পঞ্জাৱৰ তীক্ষ্ণ বলিঙৰ সন্মুখত চেন্নাইৰ আত্মসমৰ্পণ… চি এছ কেৰ একেৰাহে চতুৰ্থটো পৰাজয়
আই পি এল ২০২৫ত আজি পঞ্জাব কিংছ (পি বি কে এছ) আৰু চেন্নাই ছুপাৰ কিংছ (চি এছ কে)ৰ মাজত অনুষ্ঠিত হোৱা খেলখনত চি এছ কে দলে একেৰাহে চতুৰ্থবাৰৰ বাবে পৰাজয়ৰ সন্মুখীন হয় । এই খেলখন নিউ চণ্ডীগড় (মুল্লানপুৰ)ৰ মহাৰাজা যাদবীন্দ্ৰ সিং আন্তঃৰাষ্ট্ৰীয় ক্ৰিকেট ষ্টেডিয়ামত অনুষ্ঠিত হৈছিল । য’ত পঞ্জাব কিংছৰ অধিনায়ক শ্ৰেয়াছ আয়াৰে টছত জয়লাভ কৰি প্ৰথমে বেটিং কৰাৰ সিদ্ধান্ত লয় । প্ৰিয়ংশ আৰ্যৰ বিস্ফোৰক শতকৰ সহায়ত পঞ্জাবে চি এছ কেক ২২০ ৰানৰ লক্ষ্য বান্ধি দিছিল । ইয়াৰ প্ৰত্যুত্তৰত চেন্নাই দলে ২০১ ৰানতে ইনিংছ সমাপ্ত কৰিবলৈ বাধ্য হয় । লগে লগে পঞ্জাৱ দলে ১৮ ৰানত এই মেচখনত জয়লাভ কৰে ।
চেন্নাইৰ বেটিং-
২২০ ৰানৰ লক্ষ্যৰ প্ৰত্যুত্তৰত চেন্নাই ছুপাৰ কিংছে শক্তিশালী আৰম্ভণি কৰে । ৰাচিন ৰবিন্দ্ৰই ৩৬ ৰান সংগ্ৰহ কৰে যদিও গাইকোৱাদ ব্যৰ্থ হয় । সপ্তম অভাৰত আউট হয় ৰাচিন ৰবীন্দ্ৰ । ইয়াৰ পিছত গাইকৱাদ এক ৰান সংগ্ৰহ কৰি আউট হয় । ইয়াৰ পিছত কনৱে আৰু শিৱম ডুবেৰ মাজত ভাল অংশীদাৰিত্ব গঢ় লৈ উঠে । কনৱেইও পঞ্চাশ ৰান কৰে । ডুবে আউট হোৱাৰ পিছত ধোনীয়ে বেটিং কৰিবলৈ আহে । ধোনীয়ে ১২টা বলত ২৭ ৰান সংগ্ৰহ কৰে । কিন্তু চেন্নাইক জয়ী কৰাত ব্যৰ্থ হয় ধোনী । চেন্নাই দলে নিৰ্ধাৰিত ২০ অভাৰত ৫ উইকেট হেৰুৱাই মাত্ৰ ২০১ ৰানহে সংগ্ৰহ কৰিবলৈ সক্ষম হয় ।
পঞ্জাৱৰ ইনিংছ-
টছত জয়ী হৈ প্ৰথমে বেটিং কৰিবলৈ অহা পঞ্জাৱৰ আৰম্ভণি ভাল নাছিল । দ্বিতীয় অভাৰত মুকেশ চৌধাৰীয়ে আউট কৰে প্ৰভসীমৰণ সিঙক । প্ৰভসিমৰনে একাউণ্ট খোলাতো ব্যৰ্থ হয় । ইয়াৰ পিছত তৃতীয় অভাৰত আয়াৰো পেভিলিয়নমুখী হয় । তেওঁৰ বেটৰ পৰা মাত্ৰ ৯ ৰানহে আহে । মাৰ্কাছ ষ্টয়নিছেও ভাল প্ৰদৰ্শন কৰাত ব্যৰ্থ হয় । ইয়াৰ পাছতে অশ্বিনে একেটা অভাৰতে নেহাল বাধেৰা আৰু গ্লেন মেক্সৱেলক আউট কৰে । কিন্তু এটা মূৰত প্ৰিয়ংশ আৰ্যই উজ্জ্বল বেটিং কৰি মাত্ৰ ৩৯টা বলত শতক অৰ্জন কৰি দলক বিপৰ্যয়ৰ পৰা উদ্ধাৰ কৰে । একে সময়তে শশাংক সিঙেও বিস্ফোৰক বেটিং কৰে । ইয়াৰ বাবেই পঞ্জাবে চেন্নাই ছুপাৰ কিংছৰ সন্মুখত ২২০ ৰানৰ লক্ষ্য স্থিৰ কৰে ।
চলিত ছিজনত পঞ্জাব কিংছে তিনিখন খেলৰ ভিতৰত দুখন মেচত জয়লাভ কৰাৰ বিপৰীতে চি এছ কেয়ে চাৰিখন মেচৰ ভিতৰত মাত্ৰ এখন খেলত জয়লাভ কৰিছে । এই ছিজনত লক্ষ্য অনুসৰণ কৰি পৰাজয়ৰ হেট্ৰিক সম্পূৰ্ণ কৰিছে চি এছ কেয়ে ।