ্বকভাৱে লোৱাৰ সম্ভাৱনাক নুই কৰা নাছিল আৰু ইউৰোপীয় নেতাসকলে ইয়াৰ প্ৰত্যুত্তৰ জনাবলৈ সংগ্ৰাম কৰাৰ বিষয়টোকো লক্ষ্য কৰি লৈছিল ।

নাটোৰ মহাসচিব মাৰ্ক ৰুটেৰ সৈতে বাৰ্তালাপৰ পিছত ট্ৰাম্পে কয় যে, “মই সকলোকে অতি স্পষ্ট কৰি দিছো যে ৰাষ্ট্ৰীয় আৰু বিশ্ব নিৰাপত্তাৰ বাবে গ্ৰীণলেণ্ড অতি প্ৰয়োজনীয় । এতিয়া পিছলৈ ঘূৰি যোৱাৰ কোনো উপায় নাই, সেই বিষয়ে সকলোৱে একমত ।”

এআই ইমেজত ট্ৰাম্পে নিজৰ উচ্চাকাংক্ষা প্ৰকাশ কৰিছে, য’ত তেওঁ গ্ৰীণলেণ্ডক আমেৰিকাৰ অংশ বুলি অভিহিত কৰিছে । যোৱা বছৰ কেইবামাহো ধৰি বজাৰ আৰু কোম্পানীসমূহক জোকাৰি যোৱা ইউৰোপৰ সৈতে বাণিজ্য যুদ্ধ পুনৰ আৰম্ভ কৰাৰ ভাবুকিও দিছে ট্ৰাম্পে ।

ইফালে ট্ৰাম্পে শান্তিৰ নোবেল বঁটা লাভ নকৰাক লৈয়ো অসন্তুষ্টিও প্ৰকাশ কৰিছে । নৰৱেৰ প্ৰধানমন্ত্ৰীলৈ প্ৰেৰণ কৰা বাৰ্তাত তেওঁ কয় যে তেওঁ এতিয়া “শান্তি”তকৈ আমেৰিকাৰ স্বাৰ্থৰ ওপৰত গুৰুত্ব দিব । ডাভোছ বৈঠকত ইউৰোপীয় দেশসমূহৰ ওপৰত শুল্ক আৰোপ কৰাৰ ভাবুকি দিছিল ট্ৰাম্পে ।

লগতে পঢ়ক : ভাৰত–ইউ এ ই সম্পৰ্কঃ পশ্চিম এছিয়াৰ অস্থিৰতাৰ মাজতে কৌশলগত প্ৰতিৰক্ষা অংশীদাৰিত্ব

শনিবাৰে সংবাদ মাধ্যমৰ আগত আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে আমেৰিকাই এতিয়া গ্ৰীণলেণ্ড দখল কৰিবলৈ সাজু হৈছে । ইয়াৰ পিছতে ৰাষ্ট্ৰপতি ট্ৰাম্পক সকীয়নি ডেনমাৰ্কৰ প্ৰধানমন্ত্ৰীৰ।

ডেনমাৰ্কৰ প্ৰধানমন্ত্ৰী মেটে ফ্ৰেডেৰিকচেনে সোমবাৰে আমেৰিকাৰ ৰাষ্ট্ৰপতি ড’নাল্ড ট্ৰাম্পক তীব্ৰ সকীয়নি দিয়ে । গ্ৰীণলেণ্ডক সংযুক্ত কৰাৰ সন্দৰ্ভত দিয়া ট্ৰাম্পে দিয়া বক্তব্যৰ ওপৰত তীব্ৰ আক্ৰমণ চলাই তেওঁ কয় যে আমেৰিকাই ডেনমাৰ্কক ভেনিজুৱেলা বুলি ভুল কৰা উচিত নহয় । আমাক আক্ৰমণ কৰিলে নাটোৰ সামৰিক মিত্ৰতাৰ অন্ত পৰিব ।

ভেনিজুৱেলাত সংঘটিত সামৰিক অভিযানৰ পিছতে শনিবাৰে সংবাদ মাধ্যমৰ আগত আমেৰিকাৰ ৰাষ্ট্ৰপতি ড’নাল্ড ট্ৰাম্পে কয় যে আমেৰিকাই এতিয়া গ্ৰীণলেণ্ড দখল কৰিবলৈ সাজু হৈছে । তেওঁৰ এই বক্তব্যৰ সোমবাৰে ডেনমাৰ্কৰ প্ৰধানমন্ত্ৰী মেট ফ্ৰেডেৰিকচেনে তীব্ৰ প্ৰতিক্ৰিয়া প্ৰকাশ কৰে আৰু তেওঁ কয় যে আমেৰিকাই গ্ৰীনলেণ্ড দখল কৰিলে নাটোৰ সামৰিক মিত্ৰতাৰ অন্ত পৰিব । কাৰাকাছত মাজনিশা আমেৰিকাৰ সেনাই নেতা নিকোলাছ মাদুৰো আৰু তেওঁৰ পত্নীক বন্দী কৰিবলৈ চলোৱা অভিযানত বিশ্ব স্তম্ভিত হৈ পৰিছিল । আমেৰিকাৰ এই পদক্ষেপে ডেনমাৰ্ক আৰু গ্ৰীণলেণ্ডৰ উদ্বেগ বৃদ্ধি কৰিছে । উল্লেখ্য যে, গ্ৰীণলেণ্ড ডেনমাৰ্কৰ অৰ্ধস্বায়ত্তশাসিত ভূখণ্ড আৰু সেয়েহে ই নাটোৰ অংশ ।

সোমবাৰে এক সাক্ষাৎকাৰত ফ্ৰেডেৰিকচেনে গ্ৰীনলেণ্ড সন্দৰ্ভত আমেৰিকাৰ ৰাষ্ট্ৰপতিৰ বক্তব্যক তীব্ৰ সমালোচনা কৰি বিপৰ্যয়জনক পৰিণতিৰ সতৰ্কবাণী দিয়ে । তেওঁ কয় যে যদি আমেৰিকাই আন এখন নাটো দেশত সামৰিক আক্ৰমণ চলোৱাৰ সিদ্ধান্ত লয় তেন্তে সকলো স্তব্ধ হৈ পৰিব । তাৰ অৰ্থ হ’ল আমাৰ নাটো আৰু এইদৰে দ্বিতীয় বিশ্বযুদ্ধৰ অন্ত পৰাৰ পিছত আমি যি নিৰাপত্তা লাভ কৰি আহিছো সেয়া শেষ হৈ যাব ।

ট্ৰাম্পে ৰাষ্ট্ৰপতিত্বৰ সময়ছোৱাত আৰু দ্বিতীয় কাৰ্যকালৰ প্ৰথম মাহত গ্ৰীনলেণ্ডৰ ওপৰত আমেৰিকাৰ সাৰ্বভৌমত্ব বাৰে বাৰে দৃঢ়তাৰে দাবী কৰিছিল আৰু দ্বীপটোৰ নিয়ন্ত্ৰণ দখল কৰিবলৈ সামৰিক শক্তি ব্যৱহাৰ কৰাৰ কথাও নুই কৰা নাই । দেওবাৰে তেওঁ ২০ দিনৰ পাছত গ্ৰীণলেণ্ডৰ কথা পাতিম বুলি মন্তব্য কৰিছিল । এই মন্তব্যই ভৱিষ্যতে আমেৰিকাই গ্ৰীণলেণ্ডত হস্তক্ষেপ কৰাৰ পৰিকল্পনা কৰা বুলি আশংকা আৰু অধিক তীব্ৰতৰ কৰি তুলিছিল ।

ফ্ৰেডেৰিকচেনে লগতে কয় যে যেতিয়া ট্ৰাম্পে গ্ৰীণলেণ্ড বিচাৰে বুলি কয় তেতিয়া তেওঁক গুৰুত্বসহকাৰে লোৱা উচিত । তেওঁ লগতে কয় যে আমি এনে পৰিস্থিতি মানি নলওঁ য’ত আমি আৰু গ্ৰীণলেণ্ডক এইদৰে ভাবুকি দিয়া হয় ।

লগতে পঢ়ক : ভেনিজুৱেলাৰ পিছত এইবাৰ গ্ৰীণলেণ্ডৰ পাল ! ভাবুকি নিদিবলৈ ট্ৰাম্পক সকীয়নি ডেনমাৰ্কৰ