জি-২০ শীৰ্ষ সন্মিলন: জোহান্সবাৰ্গত প্ৰধানমন্ত্ৰী মোদী-ৰাষ্ট্ৰপতি মেক্ৰনৰ বৈঠক
প্ৰধানমন্ত্ৰী মোদী-ৰাষ্ট্ৰপতি মেক্ৰনৰ বৈঠক
দক্ষিণ আফ্ৰিকাৰ জোহান্সবাৰ্গত অনুষ্ঠিত হোৱা জি-২০ সন্মিলনৰ আঁৰত প্ৰধানমন্ত্ৰী নৰেন্দ্ৰ মোদী আৰু ফ্ৰান্সৰ ৰাষ্ট্ৰপতি ইমানুৱেল মেক্ৰনৰ এক বৈঠক অনুষ্ঠিত হয় । বৈঠকৰ অন্তত দুয়োগৰাকী নেতাই ইজনে সিজনৰ প্ৰতি কৃতজ্ঞতা প্ৰকাশ কৰাৰ লগতে ভাৰত-ফ্ৰান্সৰ বন্ধুত্বৰ শক্তিৰ ওপৰত গুৰুত্ব আৰোপ কৰে । ৰাষ্ট্ৰপতি মেক্ৰনে ছ’চিয়েল মিডিয়া প্লেটফৰ্মত এটা পোষ্ট যোগে এই খবৰ শ্বেয়াৰ কৰে ।
ৰাষ্ট্ৰপতি মেক্ৰনে লিখিছে, “ধন্যবাদ মোৰ বন্ধু নৰেন্দ্ৰ মোদী । দেশ একেলগে আগবাঢ়িলে শক্তিশালী হয় । ভাৰত আৰু ফ্ৰান্সৰ বন্ধুত্ব জীয়াই থাকক ।” তদুপৰি প্ৰধানমন্ত্ৰী মোদীয়ে এই বৈঠকক এক আচৰিত কথা-বতৰা বুলি অভিহিত কৰে । তেওঁ কয় যে জোহান্সবাৰ্গ জি-২০ সন্মিলনৰ আঁৰত ৰাষ্ট্ৰপতি মেক্ৰনক লগ পাই আনন্দিত হৈছো । বহু বিষয়ত আমি উপযোগী আলোচনা কৰিলো । ভাৰত-ফ্ৰান্সৰ সম্পৰ্ক বিশ্বৰ বাবে এক ইতিবাচক শক্তি ।
উল্লেখ্য যে, জি-২০ সন্মিলনৰ দ্বিতীয় অধিবেশনত প্ৰধানমন্ত্ৰী মোদীয়ে ক্ৰমাৎ বৃদ্ধি পোৱা প্ৰাকৃতিক দুৰ্যোগক লৈ উদ্বেগ প্ৰকাশ কৰে । তেওঁ কয় যে সমগ্ৰ বিশ্বতে দুৰ্যোগৰ সংখ্যা আৰু প্ৰভাৱ ক্ৰমাগতভাৱে বৃদ্ধি পাইছে, যিয়ে মানৱতাৰ বাবে এক বৃহৎ প্ৰত্যাহ্বানৰ সৃষ্টি কৰিছে । প্ৰধানমন্ত্ৰী মোদীয়ে উল্লেখ কৰে যে ২০২৩ চনৰ জি-২০ৰ অধ্যক্ষতাৰ সময়ত ভাৰতে দুৰ্যোগ ব্যৱস্থাপনাৰ ক্ষেত্ৰত বিশ্বব্যাপী সহযোগিতা বৃদ্ধিৰ বাবে দুৰ্যোগৰ আশংকা হ্ৰাস কৰ্মগোট গঠন কৰিছিল । এই বিষয়টোক অগ্ৰাধিকাৰ দিয়াৰ বাবে তেওঁ দক্ষিণ আফ্ৰিকাক প্ৰশংসা কৰে ।
লগতে পঢ়ক : এয়া উন্নয়নৰ মানদণ্ডক পুনৰীক্ষণ কৰাৰ সময়… জি ২০ সন্মিলনত প্ৰধানমন্ত্ৰী মোদীৰ সম্বোধন