আই চি চি টেষ্ট ৰেংকিঙত শীৰ্ষ ৫ গৰাকী বলাৰ কোন ?

আই চি চিয়ে প্ৰকাশ কৰিছে টেষ্ট বলাৰৰ শেহতীয়া ৰেংকিং । এই তালিকাত প্ৰথম স্থানত আছে ভাৰতীয় বেগী বলাৰ যশপ্ৰীত বুমৰাহ । আই চি চি টেষ্ট বলাৰৰ শীৰ্ষ ৫ ৰেংকিঙত বুমৰাহ একমাত্ৰ ভাৰতীয় বলাৰ । শীৰ্ষ ৫ৰ তালিকাত আছে অষ্ট্ৰেলিয়াৰ দুজন বলাৰ । একে সময়তে দক্ষিণ আফ্ৰিকা আৰু পাকিস্তান দলৰ এজন বলাৰ এই তালিকাত আছে । এইবাৰ ৰেংকিঙত এটা পৰিৱৰ্তনহে দেখা গৈছে ।

আই চি চি টেষ্ট ৰেংকিং শীৰ্ষ-৫ বলাৰ

যশপ্ৰীত বুমৰাহঃ ভাৰতীয় বলাৰ যশপ্ৰীত বুমৰাহ বিশ্বৰ অন্যতম শ্ৰেষ্ঠ বলাৰ । বৰ্তমান বুমৰাহ ৯০৭ ৰেটিংৰে প্ৰথম স্থানত আছে । শেহতীয়াকৈ ২০২৪-২৫ বৰ্ডাৰ-গাভাস্কাৰ ট্ৰফীত অষ্ট্ৰেলিয়াৰ বিৰুদ্ধে ৫খন মেচত ৩২টা উইকেট দখল কৰিছিল বুমৰাহে । ইয়াৰ পিছত ইংলেণ্ডৰ বিৰুদ্ধে ছিৰিজত প্ৰথমখন টেষ্টত পাঁচ উইকেট দখল কৰে তেওঁ ।

কাগিছ’ ৰাবাডাঃ দক্ষিণ আফ্ৰিকাৰ ফাষ্ট বলাৰ ৰাবাডা এই তালিকাত ৮৫৯ ৰেটিং পইণ্টেৰে দ্বিতীয় স্থানত আছে । শেহতীয়াকৈ অষ্ট্ৰেলিয়াৰ বিৰুদ্ধে ২০২৫ চনৰ বিশ্ব টেষ্ট চেম্পিয়নশ্বিপৰ ফাইনেলত ৰাবাডাই শক্তিশালী বলিং প্ৰদৰ্শন আগবঢ়াইছিল । যাৰ বাবে দক্ষিণ আফ্ৰিকাই এই খিতাপ দখল কৰে । ফাইনেলত ৰাবাডাই ৯টা উইকেট দখল কৰে ।

পেট কামিন্সঃ অষ্ট্ৰেলিয়াৰ অধিনায়ক পেট কামিন্স ৮৪৬ ৰেটিং পইণ্টেৰে ৰেংকিঙৰ তৃতীয় স্থানত আছে । ভাৰতৰ বিৰুদ্ধে বৰ্ডাৰ গাভাস্কাৰ ট্ৰফীত কামিন্সে ২৫টা উইকেট দখল কৰিছিল । বিশ্ব টেষ্ট চেম্পিয়নশ্বিপৰ ফাইনেলতো তেওঁ ভাল বলিং প্ৰদৰ্শন আগবঢ়াইছিল । ফাইনেলত তেওঁ ৭টা উইকেট দখল কৰে ।

জোছ হেজলউডঃ অষ্ট্ৰেলিয়াৰ বেগী বলাৰ হেজলউডে ৱেষ্ট ইণ্ডিজৰ বিৰুদ্ধে চলি থকা টেষ্ট শৃংখলাত ভাল বলিং কৰিছে । প্ৰথমখন মেচত ৫ উইকেটৰ হল লয় তেওঁ । প্ৰথমখন মেচত তেওঁ মুঠ ৭টা উইকেট দখল কৰিছিল, যাৰ বাবে তেওঁ এটা স্থান আগুৱাইছে । এতিয়া তেওঁ ৮১৭ ৰেটিং পইণ্টেৰে চতুৰ্থ স্থানত উপনীত হৈছে ।

নোমান আলীঃ পাকিস্তানী বলাৰ নোমান আলী শীৰ্ষ ৫ তালিকাৰ একমাত্ৰ স্পীন বলাৰ । ৮০৬ ৰেটিং পইণ্টেৰে পঞ্চম স্থানত আছে নোমান । তেওঁ এটা স্থান অৱনমিত হৈছে ।

লগতে পঢ়ক : সীমিত অভাৰৰ শৃংখলাৰ বাবে টীম ইণ্ডিয়াই নকৰে বাংলাদেশ ভ্ৰমণ; চৰকাৰে দিছে নিৰ্দেশ!

একেৰাহে দ্বিতীয় টেষ্টতো শতক অৰ্জন গীলৰ

ইংলেণ্ডৰ বিৰুদ্ধে দ্বিতীয় টেষ্টৰ আৰম্ভণিৰ দিনা ৫টা উইকেট হেৰুৱাই ৩১০ ৰান সংগ্ৰহ কৰিছে ভাৰতে । বুধবাৰৰ খেলৰ শেষলৈকে শুভমন গীল ১১৪ ৰান আৰু ৰবীন্দ্ৰ জাডেজাই ৪১ ৰানেৰে ক্ৰীজত আছে । দুয়োৰে মাজত ৯৯ ৰানৰ অংশীদাৰিত্ব গঢ়িছে । উল্লেখ্য যে ভাৰত আৰু ইংলেণ্ডৰ মাজত চলি থকা পাঁচখনীয়া খেলৰ টেষ্ট শৃংখলাৰ দ্বিতীয়খন মেচ এডগবাষ্টনত অনুষ্ঠিত হৈছে । এই মেচত ইংলেণ্ডে টছত জয়লাভ কৰি ভাৰতক প্ৰথমে বেটিং কৰিবলৈ আমন্ত্ৰণ জনায় ।

দুই ৰান সংগ্ৰহ কৰি আউট কে এল ৰাহুল-

দ্বিতীয় টেষ্টত প্ৰথম ইনিংছৰ আৰম্ভণিতেই জোকাৰণিৰ সন্মুখীন হয় ভাৰত । মাত্ৰ দুই ৰান সংগ্ৰহ কৰি আউট হয় অ’পেনাৰ কে এল ৰাহুল । তেওঁ ক্ৰীছ ৱ’কছৰ বলি হয় । ইয়াৰ পিছত যশস্বী জয়ছোৱালে কৰুণ নায়াৰৰ সমৰ্থন লাভ কৰে । দ্বিতীয় উইকেটত দুয়োৰে মাজত ৮০ ৰানৰ অংশীদাৰিত্ব গঢ়ি উঠে । ব্ৰাইডন কাৰ্ছে এই অংশীদাৰিত্ব ভংগ কৰে । তেওঁ কৰুণ নায়াৰক পেভিলিয়নৰ বাট দেখুৱাই । পাঁচটা চাৰিৰ সহায়ত ৫০টা বলত ৩১ ৰান সংগ্ৰহ কৰি আউট হয় কৰুণ ।

শতক বঞ্চিত জয়ছোৱাল-

ইয়াৰ পিছত যশস্বী জয়ছোৱাল আৰু শুভমন গীলে ভাৰতৰ ইনিংছৰ দায়িত্ব লয় । দুয়োৰে মাজত ৬৬ ৰানৰ অংশীদাৰিত্ব গঢ়ি উঠে । অ’পেনাৰ জয়ছোৱাল ৮৭ ৰান সংগ্ৰহ কৰি আউট হয় । তেওঁ শতক বঞ্চিত হয় । বেন ষ্ট’কছৰ বলত তেওঁ নিজৰ উইকেট বিসৰ্জন দিয়ে । জয়ছোৱালৰ পিছত গীলে পন্টৰ সমৰ্থন লাভ কৰে । চতুর্থ উইকেটৰ বাবে দুয়োজনে কিছু ভাল শ্বট খেলি ৪৭ ৰান সংযোজন কৰে যদিও শ্বোয়াইব বছিৰে পন্টক আউট কৰে । ৪২টা বলত ২৫ ৰান সংগ্ৰহ কৰি আউট হয় পন্ট । একে সময়তে ইংলেণ্ডৰ মাটিত প্ৰথমখন মেচ খেলা নীতিশ কুমাৰ ৰেড্ডীয়ে মাত্ৰ এক ৰানহে কৰিবলৈ সক্ষম হয় । তেওঁক বল্ড কৰে ক্ৰীছ ৱ’কেছে ।

দ্বিতীয় টেষ্টতো শতক অৰ্জন গীলৰ-

লীডছৰ পিছত এডগবাষ্টন টেষ্ট তথা দ্বিতীয় টেষ্টতো শতক অৰ্জন কৰে গীলে । ইংলেণ্ডৰ বিৰুদ্ধে একেৰাহে তিনিখন টেষ্ট মেচত শতক অৰ্জন কৰা পঞ্চমজন ভাৰতীয় হিচাপে পৰিগণিত হৈছে গীল । এই বিষয়ত তেওঁ মহম্মদ আজহাৰুদ্দিন আৰু ৰাহুল দ্ৰাবিড়ৰ দৰে কিংবদন্তিৰ অভলেখ স্পৰ্শ কৰিছে । ভাৰতীয় অধিনায়কগৰাকীয়ে ১৯৯টা বলত টেষ্ট কেৰিয়াৰৰ সপ্তমটো শতক সম্পূৰ্ণ কৰে । তেওঁক ভাল ফৰ্মত দেখা গৈছে ।

ইংলেণ্ডৰ বিৰুদ্ধে অন্তিমখন খেলতো গীলে শতক অৰ্জন কৰিছিল । তাৰ পূৰ্বে ২০২৪ চনত যেতিয়া ইংলেণ্ডৰ দলটোৱে পাঁচখন খেলৰ টেষ্ট শৃংখলাৰ বাবে ভাৰতলৈ আহিছিল, তেতিয়া ধৰ্মশালাত খেলা মেচখনত গীলে ১১০ ৰান সংগ্ৰহ কৰিছিল । এইদৰে গীল ইংলেণ্ডৰ বিৰুদ্ধে একেৰাহে তিনিটা শতক অৰ্জন কৰা পঞ্চমজন ভাৰতীয় হিচাপে পৰিগণিত হয় । অধিনায়ক হিচাপেও গীলে ডাঙৰ কৃতিত্ব অৰ্জন কৰিছে । ইংলেণ্ডৰ বিৰুদ্ধে একেৰাহে দ্বিতীয়টো শতক অৰ্জন কৰা তেওঁ তৃতীয়গৰাকী ভাৰতীয় অধিনায়ক হিচাপে পৰিগণিত হয় । তেওঁৰ পূৰ্বে এই কৃতিত্ব অৰ্জন কৰিছিল বিজয় হাজাৰে আৰু মহম্মদ আজহাৰুদ্দিনে । দুয়োজনে এই কৃতিত্ব ক্ৰমে দিল্লী আৰু ব্ৰাবৰ্ণ (১৯৫১-৫২) আৰু লৰ্ডছ আৰু অল্ড ট্ৰেফৰ্ড (১৯৯০)ত কৰিছিল ।

লগতে পঢ়ক : অলিম্পিক ২০৩৬ৰ বাবে দাবী উত্থাপন ভাৰতৰ; এইখন চহৰত আয়োজন কৰাৰ প্ৰস্তাৱ

WTC পইন্ট টেবুল

ৱেষ্ট ইণ্ডিজৰ বিৰুদ্ধে অষ্ট্ৰেলিয়াৰ জয় আৰু বাংলাদেশৰ বিৰুদ্ধে শ্ৰীলংকাই জয়লাভ কৰাৰ পিছত ২০২৫-২৭ৰ WTC পইন্ট টেবুলত এক বৃহৎ পৰিৱৰ্তন ঘটিছে । বিশ্ব টেষ্ট চেম্পিয়নশ্বিপৰ এই চক্ৰৰ আৰম্ভণি মাথোঁ হৈছেহে যদিও ফাইনেলত প্ৰৱেশৰ বাবে যুঁজ চলি আছে । শনিবাৰে ৱেষ্ট ইণ্ডিজক ১৫৯ ৰানত পৰাস্ত কৰি অষ্ট্ৰেলিয়াই ১২ পইণ্ট লাভ কৰাৰ বিপৰীতে শ্ৰীলংকাই বাংলাদেশক এক ইনিংছ আৰু ৭৮ ৰানত পৰাস্ত কৰি ১২ পইণ্ট লাভ কৰে ।

এই চক্ৰৰ এইখন আছিল অষ্ট্ৰেলিয়াৰ প্ৰথমখন মেচ । এই জয়ৰ বাবে দলটোৱে ১২ পইণ্ট আৰু ১০০ পইণ্ট শতাংশ লাভ কৰে । দলটো WTC পইন্ট টেবুলত শীৰ্ষত উপনীত হৈছে । একে সময়তে ইংলেণ্ডৰ দলটোৱে ১০০ পইণ্ট শতাংশ আৰু ১২ পইণ্টেৰে দ্বিতীয় স্থানত আছে । এই সপ্তাহতে ইংলেণ্ডে ভাৰতক ৫ উইকেটত পৰাস্ত কৰে ।

তালিকাত বাংলাদেশৰো তলত ভাৰত-

আনহাতে দ্বিতীয় টেষ্টত শ্ৰীলংকাই বাংলাদেশক পৰাস্ত কৰে । দুয়ো দলৰ মাজত প্ৰথমখন টেষ্ট ড্ৰ’ হৈছিল । ড্ৰ’ৰ বাবে দুয়োটা দলে চাৰিটাকৈ পইণ্ট লাভ কৰে । এনে পৰিস্থিতিত জয়ৰ পিছত ১২ পইণ্ট লাভ কৰাৰ পিছত শ্ৰীলংকাৰ মুঠ পইণ্ট ১৬ হোৱাৰ বিপৰীতে পইণ্টৰ শতাংশ ৬৬.৬৭ । বাংলাদেশৰ ৪ পইণ্ট আৰু ১৬.৬৭ পইণ্ট শতাংশ । WTC পইন্ট টেবুলৰ চতুৰ্থ স্থানত আছে দলটো । আনহাতে ভাৰতে এই চক্ৰত এখন টেষ্ট খেলি পৰাস্ত হৈছে । গতিকে ভাৰতৰ কোনো পইণ্ট বা পইণ্ট শতাংশ নাই । বৰ্তমান ভাৰতীয় দলটো WTC পইন্ট টেবুলৰ পঞ্চম স্থানত আছে । ৱেষ্ট ইণ্ডিজো এখন টেষ্ট খেলি পৰাস্ত হৈছে। কোনো পইণ্ট আৰু পইণ্ট শতাংশ নোহোৱাকৈ ষষ্ঠ স্থানত আছে দলটো ।

পাকিস্তান আৰু দক্ষিণ আফ্ৰিকাৰ মাজত সংঘৰ্ষ-

নিউজীলেণ্ড, পাকিস্তান আৰু দক্ষিণ আফ্ৰিকাই এই চক্ৰত এতিয়াও নিজ নিজ অভিযান আৰম্ভ কৰা নাই । পাকিস্তান আৰু বিশ্ব টেষ্ট চেম্পিয়ন দক্ষিণ আফ্ৰিকাই অক্টোবৰত দুখনীয়া মেচৰ টেষ্ট শৃংখলাৰ জৰিয়তে ২০২৫-২৭ বৰ্ষৰ ডব্লিউ টি চি চক্ৰ আৰম্ভ কৰিব । একে সময়তে নিউজীলেণ্ডৰ দলটোৱে ৱেষ্ট ইণ্ডিজৰ বিৰুদ্ধে তিনিখনীয়া মেচৰ টেষ্ট শৃংখলাৰ জৰিয়তে বিশ্ব টেষ্ট চেম্পিয়নশ্বিপ ২০২৫-২৭ চক্ৰ আৰম্ভ কৰিব । এই শৃংখলা নৱেম্বৰ-ডিচেম্বৰ মাহত অনুষ্ঠিত হ’ব ।

কোনটো দলে বেছিকৈ টেষ্ট খেলিব ?

বিশ্ব টেষ্ট চেম্পিয়নশ্বিপ ২০২৫-২৭ চক্ৰত সৰ্বাধিক ২২খন টেষ্ট মেচ খেলিব অষ্ট্ৰেলিয়াই । একে সময়তে ইংলেণ্ড দলে ২১খন টেষ্ট খেলিব । ইয়াৰ পাছতে ১৮খন মেচেৰে তৃতীয় স্থানত আছে ভাৰত । নিউজীলেণ্ডে ১৬খন আৰু দক্ষিণ আফ্ৰিকা-ৱেষ্ট ইণ্ডিজে ১৪-১৪ খনকৈ টেষ্ট খেলিব লাগিব । পাকিস্তান দলে ১৩খন আৰু শ্ৰীলংকা-বাংলাদেশে ১২-১২ টেষ্ট খেলিব লাগিব । ২০২৫-২৭ চক্ৰত প্ৰতিদ্বন্দ্বিতা কৰা ৯খন দেশৰ মাজত অনুষ্ঠিত হ’বলগীয়া ২৭খন টেষ্ট শৃংখলাৰ ভিতৰত ১৭টা শৃংখলাত মাত্ৰ দুখন মেচহে অনুষ্ঠিত হ’ব, আনহাতে তিনিখন মেচৰ ৬টা ছিৰিজ অনুষ্ঠিত হ’ব ।

ইংলেণ্ডৰ পিছত কাৰ মুখামুখি হ’ব ভাৰত ?

২০ জুনৰ পৰা ভাৰত আৰু ইংলেণ্ডৰ মাজত পাঁচখনীয়া খেলৰ টেষ্ট শৃংখলা আৰম্ভ হৈছে । এই শৃংখলাৰ অন্তিমখন খেল ৩১ জুলাইৰ পৰা অনুষ্ঠিত হ’ব । ইয়াৰ পিছত ঘৰুৱা ক্ষেত্ৰত ৱেষ্ট ইণ্ডিজৰ বিৰুদ্ধে দুখনীয়া মেচৰ শৃংখলা খেলিব টিম ইণ্ডিয়াই । ২ অক্টোবৰৰ পৰা ভাৰত আৰু ৱেষ্ট ইণ্ডিজৰ মাজত প্ৰথমখন টেষ্ট আৰু ১০ অক্টোবৰৰ পৰা দ্বিতীয়খন টেষ্ট অনুষ্ঠিত হ’ব । তাৰ পিছত ভাৰতীয় দলে ঘৰুৱা ক্ষেত্ৰত দক্ষিণ আফ্ৰিকাৰ বিৰুদ্ধে খেলিব । ইয়াৰ প্ৰথমখন মেচ ১৪ নৱেম্বৰৰ পৰা আৰু দ্বিতীয়খন মেচ ২২ নৱেম্বৰৰ পৰা অনুষ্ঠিত হ’ব ।

লগতে পঢ়ক : গল্ডেন বয় নীৰজ চোপ্ৰাৰ আন এক অভিলেখ; অষ্ট্ৰাভা গোল্ডেন স্পাইকত স্বৰ্ণ পদক অৰ্জন

প্ৰথম টেষ্টত ৫ উইকেটত পৰাস্ত  ভাৰত

লীডছৰ হেডিংলি ক্ৰিকেট খেলপথাৰত ভাৰত আৰু ইংলেণ্ডৰ মাজত অনুষ্ঠিত হোৱা প্ৰথম টেষ্ট মেচত ইংলেণ্ডে টিম ইণ্ডিয়াক ৫ উইকেটত পৰাস্ত কৰে । বেন ডাকেট আৰু ক্ৰ’লিৰ প্ৰশংসনীয় ইনিংছৰ ভিত্তিত ইংলেণ্ডে ভাৰতৰ ৩৭১ ৰানৰ লক্ষ্যত সহজেই উপনীত হয় । বুমৰাহ, চিৰাজ আৰু জাডেজাৰ দৰে প্ৰবীণ খেলুৱৈৰে গঠিত ভাৰতীয় বলিং আক্ৰমণে সমগ্ৰ খেলখন উইকেটৰ বাবে হাহাকাৰ কৰি থাকিল । লগে লগে আয়োজক দলটোৱে এতিয়া ৫খনীয়া মেচৰ শৃংখলাত ১-০ ব্যৱধানত আগবাঢ়ি আছে ।

ভাৰতীয় দলে ইংলেণ্ডৰ সন্মুখত ৩৭১ ৰানৰ বিজয় লক্ষ্য নিৰ্ধাৰণ কৰিছিল । মেচখনত ভাৰতৰ প্ৰথম ইনিংছ ৪৭১ ৰানত সীমাবদ্ধ আছিল আৰু ইংলেণ্ডৰ প্ৰথম ইনিংছ ৪৬৫ ৰানত সীমাবদ্ধ আছিল । অৰ্থাৎ প্ৰথম ইনিংছৰ ভিত্তিত ভাৰতীয় দলটোৱে ৬ ৰানৰ অগ্ৰগতি লাভ কৰিছিল । তাৰ পিছত ভাৰতে দ্বিতীয় ইনিংছত ৩৬৪ ৰান সংগ্ৰহ কৰে আৰু ইংলেণ্ডক ৩৭১ ৰানৰ লক্ষ্য বান্ধি দিছিল । দ্বিতীয় ইনিংছত ইংলেণ্ডৰ হৈ ডাকেটে ১৪৯ ৰান আৰু ক্ৰলিৰ বেটৰ পৰা ৬৫ ৰান আহে । একে সময়তে ৰুটে অপৰাজিত অৰ্ধ শতক অৰ্জন কৰে আৰু দলটোৱে ভাৰতৰ বিৰুদ্ধে জয়লাভ কৰে ।

উইকেটৰ পতনঃ ১৮৮-১ (জেক ক্ৰ’লি, ৪২.২), ২০৬-২ (অলি পোপ, ৪৪.৪), ২৫৩-৩ (বেন ডাকেট, ৫৪.৩), ২৫৩-৪ (হেৰী ব্ৰুক, ৫৪.৪), ৩০২-৫ (বেন ষ্ট’কছ, ৬৭.৩) ।

ভাৰতৰ দ্বিতীয় ইনিংছঃ পন্ট-ৰাহুলৰ শতক

প্ৰথম টেষ্টত ভাৰতীয় দলৰ দ্বিতীয় ইনিংছত ঋষভ পন্টে শতক অৰ্জন কৰে । ঋষভে ১৫টা চাৰি আৰু তিনিটা ছয়ৰ সহায়ত ১৪০টা বলত ১১৮ ৰান সংগ্ৰহ কৰে । অ’পেনাৰ কে এল ৰাহুলেও স্মৰণীয় শতকীয় ইনিংছ খেলে । ৰাহুলে ২৪৭টা বলত ১৩৭ ৰান সংগ্ৰহ কৰে, য’ত ১৮টা চাৰি আছিল । অৱশ্যে এই দুগৰাকী বেটছমেন আউট হোৱাৰ পাছত ভাৰতে ৩১ ৰানত শেষৰ ৫টা উইকেট হেৰুৱাই । ইংৰাজ বেগী বলাৰ ব্ৰাইডন কাৰ্ছ আৰু জোছ টংগুৱে তিনিটাকৈ উইকেট দখল কৰে ।

উইকেট পতনঃ ১৬-১ (যশস্বী জয়ছোৱাল, ৩.১ অভাৰ), ৮২-২ (ছাই সুদৰ্শন, ২০.৫ অভাৰ), ৯২-৩ (শুভমন গীল, ২৪.৬ অভাৰ), ২৮৭-৪ (ঋষভ পন্ট, ৭১.৪ অভাৰ), ৩৩৩-৫ (কে এল ৰাহুল, ৮৪.২ অভাৰ), ৩৩৫-৬ (কৰুণ নায়াৰ, ৮৫.৬ অভাৰ), ৩৪৯-৭ (শ্বাৰদুল ঠাকুৰ, ৯০.১ অভাৰ), ৩৪৯-৮ (মহম্মদ ছিৰাজ, ৯০.২ অভাৰ), ৩৪৯-৯ (যশপ্ৰীত বুমৰাহ, ৯০.৪ অভাৰ), ৩৬৪-১০ (প্ৰসিধ কৃষ্ণ, ৯৫.৬ অভাৰ) ।

উল্লেখ্য যে, প্ৰথম টেষ্টত ভাৰতে দুয়োটা ইনিংছত পাঁচটাকৈ শতক অৰ্জন কৰিছিল যদিও শোচনীয় বলিং আৰু ফিল্ডিঙৰ বাবে পৰাজয় স্বীকাৰ কৰে ।

লগতে পঢ়ক : ঋষভ পণ্টৰ বিৰুদ্ধে আই চি চিয়ে ল’লে এই ব্যৱস্থা; লীডছত আম্পায়াৰক কৰিছিল বেয়া ব্যৱহাৰ !

৩ উইকেটত ২০৯ ৰান সংগ্ৰহ ইংলেণ্ডৰ

লীডছৰ হেডিংলি ক্ৰিকেট গ্ৰাউণ্ডত ভাৰত আৰু ইংলেণ্ডৰ মাজৰ টেষ্ট শৃংখলাৰ প্ৰথমখন মেচ ২০ জুনৰ পৰা অনুষ্ঠিত হৈছে । শনিবাৰে এই মেচৰ দ্বিতীয় দিনা টিম ইণ্ডিয়াৰ প্ৰথম ইনিংছ ৪৭১ ৰানত অন্ত পৰে । ইয়াৰ প্ৰত্যুত্তৰত দ্বিতীয় দিনৰ শেষত ইংলেণ্ডে ৩টা উইকেট হেৰুৱাই ২০৯ ৰান সংগ্ৰহ কৰিছে । বুমৰাহে তিনিওটা সফলতা লাভ কৰিছে । বৰ্তমান ভাৰত ২৬২ ৰানত আগবাঢ়ি আছে । শতক অৰ্জন কৰাৰ পিছত খেলি আছে অলি পোপে । একে সময়তে প্ৰথম ইনিংছত ভাৰতৰ শুভমন গীল, যশস্বী জয়ছোৱাল আৰু পণ্টে শতক অৰ্জন কৰাৰ লগতে ইংলেণ্ডৰ ষ্ট’কছ আৰু টংগুৱে ৪-৪ উইকেট দখল কৰে ।

ভাৰতীয় দলটোৱে প্ৰথম ইনিংছত ৪৭১ ৰান সংগ্ৰহ কৰে । এই ইনিংছৰ বিশেষ কথাটো হ’ল অধিনায়ক শুভমন গীল আৰু পণ্টৰ মাজত দুশৰো অধিক ৰানৰ অংশীদাৰিত্ব আছিল ।

ইংলেণ্ডৰ বেটিং-

ভাৰতৰ ৪৭১ ৰানৰ উত্তৰত বেন ষ্টোকছ আৰম্ভণি বিশেষ ভাল নাছিল । প্ৰথম অভাৰতে ৪ ৰানৰ স্ক’ৰত বুমৰাহে ক্ৰ’লীক আউট কৰে । ইয়াৰ পিছত ডাকেট আৰু পোপৰ মাজত এক ভাল অংশীদাৰিত্ব গঢ় লৈ উঠিছিল । দুয়োজনে ১২২ ৰান সংযোজন কৰে । কিন্তু দলটোৱে ১২৬ ৰানৰ স্ক’ৰত আন এটা আঘাত পায় যেতিয়া বুমৰাহে ডাকেটক আউট কৰে । ডাকেটে ৬২ ৰান কৰে । কিন্তু পোপ এটা মূৰত থিয় হৈ আছিল । ৰুটৰ সৈতে তেওঁৰ ভাল অংশীদাৰিত্ব আছিল । পোপে শতক অৰ্জন কৰে । কিন্তু দিনটোৰ খেল শেষ হোৱাৰ পূৰ্বেই বুমৰাহে ইংলেণ্ডক আৰু এটা আঘাত দি ৰুটক আউট কৰে । ৰুটে ২৮ ৰান সংগ্ৰহ কৰে । ভাৰত এতিয়াও ২৬২ ৰানত আগবাঢ়ি আছে ।

লগতে পঢ়ক : প্ৰথম ইনিংছত ৪৭১ ৰানত অল আউট ভাৰতীয় দল; যশস্বী, গীল আৰু ঋষভৰ দৰ্শনীয় শতক