কানাডাৰ প্ৰধানমন্ত্ৰী মাৰ্ক কাৰ্নীয়ে কেবিনেটত বৃহৎ সালসলনি কৰিছে । তেওঁ ভাৰতীয় মূলৰ অনিতা আনন্দক বৈদেশিক মন্ত্ৰী হিচাপে নিযুক্তি দিছে । পূৰ্বৰ প্ৰধানমন্ত্ৰী জাষ্টিন ট্ৰুডো চৰকাৰতো অনিতা কেবিনেট মন্ত্ৰী হিচাপে কাৰ্যনিৰ্বাহ কৰি আহিছে ।

অনিতা আনন্দে পবিত্ৰ হিন্দু শাস্ত্ৰ গীতাত হাত থৈ পদ আৰু গোপনীয়তাৰ শপত গ্ৰহণ কৰে । তেওঁ কানাডাৰ বৈদেশিক মন্ত্ৰী হিচাপে নিৰ্বাচিত হোৱাত মই সন্মানিত অনুভৱ কৰিছো বুলি মন্তব্য কৰে । তেওঁ কয় যে, মই প্ৰধানমন্ত্ৰী মাৰ্ক কাৰ্নি আৰু আমাৰ দলৰ সৈতে ঘনিষ্ঠভাৱে কাম কৰি এখন উন্নত আৰু সুৰক্ষিত পৃথিৱী গঢ়ি তুলিবলৈ আগ্ৰহী ।

উল্লেখ্য যে, মেলোনি জ’লীৰ ঠাইত অনিতাক বৈদেশিক মন্ত্ৰী হিচাপে নিযুক্তি দিয়া হৈছে । জলীক উদ্যোগ মন্ত্ৰী হিচাপে নিযুক্তি দিয়া হৈছে । কাৰ্নীৰ মন্ত্ৰীসভাৰ আধা সদস্য মহিলা । প্ৰধানমন্ত্ৰী কাৰ্নীয়ে কয় যে তেওঁৰ মন্ত্ৰীসভাই কানাডাৰ জনসাধাৰণৰ ইচ্ছা আৰু প্ৰয়োজন অনুসৰি পৰিৱৰ্তন আনিবলৈ কাম কৰিব ।

ভাৰতৰ সৈতে অনিতাৰ কি সম্পৰ্ক ?

অনিতা আনন্দ ভাৰতীয় মূলৰ । তেওঁৰ পিতৃ তামিলনাডুৰ, মাতৃ পঞ্জাৱৰ । কিন্তু পৰৱৰ্তী সময়ত তেওঁৰ পিতৃ-মাতৃয়ে কানাডাত বসতি স্থাপন কৰে । তেওঁ গীতাত হাত থৈ বৈদেশিক মন্ত্ৰী হিচাপে শপত গ্ৰহণ কৰে ।

ট্ৰুডো চৰকাৰৰ পৰিবহণ আৰু বাণিজ্য মন্ত্ৰীও হিচাপে কাৰ্যনিৰ্বাহ কৰি আহিছে তেওঁ । ১৯৬৭ চনত নোভা স্কটিয়াত জন্মগ্ৰহণ কৰিছিল অনিতাই । তেওঁৰ পিতৃ-মাতৃ দুয়ো চিকিতসক । অনিতাই টৰন্টো বিশ্ববিদ্যালয়ৰ আইন অধ্যাপিকা হিচাপে কাৰ্যনিৰ্বাহ কৰিছিল ।

২০১৯ চনত প্ৰথমবাৰৰ বাবে অকভিলৰ পৰা সাংসদ নিৰ্বাচিত হোৱা অনিতাই ২০২১ চনৰ পৰা ২০২৩ চনলৈ প্ৰতিৰক্ষা মন্ত্ৰী আৰু ২০২৩ চনৰ পৰা ২০২৪ চনলৈ ট্ৰেজাৰী ব’ৰ্ডৰ অধ্যক্ষ হিচাপে কাৰ্যনিৰ্বাহ কৰি আছিল । ২০২৫ চনৰ নিৰ্বাচনত নিজৰ আসন অক্ষুণ্ণ ৰাখি মাৰ্ক কাৰ্নী চৰকাৰৰ কেবিনেট মন্ত্ৰী হিচাপে কাৰ্যনিৰ্বাহ কৰিব তেওঁ । ৰাজনীতিত যোগদান কৰাৰ পূৰ্বে পেছাত এগৰাকী উকীল আৰু অধ্যাপিকা আছিল অনিতা আনন্দ ।

কানাডাৰ সাধাৰণ নিৰ্বাচনত জয়লাভ কৰিছে প্ৰধানমন্ত্ৰী মাৰ্ক কাৰ্নি নেতৃত্বাধীন লিবাৰেল পাৰ্টিয়ে । কানাডাৰ সংসদৰ ৩৪৩খন আসনৰ ভিতৰত কনজাৰ্ভেটিভতকৈ অধিক আসন লাভ কৰিছে লিবাৰেল পাৰ্টিয়ে । নিৰ্বাচনত জয়ী হোৱাৰ পিছত প্ৰধানমন্ত্ৰী মাৰ্ক কাৰ্নিয়ে বিজয়ী ভাষণত কানাডাৰ লোকসকলক সকীয়াই দিয়ে । কাৰ্নিয়ে কয় যে ট্ৰাম্পে আমাক ভাঙি পেলাবলৈ চেষ্টা কৰিছে । সেয়েহে আমি সজাগ হোৱাটো প্ৰয়োজন ।

অট’ৱাত বিজয় ভাষণৰ সময়ত প্ৰধানমন্ত্ৰী মাৰ্ক কাৰ্নিয়ে আমেৰিকাৰ ভাবুকিৰ প্ৰত্যুত্তৰ দি কানাডাৰ ঐক্যৰ গুৰুত্বৰ ওপৰত গুৰুত্ব আৰোপ কৰে । তেওঁ কয় যে দ্বিতীয় বিশ্বযুদ্ধৰ পিছত কানাডা আৰু আমেৰিকাই যি পাৰস্পৰিকভাৱে উপকাৰী ব্যৱস্থা ভাগ কৰি আহিছে, সেয়া শেষ হৈছে ।

তেওঁ কয় যে আমি আমেৰিকাৰ বিশ্বাসঘাতকতাৰ জোকাৰণিৰ পৰা সুস্থ হৈ উঠিছো, কিন্তু ইয়াৰ পৰা শিকি অহা শিক্ষা আমি কেতিয়াও পাহৰিব নালাগে । মই কেইবামাহো ধৰি সকীয়াই দি আহিছো যে আমেৰিকাই আমাৰ মাটি, আমাৰ সম্পদ, আমাৰ পানী, আমাৰ দেশ বিচাৰে । এইবোৰ অচল ভাবুকি নহয় । ৰাষ্ট্ৰপতি ট্ৰাম্পে আমাক ভাঙি পেলাবলৈ চেষ্টা কৰিছে যাতে আমেৰিকাই আমাক দখল কৰিব পাৰে । এইটো কেতিয়াও নহ’ব । কিন্তু আমাৰ পৃথিৱীখন যে মৌলিকভাৱে সলনি হৈছে, সেই বাস্তৱতাক আমিও চিনি পোৱাটো প্ৰয়োজন ।

চতুৰ্থবাৰৰ বাবে ক্ষমতা লাভ-

ইয়াৰ পূৰ্বে যেতিয়া আমেৰিকাৰ ৰাষ্ট্ৰপতি ট্ৰাম্পে কানাডাৰ অৰ্থনীতিত আক্ৰমণ কৰিবলৈ আৰম্ভ কৰিছিল তেতিয়া লিবাৰেলসকল পৰাস্ত হৈছিল । ট্ৰাম্পৰ এই কাৰ্য্যই কানাডিয়ানসকলক ক্ষুব্ধ কৰি তুলিছিল আৰু জাতীয়তাবাদৰ উত্থানৰ সূচনা কৰিছিল । ইয়াৰ পিছতে লিবাৰেলৰ নিৰ্বাচনী কাহিনী সলনি হয় আৰু দলটোৱে একেৰাহে চতুৰ্থবাৰৰ বাবে ক্ষমতা দখল কৰিবলৈ সক্ষম হয় ।

কানাডাত অনুষ্ঠিত সাধাৰণ নিৰ্বাচনত প্ৰধানমন্ত্ৰী হিচাপে নিৰ্বাচিত হৈছে মাৰ্ক কাৰ্নি । কানাডাৰ ৰাজহুৱা সম্প্ৰচাৰক চি বি চি আৰু চি টি ভি নিউজে এই তথ্য প্ৰদান কৰিছে । কানাডাত লিবাৰেল পাৰ্টিয়ে একেৰাহে চতুৰ্থবাৰৰ বাবে চৰকাৰ গঠনত সফল হৈছে । কানাডাৰ ৰাজনৈতিক ইতিহাসত এয়া এক ডাঙৰ কৃতিত্ব । এই নিৰ্বাচনত প্ৰাক্তন বেংকাৰ মাৰ্ক কাৰ্নিৰ নেতৃত্বত লিবাৰেল পাৰ্টিয়ে ইতিহাস সৃষ্টি কৰিছে । পিয়েৰ পইলিভৰ নেতৃত্বত কনজাৰ্ভেটিভ পাৰ্টিক পৰাস্ত কৰি দলটোৱে কানাডাৰ নিৰ্বাচনত জয়লাভ কৰিছে । উল্লেখ্য যে, কানাডাক আমেৰিকাৰ সৈতে একত্ৰিত কৰাৰ কথা কোৱা আমেৰিকাৰ ৰাষ্ট্ৰপতি ড’নাল্ড ট্ৰাম্পৰ বিৰুদ্ধে নিৰ্বাচনী প্ৰচাৰত মাৰ্ক কাৰ্নিয়ে ধাৰাবাহিকভাৱে আক্ৰমণাত্মক স্থিতি গ্ৰহণ কৰি আহিছে ।

এই নিৰ্বাচনত কাৰ্নিয়ে পিয়েৰ পইলিভ্ৰেক পৰাস্ত কৰে । ৰাজনীতিৰ ক্ষেত্ৰত পইলিভ্ৰ তেওঁতকৈ বহু বেছি অভিজ্ঞ । ২০ বছৰ ধৰি হাউছ অৱ কমনছৰ সদস্য হিচাপে আছে পইলিভ্ৰে । জানুৱাৰী মাহত জাষ্টিন ট্ৰুডোৰ পদত্যাগৰ পিছত কানাডাৰ নিৰ্বাচনত মাৰ্ক কাৰ্নীয়ে লিবাৰেল পাৰ্টিক দ্ৰুতগতিত শক্তিশালী কৰি তুলিছিল আৰু নিজৰ অৰ্থনৈতিক অভিলেখত নিৰ্বাচনত অৱতীৰ্ণ হৈছিল । কাৰ্নিয়ে নিজকে সংকট পৰিচালক হিচাপে উপস্থাপন কৰিছিল । তেওঁ কানাডাৰ অৰ্থনীতিক ট্ৰাম্পৰ শুল্ক আৰু সম্প্ৰসাৰণবাদী নীতিৰ পৰা ৰক্ষা কৰাৰ প্ৰতিশ্ৰুতি দিছিল । তেওঁৰ নেতৃত্বত লিবাৰেল পাৰ্টিয়ে ভোটাৰক আকৰ্ষণ কৰাত সফল হয় ।

উল্লেখ্য যে, মাৰ্ক কাৰ্নীয়ে জি-৭ৰ দুটা কেন্দ্ৰীয় বেংকৰ নেতৃত্ব দিছে । দহ বছৰতকৈও অধিক সময় গোল্ডমেন চেক্সত কাম কৰি আহিছে । ব্ৰুকফিল্ড এচেট মেনেজমেণ্ট আৰু ব্লুমবাৰ্গৰ অধ্যক্ষ হিচাপেও তেওঁ কাৰ্যনিৰ্বাহ কৰিছিল । যেতিয়া ট্ৰাম্প প্ৰশাসনে কানাডাৰ ওপৰত কেইবাটাও শুল্ক আৰোপ কৰিছিল, তেতিয়া কাৰ্নিয়ে ইয়াক এই দেশৰ সন্মানৰ সৈতে সংযোগ কৰিছিল আৰু নিৰ্বাচনত ইয়াৰ সুবিধা লৈছিল । কানাডাৰ অৰ্থনীতি শক্তিশালী কৰাৰ লগতে দেশখনক একত্ৰিত কৰি ৰাখিব বুলিও কয় কাৰ্নিয়ে ।

কানাডাত আনুষ্ঠানিকভাৱে ২০২৫ চনৰ অক্টোবৰ মাহত নিৰ্বাচন অনুষ্ঠিত হোৱাৰ কথা আছিল যদিও প্ৰধানমন্ত্ৰী মাৰ্ক কাৰ্নিয়ে যোৱা মাহত নতুন নিৰ্বাচনৰ কথা ঘোষণা কৰিছিল । ২০১৫ চনৰ পৰা কানাডাৰ প্ৰধানমন্ত্ৰী হিচাপে থকা জাষ্টিন ট্ৰুডোৱে চলিত বৰ্ষৰ আৰম্ভণিতে পদত্যাগ কৰিছিল, তাৰ পিছত মাৰ্ক কাৰ্নিক নতুন প্ৰধানমন্ত্ৰী হিচাপে নিৰ্বাচিত কৰা হৈছিল । ইয়াৰ পিছত তেওঁ নিৰ্বাচনত অৱতীৰ্ণ হোৱাৰ সিদ্ধান্ত লয় । কানাডাৰ হাউছ অৱ কমনছত আছে ৩৪৩খন আসন । পূৰ্বৰ সংসদত ১৫৩খন আসনেৰে লিবাৰেল পাৰ্টি আছিল সৰ্ববৃহৎ দল ।