৯ গৰাকী পৰমাণু বিজ্ঞানীক হত্যা কৰাৰ দাবী ইজৰাইলৰ

৯ গৰাকী ইৰাণী পৰমাণু বিজ্ঞানীক হত্যা কৰা বুলি দাবী কৰিছে ইজৰাইলে । এই দাবী নিশ্চিত কৰিবলৈ ইজৰাইল প্ৰতিৰক্ষা বাহিনীয়ে প্ৰকাশ কৰিছে মৃতকৰ তালিকা । ইয়াৰ উপৰিও ইৰাণত কোনবোৰ স্থানক লক্ষ্য কৰি পৰমাণু বিজ্ঞানীসকলক হত্যা কৰা হৈছে সেই বিষয়ে বুজাবলৈ ইজৰাইলে এটা ভিডিঅ’ প্ৰকাশ কৰিছে । আই ডি এফে প্ৰকাশ কৰিছে যে একেলগে এই আক্ৰমণত ইৰাণৰ ৯ গৰাকী পৰমাণু বিজ্ঞানী নিহত হৈছে । এই সকলো বিজ্ঞানীয়ে দ্ৰুতগতিত বোমা নিৰ্মাণৰ দিশত প্ৰচেষ্টা চলাইছিল আৰু বহুত আগবাঢ়িছিল বুলি দাবী কৰিছে ইজৰাইলে ।

ইজৰাইলী সেনাৰ দাবী- ইৰাণৰ পৰমাণু বিজ্ঞানীসকলে বোমা নিৰ্মাণৰ চেষ্টা চলাইছিল

শুকুৰবাৰে পুৱা আই ডি এফে ইৰাণত ধাৰাবাহিক আক্ৰমণ সংঘটিত কৰে । ইৰাণৰ বহু পাৰমাণৱিক স্থানক লক্ষ্য কৰি লোৱা হৈছিল এই আক্ৰমণত । প্ৰাৰম্ভিক আক্ৰমণত ইৰাণৰ ৯ গৰাকী পৰমাণু বিজ্ঞানী নিহত হয় । এই বিজ্ঞানীসকলৰ নামো প্ৰকাশ কৰিছে আই ডি এফে । ইজৰাইলী সেনাৰ মতে এই বিজ্ঞানীসকলে ইৰাণৰ পাৰমাণৱিক কাৰ্যসূচীত গুৰুত্বপূৰ্ণ ভূমিকা পালন কৰাৰ লগতে বোমা নিৰ্মাণৰ প্ৰচেষ্টাকো আগুৱাই লৈ গৈছিল ।

নিহত ৯ জন ইৰাণী বিজ্ঞানীৰ নাম-

-ফেৰেইডুন আব্বাছি, পাৰমাণৱিক অভিযান্ত্ৰিক বিশেষজ্ঞ ।

-মহম্মদ মেহদি তেহৰাঞ্চি, পদাৰ্থ বিজ্ঞান বিশেষজ্ঞ ।

-আকবৰ মোটালেবি জাদেহ, ৰাসায়নিক অভিযান্ত্ৰিক বিশেষজ্ঞ ।

-ছাইদ বৰজী, মেটেৰিয়েল ইঞ্জিনিয়াৰিং বিশেষজ্ঞ ।

-আমিৰ হাছান ফাখাহী, পদাৰ্থ বিজ্ঞান বিশেষজ্ঞ ।

-আব্দ আল-হামিদ মিনুশ্বাৰ, ৰিয়েক্টৰ পদাৰ্থ বিজ্ঞান বিশেষজ্ঞ ।

-মনছুৰ আছগাৰী, পদাৰ্থ বিজ্ঞান বিশেষজ্ঞ ।

-আহমদ ৰেজা জোলফাঘৰী দৰয়ানী, পাৰমাণৱিক অভিযান্ত্ৰিক বিশেষজ্ঞ ।

-আলী বাখৌই কাতিৰিমি, যান্ত্ৰিক বিশেষজ্ঞ ।

চাৰি দশকৰ পিছত আটাইতকৈ ডাঙৰ আক্ৰমণ-

উল্লেখ্য যে ইৰাণৰ ওপৰত কৰা এই আক্ৰমণ ৪৫ বছৰৰ পিছত ইজৰাইলৰ আটাইতকৈ ডাঙৰ সামৰিক অভিযান । এই সন্দৰ্ভত ইজৰাইলৰ প্ৰধানমন্ত্ৰী বেঞ্জামিন নেতানিয়াহুৱে কয় যে ইৰাণৰ ওপৰত এই আক্ৰমণ অপাৰেচন ৰাইজিং লায়নৰ এটা অংশ । তেওঁ কয় যে ইৰাণ ইজৰাইলৰ অস্তিত্বৰ প্ৰতি ভাবুকি । ইৰাণৰ চৰকাৰী সংবাদ মাধ্যমৰ মতে, ইজৰাইলৰ এই আক্ৰমণত মৃত্যু হয় ৰিভল্যুচনেৰী গাৰ্ডৰ মুৰব্বী হুছেইন চালামীৰ । ইয়াৰ উপৰিও এই আক্ৰমণত তেহৰাণৰ বহু আৱাসিক অট্টালিকাকো লক্ষ্য কৰি লোৱা হৈছিল । এই আক্ৰমণত নিহতসকলৰ ভিতৰত বহু শিশুও আছে ।

লগতে পঢ়ক : তেহৰাণত ইজৰাইলে চলাইছে ধ্বংসযজ্ঞ; সামৰিক আৰু পাৰমাণৱিক স্থানত আক্ৰমণ

খোমেইনীক ইজৰাইলৰ প্ৰতিৰক্ষা মন্ত্ৰীৰ কঠোৰ সতৰ্কবাণী

ইজৰাইলৰ প্ৰতিৰক্ষা মন্ত্ৰী ইজৰাইল কাটজে ইৰাণক কঠোৰ সকিয়নী দিছে । তেওঁ কয় যে, ইৰাণে যদি ইজৰাইলৰ ওপৰত ক্ষেপণাস্ত্ৰ আক্ৰমণ অব্যাহত ৰাখে তেন্তে “তেহৰাণ জ্বলাই দিয়া হ’ব”। ইৰাণে নিজৰ পাৰমাণৱিক, ক্ষেপণাস্ত্ৰ আৰু সামৰিক প্ৰতিষ্ঠানত ইজৰাইলৰ আক্ৰমণৰ প্ৰতিক্ৰিয়া স্বৰূপে কেইবাটাও ক্ষেপণাস্ত্ৰ নিক্ষেপ কৰাৰ পিছতে এই বিবৃতি প্ৰকাশ কৰিছে তেল আভিভে ।

ইজৰাইল প্ৰতিৰক্ষা বাহিনীৰ মুৰব্বী ইয়াল জমিৰ, মোছাদৰ মুৰব্বী ডেভিদ বাৰ্নিয়া আৰু অন্যান্য সামৰিক বিষয়াসকলে অংশগ্ৰহণ কৰা উচ্চ পৰ্যায়ৰ বৈঠকত প্ৰতিৰক্ষা মন্ত্ৰীজনে কয় যে ইৰাণৰ একনায়কত্ববাদে নিজৰ নাগৰিকক পণবন্দী কৰি ৰাখিছে আৰু এনে পৰিস্থিতিৰ সৃষ্টি কৰিছে য’ত বিশেষকৈ তেহৰাণৰ বাসিন্দাসকলে যথেষ্ট মূল্য ভৰিব লাগিব ।

মিছাইল নিক্ষেপ কৰিলে তেহৰাণ জ্বলাই দিয়া হ’ব !

প্ৰতিৰক্ষা মন্ত্ৰী কাটজে ইৰাণৰ সৰ্বোচ্চ নেতা আলী খোমেইনীক পোনপটীয়াকৈ সকীয়াই দি কয় যে, “যদি খোমেইনীয়ে ইজৰাইলৰ নাগৰিকৰ ওপৰত ক্ষেপণাস্ত্ৰ নিক্ষেপ কৰি থাকে তেন্তে তেহৰাণ জ্বলাই দিয়া হ’ব ।” আই ডি এফৰ তথ্য অনুসৰি শুকুৰবাৰৰ নিশাৰ পৰা ইৰাণে ইজৰাইললৈ প্ৰায় ২০০টা বেলিষ্টিক মিছাইল নিক্ষেপ কৰিছে । ইয়াৰে অধিকাংশই ইজৰাইলৰ বায়ু প্ৰতিৰক্ষাৰ দ্বাৰা ধ্বংস হয় যদিও নিৰ্ধাৰিত প্ৰট’কল অনুসৰি প্ৰায় ২৫% ক্ষেপণাস্ত্ৰ বাধা দিব পৰা নগ’ল আৰু কিছুমান মুকলি ঠাইত পৰে ।

ইজৰাইলৰ সেনাই কয় যে কিছুমান ক্ষেপণাস্ত্ৰই প্ৰতিৰক্ষা ব্যৱস্থাক ধূলি দি আৱাসিক অঞ্চলত উপনীত হোৱাৰ ফলত টেল আভিভ, ৰমাত গান আৰু ৰিছন লেজিয়নৰ দৰে চহৰত প্ৰাণ আৰু সম্পত্তিৰ ক্ষতিসাধন হয় । এই আক্ৰমণত তিনি ইজৰাইলী সাধাৰণ নাগৰিকৰ মৃত্যু হোৱাৰ লগতে প্ৰায় ৭০ জন লোক আহত হৈছে । অৱশ্যে আই ডি এফে কয় যে সকলো সামৰিক আৰু বায়ুসেনাৰ ঘাটি স্বাভাৱিকভাৱে কাম কৰি আছে ।

ইজৰাইলৰ ওপৰত এশৰো অধিক ড্ৰোন নিক্ষেপ ইৰাণৰ-

শুকুৰবাৰে ইৰাণে নিক্ষেপ কৰা ১০০খন ড্ৰোনৰ উপৰিও নিশা আন বহু ড্ৰোন নিক্ষেপ কৰা হয়, যিবোৰ ইজৰাইলৰ বায়ুসেনা আৰু নৌসেনাই ধ্বংসক কৰে । ইফালে আই ডি এফৰ মুৰব্বী ইয়াল জমিৰ আৰু ইজৰাইলৰ বায়ুসেনাৰ মুৰব্বী ট’মাৰ বাৰে কয় যে “তেহৰাণলৈ যোৱাৰ পথ এতিয়া স্পষ্ট হৈছে” । সেনাই কয় যে এতিয়া ইজৰাইলৰ যুদ্ধ বিমান তেহৰাণতো চলিব ।

আই ডি এফে কয় যে ইজৰাইলৰ বায়ুসেনাই তেহৰাণত ইৰাণৰ বায়ু প্ৰতিৰক্ষা ব্যৱস্থাত আক্ৰমণ চলাই ইজৰাইলৰ বিমানক তাত অধিক স্বাধীনতা প্ৰদান কৰিছে । টমাৰ বাৰে কয়, “আমি একেদিনাই শ শ টাৰ্গেটত আঘাত কৰিছিলো, য’ত কেইবা ডজন বিমান বিধ্বংসী ব্যৱস্থাও আছিল ।”

তেওঁ কয় যে যুদ্ধ আৰম্ভ হোৱাৰ পিছত প্ৰথমবাৰৰ বাবে ইজৰাইলৰ যুদ্ধ বিমানে ১৫০০ কিলোমিটাৰ দূৰৰ পৰা তেহৰাণৰ ওপৰেৰে উৰা মাৰি ইয়াৰ প্ৰতিৰক্ষা লক্ষ্যত আক্ৰমণ কৰিবলৈ সক্ষম হয় ।

লগতে পঢ়ক : ‘তেল এভিভক ধ্বংস কৰি দিব তেহৰাণে’; ইজৰাইলৰ আক্ৰমণত ক্ষুব্ধ খামেনীৰ প্ৰতিজ্ঞা

ইৰাণৰ বন্দৰ চহৰ বন্দৰ আব্বাছত শনিবাৰে সংঘটিত হৈছে এক ভয়কৰ বিস্ফোৰণ । এই বিস্ফোৰণত চাৰি শতাধিক লোক আহত হৈছে বুলি জানিব পৰা গৈছে । ইৰাণৰ ৰাষ্ট্ৰীয় জৰুৰীকালীন সেৱাৰ মুখপাত্ৰই এই তথ্য প্ৰকাশ কৰিছে । অৱশ্যে বিস্ফোৰণৰ প্ৰায় তিনি ঘণ্টাৰ পাছতো আনুষ্ঠানিকভাৱে কোনো লোকৰ মৃত্যুৰ তথ্য নিশ্চিত হোৱা নাই । আহতসকলক হৰমোজগান প্ৰদেশৰ চিকিৎসালয়ত ভৰ্তি কৰোৱা হৈছে ।

বন্দৰত থকা কণ্টেইনাৰত জুইৰ সূত্ৰপাত হোৱাৰ বাবেই এই বিস্ফোৰণ সংঘটিত হয় । ইতিমধ্যে সাহায্য আৰু উদ্ধাৰকাৰী দলে ঘটনাস্থলীত উপস্থিত হোৱাৰ চেষ্টা চলাইছে, আনহাতে আন দলসমূহে অঞ্চলটো খালী কৰাৰ কামত নিয়োজিত হৈছে ।

ইতিমধ্যে এই ঘটনাৰ ভিডিঅ’ ছচিয়েল মিডিয়াত ভাইৰেল হৈ পৰিছে । ভিডিঅ’ত ক’লা ধোঁৱাৰ বিশাল ডাৱৰ আকাশলৈ উঠি যোৱা দেখা গৈছে । ৰাজই বন্দৰে মূলতঃ কণ্টেইনাৰ ট্ৰেফিক চম্ভালে । ইয়াত তেলৰ টেংক আৰু পেট্ৰ’কেমিকেল ইউনিটো থাকে, যাৰ ফলত বিপৰ্যয়জনক অগ্নিকাণ্ডৰ আশংকা থাকে ।

ৰপ্তানি আৰু ট্ৰেনজিট চালানৰ ওপৰত নিষেধাজ্ঞা-

ইৰাণৰ সংবাদ মাধ্যমৰ মতে, বিস্ফোৰণৰ পিছত ইৰাণৰ শুল্ক কৰ্তৃপক্ষই সকলো শুল্ক কাৰ্যালয়ক শীঘ্ৰেই বন্দৰটোলৈ ৰপ্তানি আৰু ট্ৰেনজিট চালান প্ৰেৰণ বন্ধ কৰিবলৈ নিৰ্দেশ দিছে । পৰৱৰ্তী নিৰ্দেশ প্ৰকাশ নোপোৱালৈকে এই নিষেধাজ্ঞা প্ৰযোজ্য হৈ থাকিব । অৱশ্যে ইতিমধ্যে শুল্ক প্ৰক্ৰিয়া সম্পূৰ্ণ কৰা ট্ৰাকসমূহক বন্দৰ এলেকাৰ পৰা ওলাই যাবলৈ দিয়া হৈছে ।

আহতসকলক চিকিৎসালয়ত ভৰ্তি-

ইৰাণৰ ৰাষ্ট্ৰীয় জৰুৰীকালীন সেৱাৰ মুৰব্বী য়কতাপাৰষ্টে কয় যে এই বিস্ফোৰণত আহতসকলক বিভিন্ন চিকিৎসালয়ত ভৰ্তি কৰোৱা হৈছে । শনিবাৰে সংঘটিত হোৱা এই বৃহৎ বিস্ফোৰণৰ ফলত কেৱল বন্দৰৰ কাম-কাজ বন্ধ হোৱাই নহয় আঞ্চলিক বাণিজ্য আৰু যোগান শৃংখলতো যথেষ্ট প্ৰভাৱ পৰিছে ।