গগণযান, মহাকাশ কেন্দ্ৰ আৰু নতুন উচ্চতা

প্ৰধানমন্ত্ৰী নৰেন্দ্ৰ মোদীয়ে ৰাষ্ট্ৰীয় মহাকাশ দিৱস উপলক্ষে দেশবাসী আৰু বিজ্ঞানীসকলক সম্ভাষণ জনাই কয় যে এই দিৱস যুৱক-যুৱতীসকলৰ মাজত এক উৎসাহ আৰু আকৰ্ষণৰ অনুষ্ঠানত পৰিণত হৈছে । তেওঁ কয় যে আজি মহাকাশ খণ্ডত ইটোৰ পিছত সিটো নতুন মাইলৰ খুঁটি অৰ্জন কৰাটো ভাৰতৰ বাবে গৌৰৱৰ বিষয় । প্ৰধানমন্ত্ৰী মোদীয়ে কয় যে ভাৰতে অতি শীঘ্ৰে গগণযান উৎক্ষেপণ কৰিব আৰু আগন্তুক সময়ত নিজাকৈ মহাকাশ কেন্দ্ৰও স্থাপন কৰিব ।

প্ৰধানমন্ত্ৰীয়ে কয় যে শেহতীয়াকৈ ভাৰতে জ্যোতিৰ্বিজ্ঞান আৰু জ্যোতিৰ্পদাৰ্থ বিজ্ঞানৰ আন্তঃৰাষ্ট্ৰীয় অলিম্পিয়ান আয়োজন কৰিছিল, য’ত ৬০খনতকৈও অধিক দেশৰ ৩০০ যুৱকে অংশগ্ৰহণ কৰিছিল আৰু ভাৰতীয় যুৱক-যুৱতীসকলেও পদক লাভ কৰিছিল । তেওঁ ইয়াক ভাৰতৰ উদীয়মান নেতৃত্বৰ সম্ভাৱনাৰ প্ৰতীক বুলি অভিহিত কৰে । তেওঁ লগতে কয় যে ইছৰোৱে ইণ্ডিয়ান স্পেচ হেকাথন আৰু ৰবটিক্স চেলেঞ্জৰ দৰে পদক্ষেপ আৰম্ভ কৰিছে, যিয়ে মহাকাশৰ প্ৰতি যুৱক-যুৱতীসকলৰ আগ্ৰহ বৃদ্ধি কৰিছে ।

প্ৰধানমন্ত্ৰী মোদীয়ে কয় যে ভাৰতে ছেমি ক্ৰাইজেনিক ইঞ্জিন আৰু ইলেক্ট্ৰিক প্ৰপালচনৰ দৰে নতুন প্ৰযুক্তিৰ ক্ষেত্ৰত দ্ৰুতগতিত আগবাঢ়িছে । শীঘ্ৰে ভাৰতে গগণযান অভিযান সফলভাৱে সম্পূৰ্ণ কৰিব আৰু আগন্তুক সময়ত নিজাকৈ মহাকাশ কেন্দ্ৰও স্থাপন কৰিব বুলি তেওঁ আস্থা প্ৰকাশ কৰে ।

প্ৰধানমন্ত্ৰী মোদীয়ে কয় যে আজি স্পেচ-টেক কেৱল গৱেষণাতে সীমাবদ্ধ নহয় বৰঞ্চ ই শাসন ব্যৱস্থাৰো অংশ হৈ পৰিছে । শস্য বীমা আঁচনিৰ উপগ্ৰহভিত্তিক মূল্যায়ন, উপগ্ৰহৰ তথ্য আৰু মাছমৰীয়াৰ সুৰক্ষা, দুৰ্যোগ ব্যৱস্থাপনাত ভূ-স্থানীয় তথ্যৰ ব্যৱহাৰ আৰু পি এম গতি শক্তি ৰাষ্ট্ৰীয় গুৰু আঁচনি- এই সকলোবোৰে সাধাৰণ নাগৰিকৰ জীৱন সহজ কৰি তুলিছে ।

ইছৰোৰ অধ্যক্ষয়ো ভাৰতৰ দৃষ্টিভংগী ব্যক্ত কৰে-

মহাকাশ দিৱস উপলক্ষে ইছৰোৰ অধ্যক্ষ ভি নাৰায়ণনে কয় যে প্ৰধানমন্ত্ৰীৰ দৃষ্টিভংগী অনুসৰি আগন্তুক সময়ত ভাৰতে চন্দ্ৰযান-৪ অভিযান, ভেনাছ অৰ্বিটাৰ মিছন আৰু বি আই এছ নামৰ মহাকাশ কেন্দ্ৰৰ দিশত কাম কৰিব । ২০২৮ চনৰ ভিতৰত বি আই এছ মহাকাশ কেন্দ্ৰৰ প্ৰথমটো মডিউল মুকলি কৰা হ’ব আৰু ২০৩৫ চনৰ ভিতৰত ই সম্পূৰ্ণৰূপে কাৰ্যক্ষম হ’ব ।

ইছৰোৰ অধ্যক্ষই কয় যে প্ৰধানমন্ত্ৰীয়ে এন জি এল (Next Generation Launcher)কো অনুমোদন জনাইছে । ২০৪০ চনৰ ভিতৰত ভাৰত কেৱল চন্দ্ৰত অৱতৰণ কৰাই নহয় তাৰ পৰা নিৰাপদে উভতিও আহিব । নাৰায়ণনে কয় যে তেতিয়ালৈকে ভাৰতীয় মহাকাশ কাৰ্যসূচী আন যিকোনো দেশৰ মহাকাশ কাৰ্যসূচীৰ সমতুল্য হ’ব ।

ইছৰোৰ মুৰব্বীগৰাকীয়ে গগণযাত্ৰী কাৰ্যসূচীৰ কথা উল্লেখ কৰি কয় যে এজন ভাৰতীয়ক আন্তঃৰাষ্ট্ৰীয় মহাকাশ কেন্দ্ৰ (আই এছ এছ)লৈ প্ৰেৰণ কৰাটো এক বৃহৎ সফলতা । তেওঁ কয় যে প্ৰধানমন্ত্ৰীৰ ধাৰণা আছিল যে প্ৰথমে আমাৰ নিজৰ ৰকেটেৰে এজন ভাৰতীয়ক আই এছ এছলৈ পঠিয়াব লাগে । এই ধাৰণাৰ অধীনত শুভাংশ শুক্লাক আই এছ এছলৈ পঠিওৱা হ’ল আৰু তেওঁ নিৰাপদে উভতি আহিল । তেওঁ কয় যে গগণযান দলৰ চাৰিওজন সদস্যই আমাৰ বাবে সমানে গুৰুত্বপূৰ্ণ ।

লগতে পঢ়ক : শত্ৰুৰ বুকুত কঁপনি তুলি অগ্নি ৫ ক্ষেপণাস্ত্ৰৰ সফল পৰীক্ষণ ভাৰতৰ… ৫ হাজাৰ কিলোমিটাৰ পৰ্যন্ত হানিব আঘাত

ইছৰোৰ মানৱ মহাকাশ অভিযানৰ প্ৰস্তুতি পূৰ্ণগতিত

ভাৰতীয় মহাকাশ গৱেষণা সংস্থাই শনিবাৰে কয় যে গগণযান অভিযানৰ বাবে চাৰ্ভিছ মডিউল প্ৰপালচন চিষ্টেম (এছ এম পি এছ)ৰ কাম সফলতাৰে সম্পূৰ্ণ কৰা হৈছে । ইয়াৰ লগতে এই ব্যৱস্থাৰ প্ৰয়োজনীয় সকলো পৰীক্ষাও সম্পূৰ্ণ কৰা হৈছে । শুকুৰবাৰে এই ব্যৱস্থাৰ এটা ডাঙৰ পৰীক্ষা ৩৫০ ছেকেণ্ড (প্ৰায় ৬ মিনিট)ৰ বাবে কৰা হৈছিল । ইয়াৰ উদ্দেশ্য আছিল উৰণৰ সময়ত কোনো সমস্যা হ’লে আৰু মিছনটো মাজভাগত বন্ধ কৰি দিবলগীয়া হ’লে এই ব্যৱস্থাটোৱে সঠিকভাৱে কাম কৰে নে নাই (যাক ‘মিছন এবৰ্ট’ বুলি কোৱা হয়) চাব লাগে ।

গগণযান অভিযান ভাৰতৰ প্ৰথমটো মানৱ মহাকাশ অভিযান । ইছৰোৱে এক বিবৃতিত কয় যে হট পৰীক্ষাৰ সময়ত ভৱিষ্যদ্বাণী অনুসৰি প্ৰপালচন ব্যৱস্থাৰ কাৰ্য্যক্ষমতা স্বাভাৱিক আছিল । ইছৰোৰ মতে, গগণযানৰ চাৰ্ভিচ মডিউলত এটা বিশেষ ব্যৱস্থা স্থাপন কৰা হৈছে যিটো দুবিধ ইন্ধনেৰে চলি থাকে । এই ব্যৱস্থাই মানুহৰ লগত মহাকাশলৈ যোৱা অংশটোক সহায় কৰে । ইয়াৰ কাম হ’ল ৰকেটটোক সঠিক কক্ষপথলৈ লৈ যোৱা, উৰণৰ সময়ত দিশ নিয়ন্ত্ৰণ কৰা, প্ৰয়োজনৰ সময়ত ৰকেটৰ গতি লেহেমীয়া কৰা আৰু কিবা সমস্যা হ’লে মিছনটো মাজভাগত বন্ধ কৰি নিৰাপদে মহাকাশচাৰীসকলক ঘূৰাই অনা ।

এই অভিযানত দুটা বিশেষ ধৰণৰ ইঞ্জিনে কাম কৰে- লিকুইড এপ’জি মটৰ (LAM)-এ ৰকেটটোক সঠিক কক্ষপথলৈ অনাত সহায় কৰে আৰু তাৰ পিছত লাহে লাহে তললৈ নমাই অনাত সহায় কৰে । ৰিয়েকচন কণ্ট্ৰল চিষ্টেমে (RCS) ৰকেটৰ দিশ অতি নিখুঁতভাৱে নিয়ন্ত্ৰণ কৰে । ইছৰোৱে কয় যে এছ এম পি এছ সঠিকভাৱে পৰীক্ষা কৰিবলৈ এটা মডেল প্ৰস্তুত কৰা হৈছিল, যাক চিষ্টেম ডেম’নষ্ট্ৰেচন মডেল (এছ ডি এম) বুলি কোৱা হয় । এই মডেলত প্ৰকৃত ব্যৱস্থাটোত থাকিব পৰা সকলো অংশও অন্তৰ্ভুক্ত কৰা হৈছে- যেনে ইন্ধনৰ টেংকৰ পৰা ইন্ধন পঠোৱা ব্যৱস্থা, হিলিয়াম গেছৰ চাপ বজাই ৰখা ব্যৱস্থা, উৰণৰ সময়ত কাম কৰা সৰু ইঞ্জিন (থ্ৰাষ্টাৰ) আৰু সেইবোৰ নিয়ন্ত্ৰণ কৰা সঁজুলি ।

এই মডেলৰ ওপৰত ইছৰোৱে ২৫টা ভিন্ন পৰীক্ষা চলাইছিল- কিছুমান স্বাভাৱিক পৰিস্থিতিত আৰু কিছুমান কঠিন পৰিস্থিতিত । এই সকলোবোৰ পৰীক্ষা একেলগে মুঠ ১৪,৩৩১ ছেকেণ্ড (প্ৰায় ৪ ঘণ্টা) চলিছিল । তেওঁলোকৰ উদ্দেশ্য আছিল এই ব্যৱস্থাই গগণযান অভিযানৰ বিভিন্ন পৰ্যায় আৰু মানুহক নিৰাপদে কঢ়িয়াই নিয়াৰ প্ৰয়োজনীয়তা পূৰণ কৰে নেকি সেয়া চোৱা ।

ইছৰোৱে কয় যে এই প্ৰপালচন চিষ্টেমটো ইয়াৰ লিকুইড প্ৰপালচন চিষ্টেম চেণ্টাৰ (এল পি এছ চি)ত ডিজাইন, পৰিকল্পনা আৰু নিৰ্মাণ কৰা হৈছিল । ইয়াৰ সকলো পৰীক্ষা তামিলনাডুৰ মহেন্দ্ৰগিৰিত অৱস্থিত ইছৰোৰ প্ৰপালচন কমপ্লেক্স (আই পি আৰ চি)ত কৰা হৈছিল, য’ত ৰকেটৰ ইঞ্জিন আৰু ইয়াৰ লগত জড়িত ব্যৱস্থাসমূহ পৰীক্ষা কৰা হয় ।

লগতে পঢ়ক : মহাকাশত শুভাংশু শুক্লাই কৰিলে মগু আৰু মেথিৰ খেতি…