বৰ্ডাৰ-গাভাস্কাৰ ট্ৰফীত অষ্ট্ৰেলিয়াৰ বিৰুদ্ধে পাঁচখনীয়া খেলৰ টেষ্ট শৃংখলাত ভাৰত ১-৩ ব্যৱধানত পৰাস্ত হয় । ছিডনীত অনুষ্ঠিত শৃংখলাৰ অন্তিমখন টেষ্টত কেংগাৰু দলে ৬ উইকেটত জয়লাভ কৰি শৃংখলা দখল কৰে । ইয়াৰ লগে লগে ১০ বছৰৰ পাছত এই ছিৰিজত পৰাজয়ৰ সন্মুখীন হ’বলগীয়া হ’ল টিম ইণ্ডিয়া । সমগ্ৰ এই শৃংখলাত ভাৰতীয় দলৰ খেলুৱৈৰ বেটিং ব্যৰ্থতা দেখা গ’ল আৰু শীৰ্ষ অৰ্ডাৰে ৰান সংগ্ৰহ কৰাত ব্যৰ্থ হয় । অৱশ্যে মেলবৰ্ণত শতক অৰ্জন কৰি সকলোৰে দৃষ্টি আকৰ্ষণ কৰা নীতিশ ৰেড্ডীৰ ৰূপত ভাৰতীয় দলে নিশ্চিতভাৱে এজন উদীয়মান তাৰকা পালে ।

বেটিঙেৰে প্ৰভাৱ বিস্তাৰ কৰিলে নীতিশে-

এই ছিৰিজত টেষ্টত অভিষেক ঘটা অলৰাউণ্ডাৰ নীতিশ কুমাৰ ৰেড্ডীয়ে পাঁচোখন মেচতে দলৰ মূল একাদশৰ অংশ আছিল । তেওঁ ভাৰতীয় দলটোৰ বেটিং আৰু বলিং দুয়োটা দিশতে এক নতুন আশাৰ সঞ্চাৰ কৰিছে । আটাইতকৈ বিশেষ আছিল মেলবৰ্ণত অনুষ্ঠিত চতুৰ্থখন টেষ্টত খেলা ১১৪ ৰানৰ উজ্জ্বল ইনিংছ, যিয়ে তেওঁক অষ্ট্ৰেলিয়া ভ্ৰমণত স্বীকৃতি প্ৰদান কৰে । তেওঁৰ টেষ্ট কেৰিয়াৰৰ কথা কবলৈ গ’লে , ৰেড্ডীয়ে ৫খন মেচৰ ৯ টা ইনিংছত ২৯৮ ৰান সংগ্ৰহ কৰাৰ লগতে ৫টা উইকেটো দখল কৰে ।

২১ বছৰীয়া ৰেড্ডীৰ এই প্ৰদৰ্শনে হয়তো ভাৰতৰ এজন শক্তিশালী অল-ৰাউণ্ডাৰৰ সন্ধানৰ অন্ত পেলাইছে । এই দীঘলীয়া ফৰ্মেটত হাৰ্দিক পাণ্ডিয়াক এসময়ত এই ভূমিকাৰ বাবে নিখুঁত বুলি গণ্য কৰা হৈছিল যদিও তেওঁৰ ফিটনেছ আৰু তিনিওটা ফৰ্মেটৰ চাপৰ বাবে তেওঁ টেষ্ট দলৰ অংশ নহয় । এনে পৰিস্থিতিত ভাৰতৰ বাবে নিতীশ ৰেড্ডী মিডল অৰ্ডাৰত উন্নত বিকল্প হিচাপে আত্মপ্ৰকাশ কৰিছে, যিয়ে টেষ্টত খেলপথাৰত থকাৰ ক্ষমতাই নহয়, বলিঙৰ ক্ষেত্ৰতো দলৰ বাবে সহায়ক বুলি প্ৰমাণিত হ’ব পাৰে ।

যি সময়ত ভাৰতীয় দলৰ টপ অৰ্ডাৰ বিফল হৈছে, সেই সময়ত মিডল অৰ্ডাৰত নীতিশ ৰেড্ডীৰ এই ইনিংছ স্মৰণীয় হৈ থাকিব । তেওঁৰ শতকৰ বাবেই ভাৰতে মেলবৰ্ণত ফ’ল’ অন এৰাই চলিবলৈ সক্ষম হৈছিল যদিও এই মেচত দলটোৱে পৰাজয়ৰ সন্মুখীন হ’বলগীয়া হয় । ২১ বছৰীয়া ৰেড্ডী অষ্ট্ৰেলিয়াৰ মাটিত শতক অৰ্জন কৰা তৃতীয়জন কনিষ্ঠ ভাৰতীয় । ইয়াৰ উপৰিও পেচ বলাৰ হৰ্ষিত ৰানাও এই শৃংখলাৰ জৰিয়তে ভাৰতীয় দলত অভিষেক ঘটায় যদিও তেওঁ মাত্ৰ দুখন মেচ খেলাৰ সুযোগ লাভ কৰে । এডিলেইড আৰু পাৰ্থত তেওঁ ৪টা উইকেট দখল কৰে ।

টেষ্ট ফৰ্মেটৰ পৰা অৱসৰ লোৱা সন্দৰ্ভত অৱশেষত নিজৰ মৌনতা ভংগ কৰিছে ভাৰতৰ অধিনায়ক ৰোহিত শৰ্মাই । উল্লেখ্য যে ছিডনী টেষ্ট মেচত দলৰ মূল একাদশৰ পৰা বাহিৰত আছে হিটমেন । তেওঁৰ পৰিৱৰ্তে এই টেষ্টত অধিনায়কৰ দায়িত্ব দিয়া হৈছে যশপ্ৰীত বুমৰাহক । ইয়াৰ পিছতেই টেষ্ট ক্ৰিকেটৰ পৰা ৰোহিত শৰ্মাই অৱসৰ গ্ৰহণ কৰিব বুলি জল্পনা-কল্পনাৰ সৃষ্টি হৈছিল । কিন্তু এতিয়া টেষ্ট ফৰ্মেটৰ পৰা অৱসৰ সন্দৰ্ভত ৰোহিতে এটা ডাঙৰ মন্তব্য দিছে ।

ছিডনী টেষ্টত এক সাক্ষাৎকাৰত ৰোহিতে অৱসৰ সন্দৰ্ভত প্ৰতিক্ৰিয়া প্ৰকাশ কৰে আৰু পোনপটীয়াকৈ নিশ্চিত কৰে যে তেওঁ এতিয়াও টেষ্ট ক্ৰিকেটৰ পৰা অৱসৰ লোৱাৰ সিদ্ধান্ত লোৱা নাই । ৰোহিতে নিজৰ বিবৃতিত কয় যে, “এতিয়া ৰান অহা নাই, কিন্তু ৫ মাহৰ পিছতো যে নাহে তাৰ কোনো নিশ্চয়তা নাই । মই কঠোৰ পৰিশ্ৰম কৰিম ।”

ৰোহিতে অৱসৰ সন্দৰ্ভত কয়, “চাওক, মই ফৰ্মত নাই । ছিডনী টেষ্টৰ পৰা আঁতৰি অহাটো মোৰ নিজৰ সিদ্ধান্ত আছিল । কিন্তু মই অৱসৰৰ কথা ভবা নাই । মোৰ বেটে বৰ্তমান কাম কৰা নাই । মই এজন দুটা সন্তানৰ পিতৃ, মই বুদ্ধিমান, মই জানো কি কৰিব লাগে আৰু কেতিয়া কৰিব লাগে । দলৰ আউট অৱ ফৰ্ম বেটছমেনে ইমান গুৰুত্বপূৰ্ণ মেচ খেলাৰ সুযোগ পাব নালাগে, গতিকে মই বাহিৰত বহিবলৈ সিদ্ধান্ত লৈছো ।”

ভাৰতীয় কিংবদন্তি ক্ৰিকেটাৰ ৰোহিতে আৰু কয় যে, “বাহিৰত লেপটপ, কলম আৰু কাগজ লৈ বহি থকা মানুহে অৱসৰ কেতিয়া হ’ব আৰু মই কি সিদ্ধান্ত ল’ব লাগিব সেইটো সিদ্ধান্ত ল’ব নোৱাৰে ।”

উল্লেখ্য যে বিগত কিছুদিনৰ পৰা ৰোহিতে টেষ্টত ভাল প্ৰদৰ্শন আগবঢ়াব পৰা নাই, যাৰ বাবে অৱসৰৰ কথা চৰ্চালৈ আহিছে । ভাৰতত নিউজীলেণ্ডৰ বিৰুদ্ধে খেলা টেষ্ট ছিৰিজতো ৰোহিতে বিশেষ প্ৰদৰ্শন কৰিব পৰা নাছিল । ইয়াৰ বাহিৰেও বৰ্ডাৰ-গাভাস্কাৰ ছিৰিজত ৫ ইনিংছত মাত্ৰ ৩১ ৰানহে কৰিবলৈ সক্ষম হৈছে ৰোহিতে ।

ৰোহিতে এতিয়া টেষ্ট ক্ৰিকেটৰ পৰা আঁতৰি আহিব বুলি কোৱা সকলো জল্পনা-কল্পনাৰ অন্ত পেলাইছে । উল্লেখ্য যে এতিয়া বৰ্ডাৰ-গাভাস্কাৰ ছিৰিজৰ পিছত জুন মাহত ইংলেণ্ডৰ বিৰুদ্ধে টেষ্ট ছিৰিজ খেলিবলৈ গৈ আছে ভাৰতীয় দলটোৱে ।

নতুন বছৰৰ লগে লগে ভাৰতীয় ক্ৰিকেট দলে এতিয়া নিজৰ নতুন অভিযানৰ বাবে প্ৰস্তুতি আৰম্ভ কৰিছে । ৰোহিত শৰ্মাৰ অধিনায়কত্বত ভাৰতীয় দলটোৱে ২০২৫ চন ছিডনী টেষ্টৰ জৰিয়তে আৰম্ভণি কৰিব । এই মেচখন ৩ জানুৱাৰীৰ পৰা অষ্ট্ৰেলিয়াৰ বিৰুদ্ধে অনুষ্ঠিত হ’ব ।

প্ৰকৃততে ভাৰতীয় দলটো বৰ্তমান অষ্ট্ৰেলিয়া ভ্ৰমণত আছে, য’ত বৰ্ডাৰ-গাভাস্কাৰ ট্ৰফীৰ অধীনত দুয়োটা দলৰ মাজত ৫খনীয়া মেচৰ টেষ্ট শৃংখলা অনুষ্ঠিত হৈ আছে । বৰ্তমান আয়োজক দলটোৱে শৃংখলাত ২-১ ব্যৱধানত আগবাঢ়ি আছে । এতিয়া ৩ জানুৱাৰীৰ পৰা ছিডনী ক্ৰিকেট খেলপথাৰত অনুষ্ঠিত হ’ব শেষ আৰু নিৰ্ণায়ক টেষ্ট ।

ছিডনীৰ একমাত্ৰ টেষ্টত ভাৰতে কেতিয়া জয়লাভ কৰিছিল ?

আগন্তুক টেষ্টৰ পূৰ্বে জানি থওক যে এই খেলপথাৰত ভাৰতীয় দলৰ অভিলেখ অতি ভয়ংকৰ । এই খেলপথাৰত এতিয়ালৈকে মাত্ৰ এখন টেষ্ট মেচতহে জয়ী হৈছে ভাৰত, সেইখনো ৪৭ বছৰৰ পূৰ্বে । অৰ্থাৎ এইবাৰ ছিডনীত যদি ৰোহিত ব্ৰিগেডে জয়লাভ কৰে তেন্তে ৪৭ বছৰৰ লজ্জাজনক অভিলেখ ভংগ হ’ব ।

ভাৰতীয় দলটোৱে এই পৰ্যন্ত ছিডনী খেলপথাৰত মুঠ ১৩খন টেষ্ট খেলিছে । ইয়াৰে মাত্ৰ ১খনত জয়ী হোৱাৰ বিপৰীতে ৫খনত পৰাস্ত হৈছে ভাৰত । অৰ্থাৎ ৭ খন টেষ্ট ড্ৰ’ত সমাপ্ত হৈছে । ১৯৭৮ চনৰ জানুৱাৰী মাহত ছিডনীত অনুষ্ঠিত একমাত্ৰ টেষ্ট মেচত টিম ইণ্ডিয়াই জয়লাভ কৰিছিল । এই টেষ্টত বিষেন সিং বেদীৰ অধিনায়কত্বত ভাৰতীয় দলটোৱে কেংগাৰু দলক এক ইনিংছ আৰু ২ ৰাণত পৰাস্ত কৰে । এই সময়ত টেষ্ট ছয় দিন পৰ্যন্ত চলিছিল আৰু মাজত জিৰণিৰ দিন আছিল ।

ছিডনীত ভাৰতীয় টেষ্ট দলৰ অভিলেখ-

মুঠ টেষ্ট : ১৩

জয়ী : ১

পৰাস্ত: ৫

ড্ৰ’: ৭

নৱবৰ্ষৰ টেষ্ট হিচাপে ছিডনীত ১১খন খেল অনুষ্ঠিত হৈছিল-

উল্লেখ্য যে ভাৰতীয় দলটোৱে ছিডনীৰ এই খেলপথাৰত ১৩খন খেলৰ ভিতৰত ১১খন মেচ নৱবৰ্ষৰ টেষ্ট হিচাপে খেলিছে । এখন টেষ্ট ২৬ জানুৱাৰীৰ পৰা আৰু আনখন ১২ ডিচেম্বৰৰ পৰা অনুষ্ঠিত হৈছিল । ভাৰতীয় দলটোৱে ১৯৪৭ চনৰ ১২ ডিচেম্বৰত ছিডনীত প্ৰথম টেষ্ট খেলিছিল । ১৯৬৮ চনৰ ২৬ জানুৱাৰীত দ্বিতীয়খন খেলিছিল । ইয়াৰ পিছত ইয়াত খেলা সকলো মেচ কেৱল নৱবৰ্ষৰ টেষ্ট হৈ আহিছে ।

চলিত শৃংখলাত মাত্ৰ এখন টেষ্ট জিকিছে ভাৰতে-

বৰ্ডাৰ-গাভাস্কাৰ ট্ৰফীৰ অধীনত চলি থকা বৰ্তমান ৫ খনীয়া মেচৰ টেষ্ট শৃংখলাত ভাৰতীয় দলৰ প্ৰদৰ্শন অতি দুৰ্বল । এই পৰ্যন্ত দলটোৱে মাত্ৰ এখন টেষ্টত জয়লাভ কৰিছে । এই জয় শৃংখলাৰ প্ৰথম টেষ্ট অৰ্থাৎ পাৰ্থ টেষ্টত লাভ কৰিছিল । ইয়াৰ পিছত পৰৱৰ্তী ৩ খন মেচৰ ভিতৰত ২ খনত পৰাস্ত হয় । এতিয়া যদি তেওঁলোক ছিডনী টেষ্টতো পৰাস্ত হয়, তেন্তে ছিৰিজত পৰাস্ত হোৱাৰ লগতে আই চি চি বিশ্ব টেষ্ট চেম্পিয়নশ্বিপৰ (ডব্লিউ টি চি) ফাইনেলৰ পৰাও বাহিৰ হ’ব ।

টেষ্ট ছিৰিজত ভাৰত বনাম অষ্ট্ৰেলিয়াৰ অভিলেখ-

মুঠ টেষ্ট ছিৰিজ: ২৮

ভাৰতৰ জয়লাভ: ১১

অষ্ট্ৰেলিয়াৰ জয়লাভ: ১২

ড্ৰ’: ৫

২০২৪ চনৰ শ্ৰেষ্ঠ টেষ্ট দল ঘোষণা কৰা হৈছে । অষ্ট্ৰেলিয়াৰ অধিনায়ক পেট কামিন্স আৰু বিস্ফোৰক বেটছমেন ট্ৰেভিছ হেডে এই দলত স্থান লাভ কৰা নাই । ভাৰতৰ তাৰকা বেগী বলাৰ যশপ্ৰীত বুমৰাহক এই দলৰ অধিনায়ক হিচাপে নিৰ্বাচিত দিয়া হৈছে । এই দলটো ক্ৰিকেট অষ্ট্ৰেলিয়াই বাছনি কৰিছে ।

উল্লেখ্য যে প্ৰতি বছৰৰ শেষত আন্তঃৰাষ্ট্ৰীয় ক্ৰিকেট পৰিষদে প্ৰতিটো ফৰ্মেটৰ শ্ৰেষ্ঠ দল বাছনি কৰে । ইয়াত সমগ্ৰ বিশ্বৰ পৰা উজ্জ্বল প্ৰদৰ্শন কৰা ১১ জন খেলুৱৈক নিৰ্বাচিত কৰা হয় । এতিয়া ঘোষণা কৰা দলটো আই চি চিয়ে বাছনি কৰা নাই যদিও ক্ৰিকেট অষ্ট্ৰেলিয়াৰ শ্ৰেষ্ঠ টেষ্ট একাদশ ।

ক্ৰিকেট অষ্ট্ৰেলিয়াই শ্ৰেষ্ঠ টেষ্ট একাদশত ভাৰতৰ দুজন, শ্ৰীলংকাৰ এজন, ইংলেণ্ডৰ তিনিজন, দক্ষিণ আফ্ৰিকাৰ এজন, নিউজীলেণ্ডৰ দুজন আৰু অষ্ট্ৰেলিয়াৰ দুগৰাকী খেলুৱৈক নিৰ্বাচিত কৰিছে । পাকিস্তানৰ কোনো খেলুৱৈ এই দলৰ অংশ নহয় ।

ক্ৰিকেট অষ্ট্ৰেলিয়া দলত অ’পেনাৰ হিচাপে নিৰ্বাচিত হৈছে ভাৰতৰ যশস্বী জয়ছোৱাল আৰু ইংলেণ্ডৰ বেন ডাকেট । তিনি নম্বৰত আছে ইংলেণ্ডৰ জো ৰুট । ইয়াৰ পাছতে ৰাচিন ৰবিন্দ্ৰ চাৰি নম্বৰত আৰু ইংলেণ্ডৰ হেৰী ব্ৰুক পাঁচ নম্বৰত আছে । ছয় নম্বৰত আছে শ্ৰীলংকাৰ কামিন্দু মেণ্ডিছ । অষ্ট্ৰেলিয়াৰ এলেক্স কেৰী উইকেটৰক্ষক । দ্ৰুত বলিংত আছে নিউজীলেণ্ডৰ মেট হেনৰী, ভাৰতৰ যশপ্ৰীত বুমৰাহ আৰু অষ্ট্ৰেলিয়াৰ জোছ হেজলউড । স্পীনাৰ হৈছে দক্ষিণ আফ্ৰিকাৰ কেশৱ মহাৰাজ ।

তেওঁলোকৰ সকলোৱেই সমগ্ৰ বছৰটো অৰ্থাৎ ২০২৪ চনত টেষ্ট ক্ৰিকেটত উজ্জ্বল প্ৰদৰ্শন আগবঢ়াইছে । অৱশ্যে অষ্ট্ৰেলিয়াৰ বৰ্তমানৰ টেষ্ট অধিনায়ক পেট কামিন্সেও ২০২৪ চনত উজ্জ্বল প্ৰদৰ্শন আগবঢ়াইছিল যদিও এই দলত তেওঁক নিৰ্বাচিত কৰা হোৱা নাই ।

ক্ৰিকেট অষ্ট্ৰেলিয়াৰ ২০২৪ চনৰ শ্ৰেষ্ঠ একাদশ- যশস্বী জয়ছোৱাল, বেন ডাকেট, জো ৰুট, ৰাচিন ৰবিন্দ্ৰ, হেৰী ব্ৰুক, কামিন্দু মেণ্ডিছ, এলেক্স কেৰী (উইকেটকীপাৰ), মেট হেনৰী, যশপ্ৰীত বুমৰাহ (অধিনায়ক), জোছ হেজলউড আৰু কেশৱ মহাৰাজ ।