শ্ৰীলংকাত দিটৱাহৰ তাণ্ডৱ; অপাৰেচন সাগৰ বন্ধুৰ জৰিয়তে সহায়ৰ হাত ভাৰতৰ
অপাৰেচন সাগৰ বন্ধু
ঘূৰ্ণীবতাহ দিটৱাহে শ্ৰীলংকাত বিধ্বংসী ৰূপ ধাৰণ কৰিছে । এই কালঘূৰ্ণীয়ে শ্ৰীলংকাৰ জনসাধাৰণৰ স্বাভাৱিক জীৱনযাত্ৰাত ব্যাঘাত জন্মাইছে । দুৰ্যোগ ব্যৱস্থাপনা কেন্দ্ৰৰ তথ্য অনুসৰি দেশখনত এই ঘূৰ্ণীবতাহৰ ফলত এতিয়ালৈকে কমেও ৩৩৪জন লোকৰ মৃত্যু হোৱাৰ বিপৰীতে ৩৭০জন নিৰুদ্দেশ হৈছে । আটাইতকৈ বেছি ক্ষতিগ্ৰস্ত জিলাখন হৈছে কেণ্ডি, য’ত ৮৮ জন লোকৰ মৃত্যু হোৱাৰ লগতে ১৫০ জন লোক নিৰুদ্দেশ হৈ আছে । ইয়াৰ উপৰিও বাদুল্লাত ৭১ জন, নুৱাৰা এলিয়াত ৬৮ জন আৰু মাটালেত ২৩ জন লোকৰ মৃত্যু হৈছে ।
ডিএমচিৰ তথ্য অনুসৰি সমগ্ৰ দেশৰ ৩০৯,৬০৭টা পৰিয়ালৰ ১,১১৮,৯২৯জন লোক এই দুৰ্যোগৰ ফলত ক্ষতিগ্ৰস্ত হৈছে । তদুপৰি ঘূৰ্ণীবতাহ দিটৱাহৰ বাবে নদীৰ জলস্তস্তৰ অস্বাভাৱিক উচ্চতাত উপনীত হোৱাৰ ফলত সমগ্ৰ চহৰসমূহ ডুব গৈছে, ডাঙৰ ডাঙৰ দলংসমূহ উটুৱাই লৈ গৈছে, বহুতো গুৰুত্বপূৰ্ণ অট্টালিকা আৰু পথৰো ক্ষতিসাধন কৰিছে ।
ভাৰতৰ ‘অপাৰেচন সাগৰ বন্ধু’
এই দুৰ্যোগৰ প্ৰতি সঁহাৰি জনাই ভাৰতে ‘অপাৰেচন সাগৰ বন্ধু’ আৰম্ভ কৰি শ্ৰীলংকাক সহায় কৰিবলৈ অভিযান ত্বৰান্বিত কৰে । ভাৰতীয় বায়ুসেনাই ২১ টন সাহায্য সামগ্ৰী, ৮০ জনতকৈ অধিক এন ডি আৰ এফ জোৱান আৰু ৮ টন সঁজুলি কলম্বোলৈ বিমানেৰে প্ৰেৰণ কৰিছে ।
পুণেৰ পৰাও এন ডি আৰ এফৰ জোৱান আৰু সা-সঁজুলি বিমানেৰে লৈ যোৱা হয় । বৈদেশিক পৰিক্ৰমা মন্ত্ৰী এছ জয়শংকৰে কয় যে ভাৰতে কঠিন পৰিস্থিতিৰ মাজতো দ্ৰুত, সমন্বিত আৰু মানৱীয় সাহায্য প্ৰচেষ্টাৰ জৰিয়তে শ্ৰীলংকাক সমৰ্থন কৰিছে । এই অভিযানে আমাৰ চুবুৰীয়া দেশৰ প্ৰতি ভাৰতৰ দৃঢ় দায়বদ্ধতাক প্ৰদৰ্শন কৰে ।
লগতে পঢ়ক : হংকঙৰ বিধ্বংসী অগ্নিকাণ্ডত ৯৪ জনৰ মৃত্যু; বৰ্তমানেও নিখোজ ৩০০তকৈ অধিক লোক