‘ইণ্ডিয়াজ গট লেটেণ্ট’ত কৰা অশ্লীল মন্তব্যক লৈ সৃষ্টি হোৱা বিতৰ্কত ডাঙৰ সকাহ পাইছে ইউটিউবাৰ আশীষ চঞ্চলানীয়ে । অসম আৰক্ষীয়ে আশীষৰ বিৰুদ্ধে ৰুজু কৰা এফ আই আৰ সন্দৰ্ভত আজি গুৱাহাটী উচ্চ ন্যায়ালয়ে অন্তৱৰ্তীকালীন প্ৰত্যাশামূলক জামিন সুৰক্ষা প্ৰদান কৰে ইউটিউবাৰগৰাকীক ।
যদিও আশীষ চঞ্চলানীয়ে গ্ৰেপ্তাৰৰ পৰা অন্তৱৰ্তীকালীন অগ্ৰিম জামিন লাভ কৰিছে, ন্যায়াধীশ মৃদুল কুমাৰ কলিতাৰ বিচাৰপীঠে চঞ্চলানীক ১০ দিনৰ ভিতৰত তদন্তকাৰী বিষয়াৰ সন্মুখত হাজিৰ হ’বলৈ নিৰ্দেশ দিছে । গোচৰৰ চূড়ান্ত শুনানিৰ দিন হিচাপে ৭ মাৰ্চ নিৰ্ধাৰণ কৰা হৈছে । একক ন্যায়াধীশগৰাকীয়ে এই বিষয়ত গোচৰৰ ডায়েৰীও বিচাৰিছে ।
আশীষ চঞ্চলানীৰ অন্তৱৰ্তীকালীন অগ্ৰিম জামিন-
লক্ষণীয় যে আলোক বৰাৰ অভিযোগৰ ভিত্তিত পঞ্জীয়ন কৰা এজাহাৰখনত অভিযোগ কৰা হৈছে যে চঞ্চলানি, জছপ্ৰীত সিং, অপূৰ্বা মাখিজা, ৰণবীৰ এলাহাবাদিয়া, সময় ৰাইনা আৰু অন্যান্যসকলে অনুষ্ঠানটোত অশ্লীলতাৰ প্ৰচাৰ কৰিছিল । উচ্চ ন্যায়ালয়ৰ সন্মুখত চঞ্চলানীক প্ৰতিনিধিত্ব কৰা জ্যেষ্ঠ অধিবক্তা দিগন্ত দাস আৰু অধিবক্তা জয়ৰাজ বৰাই তেওঁৰ গোচৰ উপস্থাপন কৰি কয় যে ‘চঞ্চলানি নিৰ্দোষ কিয়নো তেওঁ এজাহাৰত উল্লেখ কৰা কোনো মন্তব্য কৰা নাছিল ।’
তেওঁ কয় যে যিটো মন্তব্যক লৈ এই সকলো হুলস্থুল চলি আছে, সেই মন্তব্য ‘ইণ্ডিয়াছ গট লেটেণ্ট’ৰ সেই খণ্ডটোত চঞ্চলানীৰ সহ-পেনেলিষ্ট ৰণবীৰ এলাহাবাদিয়াই দিছিল । ইয়াত আশীষৰ কোনো ভূমিকা নাছিল । সেই খণ্ডটোৰ সম্পাদনা বা পোষ্ট প্ৰডাকচনত তেওঁৰ কোনো ভূমিকা, কৰ্তৃত্ব বা জড়িত নাছিল । চঞ্চলানীৰ অধিবক্তাসকলেও কয় যে তেওঁ আন পেনেলিষ্টৰ এনে কোনো মন্তব্যক কোনো ধৰণে সমৰ্থন বা অৰিহণা যোগোৱা নাছিল ।
গ্ৰেপ্তাৰৰ পৰা সকাহ পালে ৰণবীৰ এলাহাবাদীয়াই-
আজি ৰণবীৰ এলাহাবাদিয়াৰ আবেদনৰ শুনানিও উচ্চতম ন্যায়ালয়ত গ্ৰহণ কৰা হয় য’ত তেওঁ চৰ্তসহ গ্ৰেপ্তাৰৰ পৰা সকাহ লাভ কৰে । চৰ্তত উল্লেখ আছে যে তদন্তত সহযোগ কৰিব লাগিব ৰণবীৰে । যেতিয়াই আৰক্ষীয়ে তেওঁলোকক সোধা-পোছাৰ বাবে ফোন কৰে তেতিয়াই তেওঁলোক উপস্থিত থাকিব লাগিব । জেৰাৰ সময়ত অধিবক্তাজনক থানাৰ ভিতৰত থাকিবলৈ দিয়া নহ’ব । ৰণবীৰে থানাত পাছপ’ৰ্ট জমা দিব লাগিব । আদালতৰ অনুমতি অবিহনে তেওঁ দেশৰ বাহিৰলৈ যাব নোৱাৰে । উচ্চতম ন্যায়ালয়ে এলাহাবাদীয়াৰ আবেদনৰ ওপৰত এই জাননী জাৰি কৰে ।
