আই চি চিৰ শেহতীয়া ৰেংকিঙত ৱাশ্বিংটন-জাডেজাৰ অগ্ৰগতি

ভাৰত বনাম ইংলেণ্ডৰ পঞ্চম টেষ্টৰ পূর্বে ৩০ জুলাই বুধবাৰে আই চি চিয়ে শেহতীয়া ৰেংকিং প্রকাশ কৰিছে ৷ মানচেষ্টাৰত শতক অৰ্জন কৰা ৰবীন্দ্ৰ জাডেজা আৰু ৱাশ্বিংটন সুন্দৰ এই ৰেংকিঙত লাভৱান হোৱাৰ বিপৰীতে যশস্বী জয়ছৱাল ৩টা স্থান অৱনমিত হৈছে । ভাৰতীয় খেলুৱৈ হিচাপে এতিয়া আই চি চিৰ পুৰুষৰ টেষ্ট বেটছমেন ৰেংকিঙত শীৰ্ষস্থান দখল কৰিছে ঋষভ পন্টে, তেওঁ তালিকাৰ ৭ নম্বৰত আছে । অধিনায়ক শুভমন গীল ৯ম স্থানত আছে ।

তিনিটা স্থান অৱনমিত হ’ল জয়ছোৱাল-
যশস্বী জয়ছোৱাল পূৰ্বে পঞ্চম স্থানত আছিল, এতিয়া টেষ্ট বেটছমেন ৰেংকিঙত ৮ম স্থানলৈ অৱনমিত হৈছে তেওঁ । তেওঁৰ ৰেটিং পইণ্ট ৭৬৯ । ৭৭৬ পইণ্টেৰে ৭ নম্বৰ স্থানত আছে ঋষভ পন্ট । ইংৰাজ বেটছমেন জো ৰুটে নিজৰ প্ৰথম স্থান অক্ষুণ্ণ ৰাখিছে, তেওঁৰ ৰেটিং পইণ্ট আছে ৯০৪ ।

আই চি চিৰ ৰেংকিঙত ৰবীন্দ্ৰ জাডেজা আৰু ৱাশ্বিংটন সুন্দৰৰ অগ্ৰগতি-
আই চি চিৰ পুৰুষৰ বলিং ৰেংকিঙত ৰবীন্দ্ৰ জাডেজাই এটা স্থান অগ্ৰগতি লাভ কৰিছে, পূৰ্বে তেওঁ ১৫ নম্বৰ স্থানত আছিল আৰু এতিয়া ৬৮২ ৰেটিং পইণ্টেৰে ১৪ নম্বৰ স্থানলৈ আহিছে । ৮৯৮ পইণ্টেৰে শীৰ্ষ স্থানত আছে যশপ্ৰীত বুমৰাহ ।

পুৰুষৰ টেষ্ট অল ৰাউণ্ডাৰ ৰেংকিঙত ডাঙৰ জাঁপ মাৰিছে ৱাশ্বিংটন সুন্দৰে, তেওঁ ৮ টা স্থান আগবাঢ়িছে । মেট হেনৰীৰ সৈতে যৌথভাৱে ১৩ নম্বৰত আছে । মানচেষ্টাৰত খেলা চতুৰ্থ টেষ্টত তেওঁ প্ৰথমটো আন্তঃৰাষ্ট্ৰীয় শতক অৰ্জন কৰে ।

চতুৰ্থ টেষ্টৰ দ্বিতীয় ইনিংছত ১০৭ ৰানৰ অপৰাজিত ইনিংছ খেলিছিল ৰবীন্দ্ৰ জাডেজাই । ৱাশ্বিংটন সুন্দৰে ১০১ ৰান সংগ্ৰহ কৰে, এইটো আছিল তেওঁৰ প্ৰথম আন্তঃৰাষ্ট্ৰীয় শতক । ইয়াৰ পূৰ্বে শুভমন গীলেও এটা শতক (১০৩) অৰ্জন কৰিছিল, যাৰ সহায়ত ভাৰতীয় দলটোৱে চতুৰ্থখন টেষ্ট ড্ৰ’ত সমাপ্ত কৰাত সফল হয় ।

তিনিটা স্থান আগুৱালে বেন ষ্টোকছে-
ইংলেণ্ড ক্ৰিকেট দলৰ অধিনায়ক বেন ষ্টোকছে চতুৰ্থ টেষ্টত ৫টা উইকেট দখল কৰাৰ লগতে শতকো অৰ্জন কৰে, তেওঁ এনে কৰা বিশ্বৰ পঞ্চমজন অধিনায়ক হিচাপে পৰিগণিত হয় । শেহতীয়া ৰেংকিঙত তেওঁ ৩টা স্থান আগুৱাইছে, এতিয়া তেওঁ ৩০১ ৰেটিং পইণ্টেৰে তৃতীয় স্থানলৈ আহিছে ।

লগতে পঢ়ক : এদিনীয়া ক্ৰিকেটত দ্ৰুততম শতক অৰ্জন কৰা শীৰ্ষ ৫ জন বেটছমেন কোন ?

পঞ্চম টেষ্টৰ পৰা বাহিৰ ঋষভ পন্ট

ভাৰতীয় টেষ্ট দলৰ উপ-অধিনায়ক ঋষভ পণ্টক পঞ্চম টেষ্ট খেলৰ পৰা বাদ দিয়া হৈছে । পন্টৰ ঠাইত নাৰায়ণ জগদীশনক ভাৰতীয় দলত অন্তৰ্ভুক্ত কৰা হৈছে । মানচেষ্টাৰ টেষ্টৰ সময়ত ঋষভ পন্টে ভৰিৰ আঙুলিত আঘাত পোৱাৰ বাবে মেচৰ মাজভাগতে ক্ৰীজ এৰিব লগা হৈছিল । এতিয়া ভাৰত আৰু ইংলেণ্ডৰ মাজত শৃংখলাৰ অন্তিমখন টেষ্ট বাকী আছে, যাৰ বাবে নাৰায়ণ জগদীশনক দলত অন্তৰ্ভুক্ত কৰা হৈছে ।

নাৰায়ণ জগদীশন কোন ?

ভাৰত-ইংলেণ্ডৰ শৃংখলাত ঋষভ পন্টৰ সলনি নাৰায়ণ জগদীশনক দলত লোৱা হৈছে । জগদীশনে ৫২ খন প্ৰথম শ্ৰেণীৰ মেচ খেলিছে, য’ত এই খেলুৱৈগৰাকীয়ে গড়ে ৪৭.৫০ ৰান কৰি ৩,৩৭৩ ৰান সংগ্ৰহ কৰিছে । প্ৰথম শ্ৰেণীৰ ক্ৰিকেটতো ১০টা শতক আৰু ১৪টা অৰ্ধশতক অৰ্জন কৰিছে নাৰায়ণে । ঋষভ পন্ট শেষ টেষ্ট মেচৰ পৰা বাহিৰ হোৱাৰ পিছত এই খেলুৱৈজনে পঞ্চম টেষ্টৰ মূল একাদশত সুযোগ পাব পাৰে ।

ভাৰতৰ হাতত মূল একাদশৰ বিকল্প-

ঋষভ পন্টৰ আঘাতে ভাৰতৰ মূল একাদশত প্ৰভাৱ পেলাব । পণ্ট আঘাতপ্ৰাপ্ত হৈ অৱসৰ লোৱাৰ পিছত চতুৰ্থ টেষ্টত উইকেট ৰক্ষকৰ বাবে স্থান লাভ কৰে ধ্ৰুৱ জুৰেলে । কিন্তু জুৰেলক বেটিং কৰিবলৈ দিয়া নহ’ল । আই চি চিৰ নতুন নিয়ম অনুসৰি বেটছমেনে মূৰত আঘাত পালেহে বেটছমেনক সলনি কৰিব পাৰিব । পণ্ট ভৰিৰ আঙুলিত আঘাতপ্ৰাপ্ত হৈছিল, গতিকে জুৰেলে বেটিং কৰাৰ সুযোগ পোৱা নাছিল ।

পন্টৰ আঘাতৰ পিছত ধ্ৰুৱ জুৰেল ভাৰতৰ মূল একাদশত অন্তৰ্ভুক্ত হ’ব পাৰে । টিম ইণ্ডিয়াৰ বিকল্প হিচাপে আছে নাৰায়ণ জগদীশনো । যদি জগদীশনে সুযোগ পায়, তেন্তে ইংলেণ্ডৰ বিৰুদ্ধে পঞ্চমখন টেষ্টত ভাৰতৰ জাতীয় টেষ্ট দলৰ হৈ অভিষেক ঘটাব পাৰে তেওঁ ।

লগতে পঢ়ক : ইউ এ ইত অনুষ্ঠিত হ’ব এছিয়া কাপ ২০২৫; ১৪ ছেপ্টেম্বৰত হ’ব ভাৰত-পাকিস্তানৰ মহাৰণ

মানচেষ্টাৰ ইউনাইটেডৰ ফুটবল খেলুৱৈক সাক্ষাৎ গীল বাহিনীৰ

বৰ্তমান ইংলেণ্ড ভ্ৰমণত থকা ভাৰতীয় দলটোৱে পাঁচখন মেচৰ টেষ্ট শৃংখলা খেলি আছে । দেওবাৰে শুভমন গীলৰ নেতৃত্বত গঠিত দলটোৱে বিশ্ববিখ্যাত ফুটবল ক্লাব মানচেষ্টাৰ ইউনাইটেডৰ খেলুৱৈসকলক সাক্ষাৎ কৰে । এই সময়ত দুয়োটা দলৰ খেলুৱৈয়ে জাৰ্চি বিনিময় কৰে আৰু অভ্যাসৰ সময়ত মত বিনিময় কৰে ।

ভাৰতীয় ক্ৰিকেট নিয়ন্ত্ৰণ ব’ৰ্ডে ‘ইউনাইটেড ইন মানচেষ্টাৰ’ কেপচন দি এই সাক্ষাতৰ কেইবাখনো ফটো শ্বেয়াৰ কৰে য’ত শুভমন গীল আৰু ঋষভ পণ্টৰ দৰে খেলুৱৈয়ে তেওঁলোকৰ সৈতে কেৰিংটনৰ ক্লাবৰ প্ৰশিক্ষণ খেলপথাৰত ফুটবল খেলি থকা দেখা যায় । এডিডাছে শ্বেয়াৰ কৰা এখন ফটোত ভাৰতীয় বেগী বলাৰ মহম্মদ ছিৰাজে তাৰকা ডিফেণ্ডাৰ হেৰী মেগুৱেৰৰ সৈতে বলিং কৰা দেখা গৈছে ।

২৩ জুলাইৰ পৰা ইংলেণ্ডৰ বিৰুদ্ধে চতুৰ্থখন টেষ্ট খেলিবলৈ মানচেষ্টাৰত আছে ভাৰতীয় ক্ৰিকেট দলটো । লিডছ আৰু লণ্ডনত জয়লাভ কৰি পাঁচখন মেচৰ শৃংখলাত ১-২ ব্যৱধানত আগবাঢ়ি আছে ইংলেণ্ড । মানচেষ্টাৰ ইউনাইটেডৰ মুখ্য প্ৰশিক্ষক ৰুবেন আমোৰিম আৰু ভাৰতীয় ক্ৰিকেট দলৰ মুখ্য প্ৰশিক্ষক তথা এই বিখ্যাত ক্লাবৰ অনুৰাগী গৌতম গম্ভীৰৰ একেলগে থকা ফটোও ভাইৰেল হৈছে ।

এই সময়ছোৱাত গীলে ব্ৰুনো ফাৰ্নাণ্ডেছৰ সৈতে, আমাদ ডায়েলোৰ সৈতে চিৰাজে আৰু মেছন মাউণ্ট আৰু হেৰী মেগুৱেৰৰ সৈতে যশপ্ৰীত বুমৰাহৰ সৈতে মত বিনিময় কৰে । দুয়োটা দল আৰু তেওঁলোকৰ সহায়ক কৰ্মচাৰীৰ যৌথ ফটোও প্ৰকাশ পাইছে । মানচেষ্টাৰ ইউনাইটেডৰ জ্যেষ্ঠ বিষয়া আৰু ক্লাবৰ কিংবদন্তিসকলে উষ্ম আদৰণি জনোৱাৰ পিছত দুয়োটা দলৰ মাজত প্ৰতীকীভাৱে জাৰ্চি বিনিময় কৰা হয় । এই সময়ত লঘু ফুটবল আৰু ক্ৰিকেট অনুশীলনৰ উপৰিও খেলুৱৈ আৰু প্ৰশিক্ষকসকলৰ মাজত মত বিনিময় হয় ।

লগতে পঢ়ক : চতুৰ্থ টেষ্টৰ পূৰ্বে টীম ইণ্ডিয়াত মোক্ষম আঘাত; একেলগে বাহিৰ হ’ল দুজনকৈ খেলুৱৈ

লৰ্ডছত প্ৰকৃত পৰীক্ষাত অৱতীৰ্ণ হ’ব ভাৰত

ভাৰত আৰু ইংলেণ্ডৰ মাজত অনুষ্ঠিত হ’বলগীয়া এণ্ডাৰছন-টেণ্ডুলকাৰ ট্ৰফী শৃংখলাৰ তৃতীয়খন টেষ্ট লৰ্ডছত অনুষ্ঠিত হ’ব । ভাৰতে এই খেলপথাৰত এতিয়ালৈকে ১৯খন খেল খেলিছে যদিও ইয়াত দলটোৰ অভিলেখ উন্নত নহয় । অৱশ্যে টিম ইণ্ডিয়াৰ বাবে ভাল কথাটো হ’ল শুভমন গীলৰ নেতৃত্বত ভাৰতে এডবাষ্টনত ইংলেণ্ডক ৩৩৬ ৰানত পৰাস্ত কৰে । এডবাষ্টন এনে এখন খেলপথাৰ য’ত ভাৰতে পূৰ্বে কেতিয়াও জয়ী হোৱা নাছিল । এই জয়ে শুভমন ব্ৰিগেডৰ মনোবল বৃদ্ধি কৰিছে আৰু ইংলেণ্ডক পৰাস্ত কৰি লৰ্ডছত নিজৰ অভিলেখ উন্নত কৰাৰ বাবে টিম ইণ্ডিয়াই চকু ৰাখিব ।

লৰ্ডছৰ অভিলেখ-

১৯৩২ চনৰ পৰা লৰ্ডছত ১৯খন খেল খেলিছে ভাৰতে । এই সময়ছোৱাত ৩খন খেলত জয়ী হোৱাৰ বিপৰীতে দলটোৱে ১২খন খেলত পৰাস্ত হৈছে । আনহাতে ৪খন মেচ ড্ৰ’ হৈছে । ভাৰতৰ জয়-পৰাজয়ৰ অভিলেখ ০.২৫ । ১৯৩২ চনত ভাৰতে প্ৰথমে ইয়াত এখন মেচ খেলিছিল, য’ত ১৫৮ ৰানত পৰাজয়ৰ সন্মুখীন হ’বলগীয়া হৈছিল । এই খেলপথাৰত ভাৰতে প্ৰথমটো জয় লাভ কৰিছিল ১৯৮৬ চনত, চেতন শৰ্মা, কপিল দেৱৰ শক্তিশালী বলিং আৰু প্ৰথম ইনিংছত দিলীপ ভেংচৰকাৰৰ শতকৰ সহায়ত ভাৰতে জয়লাভ কৰিছিল ।

বুমৰাহৰ প্ৰত্যাৱৰ্তন-

এডবাষ্টন টেষ্টত জয়লাভ কৰাৰ পিছত অধিনায়ক শভমন গীলে স্পষ্টভাৱে কয় যে বুমৰাহক লৰ্ডছত খেলা দেখা যাব । যদি বুমৰাহ মূল একাদশলৈ প্ৰত্যাৱৰ্তন কৰে  তেন্তে প্ৰশ্ন হয় কোন বাহিৰ হ’ব । ছিৰিজৰ দুয়োখন মেচতে প্ৰসিদ্ধ কৃষ্ণই ৬তকৈ অধিক ইকনমিৰে ৰান দিয়াৰ বিপৰীতে বুমৰাহক জিৰণি দিয়াৰ বাবে দলত অন্তৰ্ভুক্ত হোৱা আকাশ দীপে দ্বিতীয়খন মেচত ১০টা উইকেট দখল কৰি ইতিহাসৰ সৃষ্টি কৰিছে । এনে পৰিস্থিতিত মূল একাদশৰ পৰা কাক বাদ দিয়া হয় সেয়া আকৰ্ষণীয় হ’ব ।

লগতে পঢ়ক : জয়ৰ পিছত কিয় খং উঠিল শুভমান গিলৰ? খেলপথাৰক লৈ অসন্তুষ্টি প্ৰকাশ

WTC পইণ্ট টেবুলত ভাৰতৰ আধিপত্য

বাৰ্মিংহামৰ এডবাষ্টন খেলপথাৰত অনুষ্ঠিত দ্বিতীয়খন টেষ্ট মেচত ইংলেণ্ডৰ বিৰুদ্ধে বৃহৎ জয়েৰে অভিলেখ সৃষ্টি কৰে ভাৰতীয় টেষ্ট দলে । এই জয়ৰ জৰিয়তে ভাৰতে পাঁচখন খেলৰ টেষ্ট শৃংখলাত ১-১ ব্যৱধানত সমতা স্থাপন কৰে । এই জয়ো বিশেষ আছিল কাৰণ শুভমন গীলৰ অধিনায়কত্বত ভাৰতৰ প্ৰথম টেষ্ট জয় । লগতে ভাৰতেও বিশ্ব টেষ্ট চেম্পিয়নশ্বিপ (WTC) ২০২৫-২৭ চক্ৰত প্ৰথম পইণ্ট লাভ কৰে ।

যেতিয়া শুভমন গীলক টিম ইণ্ডিয়াৰ টেষ্ট দলৰ অধিনায়কৰ দায়িত্ব দিয়া হৈছিল তেতিয়া বহু প্ৰশ্ন উত্থাপন হৈছিল যে তেওঁ ইমান ডাঙৰ দায়িত্ব চম্ভালিব পাৰিবনে ? প্ৰথম টেষ্টত পৰাজয়ৰ পিছত হেঁচা আৰু বাঢ়িছিল যদিও দ্বিতীয়খন মেচত গীলে কেৱল বিস্ফোৰক প্ৰদৰ্শনেই নহয় অধিনায়কত্বৰ ক্ষেত্ৰতো পৰিপক্কতা দেখুৱাইছিল । দুয়োটা ইনিংছতে ক্ৰমে ২৬৯ আৰু ১৬১ ৰান সংগ্ৰহ কৰি তেওঁ যে কেৱল এজন যুৱ বেটছমেন নহয়, তেওঁ এজন সক্ষম নেতা বুলিও নিজকে প্ৰমাণ কৰিলে ।

মেচৰ পিছত গীলে কয় যে, “বিগত পৰাজয়ৰ পৰা আমি বহু কথা শিকিলোঁ আৰু এইবাৰ আমি কৰা সকলো পৰিকল্পনা কাৰ্যকৰী কৰিলোঁ । বলিং আৰু ফিল্ডিঙত উন্নতি হৈছে । এই জয় সমগ্ৰ দলীয় প্ৰচেষ্টাৰ ফল ।”

WTC পইণ্ট টেবুলৰ সমীকৰণ-

এই জয় কেৱল ছিৰিজৰ ক্ষেত্ৰতে নহয়, বিশ্ব টেষ্ট চেম্পিয়নশ্বিপ ২০২৫-২৭ (WTC)ৰ দৃষ্টিকোণৰ পৰাও গুৰুত্বপূৰ্ণ আছিল । চলিত চক্ৰত এইটোৱেই আছিল ভাৰতৰ প্ৰথম জয় আৰু ইয়াৰ লগে লগে দলটোৱে প্ৰথম পইণ্ট লাভ কৰিছে । গীলৰ দলে প্ৰমাণ কৰিলে যে ডব্লিউ টি চি ফাইনেলৰ দৌৰত তেওঁলোক এক শক্তিশালী প্ৰতিদ্বন্দ্বী ।

WTC চক্ৰৰ কথা ক’বলৈ গ’লে অষ্ট্ৰেলিয়াই এতিয়ালৈকে ২খন মেচ খেলিছে আৰু দুয়োখন খেলতে জয়লাভ কৰিছে । ইয়াৰ লগে লগে অষ্ট্ৰেলিয়া ২৪ পইণ্টেৰে প্ৰথম স্থানত আছে । একে সময়তে দ্বিতীয় স্থানত আছে শ্ৰীলংকা, যিয়ে ২খন টেষ্ট মেচৰ ভিতৰত ১খনত জয়লাভ কৰি এখন ড্ৰ’ত অন্ত পেলাইছে । ১৬ পইণ্টেৰে দ্বিতীয় স্থানত আছে দলটো । ২ খন মেচৰ ভিতৰত ১ খনত জয়ী হৈ ১২ পইণ্ট লাভ কৰি WTC পইণ্ট টেবুলৰ তৃতীয় স্থানত আছে ভাৰত । চতুৰ্থ স্থানত ইংলেণ্ড আৰু পঞ্চম স্থানত আছে বাংলাদেশ ।

লগতে পঢ়ক : ‘মোৰ ভগ্নী কৰ্কট ৰোগৰ সৈতে যুঁজি আছে…’; আকাশ দীপে উৎসৰ্গা কৰিলে এই বিজয়