আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণৰ সৈতে পাৰমাণৱিক শান্তি চুক্তি কৰাৰ প্ৰস্তাৱ দিছে। কিন্তু তাৰ লগতে সকীয়াই দিছে যে যদি ইৰাণে সন্মতি নিদিয়ে ইয়াৰ পৰিণাম মাৰাত্মক বুলি প্ৰমাণিত হ’ব

ৰাষ্ট্ৰপতি ট্ৰাম্পে এক কাৰ্যবাহী আদেশত স্বাক্ষৰ কৰিছে। এই নিৰ্দেশৰ অধীনত আমেৰিকাৰ কোষাগাৰ বিভাগক ইৰাণৰ ওপৰত কঠোৰ অৰ্থনৈতিক নিষেধাজ্ঞা আৰোপ কৰিবলৈ নিৰ্দেশ দিয়া হৈছে।

শেহতীয়াকৈ এক সাক্ষাৎকাৰৰ সময়ত ট্ৰাম্পে জোৰ দি কৈছিল যে তেওঁৰ প্ৰথম অগ্ৰাধিকাৰ হৈছে ইৰাণক পাৰমাণৱিক অস্ত্ৰ লাভ কৰাত বাধা দিয়া। 

ইৰাণৰ সৈতে জড়িত কাৰ্যবাহী আদেশত স্বাক্ষৰ কৰাৰ সময়ত ট্ৰাম্পে সাংবাদিকৰ আগত কয় যে মই ইৰাণক ক’ব বিচাৰো যে মই এটা ডাঙৰ চুক্তি কৰিব বিচাৰো।

এনে এখন চুক্তি যাৰ দ্বাৰা তেওঁলোকে নিজৰ জীৱনটো আগুৱাই নিব পাৰিব।" ট্ৰাম্পে স্পষ্টভাৱে কয় যে ইৰাণৰ হাতত পাৰমাণৱিক অস্ত্ৰ থাকিব নোৱাৰে, যদি এনেকুৱা হয় তেন্তে ইয়াৰ বাবে ই অতি দুৰ্ভাগ্যজনক বুলি প্ৰমাণিত হ'ব। 

উল্লেখ্য যে ২০১৮ চনৰ মে’ মাহত তেওঁৰ প্ৰথম কাৰ্যকালত ট্ৰাম্পে ইৰাণৰ সৈতে হোৱা পাৰমাণৱিক চুক্তিৰ পৰা আমেৰিকাক একপক্ষীয় বুলি অভিহিত কৰি প্ৰত্যাহাৰ কৰিছিল। 

চুক্তিখনৰ পৰা ওলাই অহাৰ লগে লগে ট্ৰাম্পে ইৰাণৰ ওপৰত নিজৰ হেঁচা কৌশল তীব্ৰতৰ কৰি তুলিলে য’ত বহু দাবীও আছিল।

এই দাবীবোৰৰ বেছিভাগেই পাৰমাণৱিক চুক্তিৰ সৈতে সম্পৰ্কিত নাছিল কিন্তু নিশ্চিতভাৱে ইৰাণৰ আঞ্চলিক কাৰ্যকলাপৰ সৈতে সম্পৰ্কিত আছিল। ট্ৰাম্পে ইৰাণৰ বেলিষ্টিক মিছাইল কাৰ্যসূচী বন্ধ ৰখাৰ দাবী জনাইছিল।

জ’ বাইডেন প্ৰশাসনে ইৰাণৰ সৈতে হোৱা পাৰমাণৱিক চুক্তি পুনৰ স্থাপনৰ চেষ্টা চলাইছিল যদিও ইৰাণে চুক্তিখনলৈ ঘূৰি অহাৰ বাবে চৰ্ত আৰোপ কৰিছিল।ইৰাণে কৈছিল যে আমেৰিকা যুক্তৰাষ্ট্ৰই প্ৰথমে স্বীকাৰ কৰিব লাগে যে চুক্তিৰ পৰা প্ৰত্যাহাৰ কৰাটো অন্যায় আছিল। সকলো আৰোপ কৰা নিষেধাজ্ঞা উঠাই ল'ব লাগে, আৰু নিশ্চিত কৰিব লাগে যে ভৱিষ্যতে, আমেৰিকা যুক্তৰাষ্ট্ৰ কেতিয়াও একপক্ষীয়ভাৱে চুক্তিৰ পৰা প্ৰত্যাহাৰ নকৰে। আমেৰিকা যুক্তৰাষ্ট্ৰই ইৰাণৰ দ্বাৰা নিৰ্ধাৰিত এই চৰ্তসমূহৰ সৈতে সন্মত হোৱা নাছিল, যাৰ বাবে দুয়োখন দেশৰ মাজত হোৱা চুক্তি পুনৰুদ্ধাৰ কৰিব পৰা নগ'ল।