ইজৰাইলৰ আক্ৰমণত ক্ষুব্ধ খামেনী

ইৰাণ আৰু ইজৰাইলৰ মাজত ইতিমধ্যে যুদ্ধ আৰম্ভ হৈছে।দুয়োখন দেশে ইখনে সিখনক প্ৰত্যাহ্বান জনাইছে।ইজৰাইলৰ আক্ৰমণৰ প্ৰতিশোধ লৈ ইৰাণে বেলিষ্টিক মিছাইলেৰে টেল এভিভ আক্ৰমণ কৰে।

একে সময়তে ইজৰাইলৰ আক্ৰমণত বহু সামৰিক সেনাধ্যক্ষ আৰু পাৰমাণৱিক বিজ্ঞানীৰ মৃত্যুৰ লগতে বহু সামৰিক ঘাটিৰ ক্ষতিৰ বাবে ইৰাণ ক্ষুব্ধ হৈ পৰিছে।ইৰাণৰ সৰ্বোচ্চ নেতা আয়াতুল্লা আলী খামেনীয়ে ইজৰাইলক ধ্বংস কৰাৰ প্ৰতিজ্ঞা কৰিছে।

ইজৰাইলে ইয়াৰ পৰিণাম ভুগিব: খামেনী

খামেনীয়ে কৈছে যে, “ইজৰাইলে এইটো ভাবিব নালাগে যে আক্ৰমণৰ পিছত এইটো শেষ হৈ যাব। তেওঁলোকে এইবোৰ কৰি যুদ্ধ আৰম্ভ কৰিছিল”।

“তেওঁলোকে কৰা এই ডাঙৰ অপৰাধৰ বাবে আমি তেওঁলোকক সাৰি যাবলৈ নিদিওঁ।”ইৰাণৰ চৰকাৰী টিভিত প্ৰদৰ্শিত পূৰ্বতে ৰেকৰ্ডিং কৰা বাৰ্তাযোগে এই সতৰ্কবাণী জাৰি কৰিছে সৰ্বোচ্চ নেতাগৰাকীয়ে ।

তেওঁ লগতে কৈছে যে, “এই অপৰাধৰ দ্বাৰা ইজৰাইলে নিজকে তিক্ত আৰু যন্ত্ৰণাদায়ক ভাগ্যৰ বাবে তৈয়াৰ কৰিছে আৰু সেইটোৰ সৈতে ই নিশ্চয় ৰূপত সন্মুখিন কৰিব লাগিব।”

ইজৰাইলৰ হাতত লাগিছে তেজৰ দাগ

আয়াতুল্লা আলী খামেনীয়ে কৈছে যে ইৰাণৰ বিৰুদ্ধে এই অপৰাধত ইজৰাইলৰ হাতত তেজৰ দাগ লাগিছে।তেওঁ প্ৰতিজ্ঞা কৰিছে যে, তেহৰাণে তেল এভিভক ধ্বংস কৰিহে এৰিব।

ইয়াৰ পূৰ্বে ইজৰাইলৰ প্ৰধানমন্ত্ৰী বেঞ্জামিন নেতান্যাহুৱেও ইৰাণৰ শাসন ব্যৱস্থাক সকীয়াই দিছিল। নেতান্যাহুৱে ইৰাণৰ জনসাধাৰণক আহ্বান জনায় যে বিগত ৫০ বছৰ ধৰি এই অত্যাচাৰী শাসন ব্যৱস্থাৰ অধীনত তেওঁলোকে ক্ষতিগ্ৰস্ত হৈ আহিছে।

ইজৰাইলে তেওঁলোকৰ বাবে স্বাধীনতাৰ পথ সৃষ্টি কৰিছে।ইৰাণৰ বিৰুদ্ধে ইজৰাইলে সামৰিক অভিযান অব্যাহত ৰাখিব বুলি নেতান্যাহুৱে স্পষ্টকৈ কয়।

ইৰাণৰ সামৰিক সেনাধ্যক্ষ আৰু পাৰমাণৱিক বিজ্ঞানীৰ মৃত্যু

উল্লেখ্য যে ইজৰাইলে ইৰাণৰ পাৰমাণৱিক আৰু সামৰিক ঘাটিত ড্ৰোন আৰু মিছাইলেৰে আক্ৰমণ চলাইছিল। এই আক্ৰমণত  কেইবাজনো সামৰিক সেনাধ্যক্ষ আৰু পাৰমাণৱিক বিজ্ঞানীৰ মৃত্যু হৈছিল। ইয়াৰ দ্বাৰা হতাশ হৈ ইৰাণেও ড্ৰোন আৰু বেলিষ্টিক মিছাইলেৰে ইজৰাইলক আক্ৰমণ কৰে।

লগতে পঢ়ক: মধ্যপ্ৰাচ্যত যুদ্ধৰ দামামা; ইজৰাইলৰ ওপৰত ১৫০টা মিছাইল নিক্ষেপ ইৰাণৰ

ইজৰাইলৰ ওপৰত ইৰাণৰ মিছাইল নিক্ষেপ

ইজৰাইল আৰু ইৰাণৰ মাজত তীব্ৰতৰ হৈ পৰিছে যুদ্ধ। ইজৰাইলৰ ‘অপাৰেচন ৰাইজিং লায়ন’ৰ উত্তৰত ইৰাণেও অপাৰেচন ‘ট্ৰু প্ৰমিজ ৩’ আৰম্ভ কৰিছে

ইয়াৰ অধীনত গভীৰ নিশা টেল এভিভ আৰু জেৰুজেলামত ইৰাণে বেলিষ্টিক মিছাইল নিক্ষেপ কৰে। ইয়াৰ পিছত ইজৰাইলে পুনৰ ইৰাণৰ ওপৰত বিমান আক্ৰমণ আৰম্ভ কৰে।

ইজৰাইলৰ প্ৰতিৰক্ষা বাহিনীয়ে বৃহস্পতিবাৰে পুৱাৰ ভাগত ইৰাণৰ সামৰিক আৰু পাৰমাণৱিক প্ৰতিষ্ঠানসমূহক লক্ষ্য কৰি লয়।

য’ত ইৰাণৰ যথেষ্ট লোকচান হৈছে। ইৰাণত ৭৮ জন লোকৰ মৃত্যু হৈছে। দুয়োখন দেশৰ মাজত এতিয়া যুদ্ধ অব্যাহত আছে।

ইৰাণৰ চৰকাৰী সংবাদ মাধ্যমে কয় যে ‘অপাৰেচন ট্ৰু প্ৰমিজ’ মেজৰ জেনেৰেল মহম্মদ বাঘেৰী, আই আৰ জি চিৰ মুৰব্বী মেজৰ জেনেৰেল হোছেইন চালামি আৰু আই আৰ জি চিৰ এৰ’স্পেচ কমাণ্ডাৰ ব্ৰিগেডিয়াৰ জেনেৰেল আমিৰ আলী হাজিজাদেকে ধৰি কেইবাজনো ইৰাণী বিষয়াৰ হত্যাৰ প্ৰতিশোধ।

ইৰাণৰ আক্ৰমণৰ পিছতে টেল এভিভত হাহাকাৰ

ইৰাণ আৰু মিত্ৰশক্তিৰ মিছাইল নিক্ষেপৰ পিছত ইজৰাইলে নিজৰ বায়ু প্ৰতিৰক্ষা ব্যৱস্থা সক্ৰিয় কৰি ক্ষেপণাস্ত্ৰ বিফল কৰিবলৈ আৰম্ভ কৰিছে।কিন্তু ইৰাণে ১৫০ৰো অধিক ক্ষেপণাস্ত্ৰৰে ইয়াৰ প্ৰত্যুত্তৰত আক্ৰমণ কৰে।

ইৰাণৰ মিছাইল নিক্ষেপত ৰাজধানী টেল এভিভৰ বহু ক্ষতিসাধন হৈছে। বহু লোক আহত হোৱাৰো খবৰ আহিছে।টেল এভিভত এতিয়া উত্তেজনাই বিৰাজ কৰিছে।

যুদ্ধক লৈ কি ক’লে নেতান্যাহুৱে

ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে কৈছে যে, ইজৰাইলৰ সামৰিক অভিযানৰ উদ্দেশ্য হৈছে ইজৰাইলৰ প্ৰতি থকা পাৰমাণৱিক ভাবুকি আৰু বেলিষ্টিক মিছাইলৰ ভাবুকি দূৰ কৰা।

ইৰাণে পুনৰ ইজৰাইলৰ ওপৰত নিক্ষেপ কৰিছে ক্ষেপণাস্ত্ৰ

ইৰাণে পুনৰবাৰ ইজৰাইলক আক্ৰমণ কৰিবলৈ আৰম্ভ কৰিছে।উত্তৰ ইজৰাইলত ইৰাণৰ পৰা মিছাইলেৰে আক্ৰমণ কৰা হৈছে।

বোমাৰ পৰা হাত সাৰিবলৈ মানুহক আশ্ৰয় শিবিৰলৈ যাবলৈ আহ্বান জনোৱা হৈছে।ইৰাণৰ মিছাইলক ইজৰাইলৰ নিৰাপত্তা ব্যৱস্থাই বাধা দিবলৈ চেষ্টা কৰিছে।

আমেৰিকাই সামৰিক সম্পদ মধ্যপ্ৰাচ্যলৈ স্থানান্তৰিত কৰিছে

ইজৰাইল আৰু ইৰাণৰ মাজত চলি থকা যুদ্ধৰ মাজতে আমেৰিকাই তেওঁলোকৰ সামৰিক সম্পদ মধ্যপ্ৰাচ্যলৈ স্থানান্তৰিত কৰিছে। লগতে আমেৰিকাৰ ৰাষ্ট্ৰপতি ড’নাল্ড ট্ৰাম্পে ইৰাণক কঠোৰ সতৰ্কবাণী দিছে।

ট্ৰাম্পে কয় যে আমেৰিকাই বিশ্বৰ আটাইতকৈ মাৰাত্মক অস্ত্ৰ নিৰ্মাণ কৰে আৰু ইজৰাইলৰ হাততো বহুতো অস্ত্ৰ আছে।ট্ৰাম্পে লগতে কয় যে ইৰাণে এতিয়াও চুক্তিত উপনীত হোৱাৰ দ্বিতীয়টো সুযোগ পাব পাৰে।

লগতে পঢ়ক: তেহৰাণত ইজৰাইলে চলাইছে ধ্বংসযজ্ঞ;  সামৰিক আৰু পাৰমাণৱিক স্থানত আক্ৰমণ

হুছেইন চালামীৰ মৃত্যু

ইজৰাইলৰ আক্ৰমণত তচনচ হৈছে ইৰানৰ ৰাজধানী তেহৰান৷ইজৰাইলে পুৱতিনিশা ইৰাণৰ পাৰমাণৱিক স্থানক লক্ষ্য কৰি লৈছিল।

ইৰাণেও ইজৰাইলৰ বিৰুদ্ধে প্ৰতিশোধমূলক ব্যৱস্থা আৰম্ভ কৰিছে, দুয়োখন দেশৰ মাজত যুদ্ধ সদৃশ পৰিস্থিতিৰ সৃষ্টি হৈছে।দুয়োপক্ষৰ পৰা ধাৰাবাহিকভাৱে আক্ৰমণ-প্ৰত্যাক্ৰমণ চলি আছে।

ইজৰাইলৰ আক্ৰমণত মৃত্যু হৈছে ইৰাণৰ ৰিভল্যুচনেৰী গাৰ্ডৰ মুৰব্বী হুছেইন চালামীৰ।এই আক্ৰমণত বহু জ্যেষ্ঠ সামৰিক বিষয়াক লক্ষ্য কৰি লোৱা হৈছিল।ইৰাণৰ ওপৰত হোৱা এই আক্ৰমণৰ নাম ইজৰাইলে ‘অপাৰেচন ৰাইজিং লায়ন’ বুলি অভিহিত কৰিছে।

ইৰাণৰ আক্ৰমণৰ পিছত ইজৰাইলে সম্ভাৱ্য ড্ৰ’ন আৰু মিছাইল আক্ৰমণৰ প্ৰতি লক্ষ্য ৰাখি সমগ্ৰ দেশতে জৰুৰীকালীন অৱস্থা ঘোষণা কৰিছে।

এই আক্ৰমণৰ পিছত ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে দাবী কৰিছে যে পাৰমাণৱিক বোমা নিৰ্মাণত নিয়োজিত বিজ্ঞানীসকলৰো কেইবাজনৰো মৃত্যু হৈছে।  

এই আক্ৰমণ এনে এটা সময়ত সংঘটিত হৈছে যেতিয়া তেহৰাণৰ দ্ৰুতগতিত বৃদ্ধি পোৱা পাৰমাণৱিক কাৰ্যসূচীক লৈ দুয়োখন দেশৰ মাজত উত্তেজনাই নতুন মাত্ৰাত উপনীত হৈছে।

আন্তঃৰাষ্ট্ৰীয় পাৰমাণৱিক শক্তি সংস্থাৰ ব’ৰ্ড অৱ গভৰ্ণৰে বৃহস্পতিবাৰে ২০ বছৰৰ পিছত প্ৰথমবাৰৰ বাবে ইৰানক গৰিহণা দিয়ে কাৰণ তেওঁলোকে নিজৰ পৰিদৰ্শকৰ লগত কাম কৰা নাই।

ইৰাণে তৎক্ষণাত ঘোষণা কৰে যে তেওঁলোকে দেশখনত তৃতীয়টো সমৃদ্ধি স্থান স্থাপন কৰিব আৰু কিছুমান চেণ্ট্ৰিফিউজৰ ঠাইত অধিক উন্নত চেণ্ট্ৰিফিউজ ব্যৱহাৰ কৰিব।

ইফালে ইৰাণ মিলিটাৰীয়ে নিজৰ অফিচিয়েল একাউণ্টৰ পৰা কয় যে ‘মনত ৰাখিব আমি যুদ্ধ আৰম্ভ কৰা নাছিলো’।ইৰাকৰ আকাশমাৰ্গ ব্যৱহাৰ কৰি ইজৰাইলে ইৰাণৰ পাৰমাণৱিক ঘাটি ধ্বংস কৰা বুলি কোৱা হৈছে।

ইজৰাইলৰ এই আক্ৰমণত ইৰাণৰ চীফ অফ জেনেৰেল ষ্টাফ মেজৰ জেনেৰেল মহম্মদ বাঘেৰী, আই আৰ জি চিৰ কমাণ্ডাৰ ইন চিফ হোছেইন চালামী, আই আৰ জি চিৰ মহাকাশ বাহিনীৰ অধিনায়ক তথা ইৰাণৰ পাৰমাণৱিক কাৰ্যসূচীৰ মুৰব্বী আমিৰ আলী হাজিজাদে, মহম্মদ ইছলামী আৰু অৰ্গেনাইজেচন অৱ ডিফেন্সিভ ইনোভেচন এণ্ড ৰিচাৰ্চৰ মুৰব্বী ব্ৰিগেডিয়াৰ জেনেৰেল ৰেজা মোজাফফাৰিনীৰ মৃত্যু হৈছে।

লগতে পঢ়ক: তেহৰাণত ইজৰাইলে চলাইছে ধ্বংসযজ্ঞ;  সামৰিক আৰু পাৰমাণৱিক স্থানত আক্ৰমণ

তেহৰাণত ইজৰাইলে চলাইছে ধ্বংসযজ্ঞ

ইজৰাইলে পুনৰ ইৰানৰ তেহৰাণৰ ওপৰত ধ্বংস যজ্ঞ চলাইছে। ইৰাণৰ ৰাজধানী তেহৰাণত ইজৰাইল সেনাই বোমাৰে আক্ৰমণ কৰে।ইয়াৰ উপৰিও ইজৰাইলে ইৰাণী সেনাৰ ঘাটি আৰু ইয়াৰ পাৰমাণৱিক ঘাটিত আক্ৰমণ চলাইছে।

শুকুৰবাৰে পুৱা ইজৰাইলে ইৰাণক আক্ৰমণ কৰা বুলি জানিব পৰা গৈছে।ইজৰাইলে কয় যে তেহৰানে মিছাইল আৰু ড্ৰ’ন আক্ৰমণৰ আশংকাত জৰুৰীকালীন অৱস্থা ঘোষণা কৰা হৈছে।

ইজৰাইলৰ এজন সামৰিক বিষয়াই কয় যে ইজৰাইলে “ডজন ডজন” পাৰমাণৱিক আৰু সামৰিক লক্ষ্যত আক্ৰমণ চলাইছে।

ইজৰাইলৰ প্ৰধানমন্ত্ৰী বেঞ্জামিন নেতান্যাহুৱে কয় যে ইৰাণৰ বাবে পাৰমাণৱিক বোমা নিৰ্মাণ কৰা বিজ্ঞানীসকলকো ইজৰাইলে আক্ৰমণ কৰিছে ।

ইৰাণৰ পাৰমাণৱিক বিজ্ঞানীসকলক লক্ষ্য

প্ৰধানমন্ত্ৰী নেতানিয়াহুৱে কয় যে আমি নাটাঞ্জত থকা ইৰাণৰ মূল পাৰমাণৱিক কেন্দ্ৰক লক্ষ্য কৰি লোৱা হৈছে, আমি ইৰাণৰ বোমা নিৰ্মাণৰ কাম কৰা ইৰাণৰ মূল পাৰমাণৱিক বিজ্ঞানীসকলক লক্ষ্য কৰি লৈছিলো, আৰু আমি ইৰাণৰ বেলিষ্টিক মিছাইল প্ৰগ্ৰেমৰ কেন্দ্ৰটোকো আক্ৰমণ কৰিলোঁ।

এই আক্ৰমণৰ পিছতে আমেৰিকাৰ ৰাষ্ট্ৰপতি ট্ৰাম্পক ধন্যবাদ জনাইছে নেতান্যাহুৱে।তেওঁ কয় যে ৰাষ্ট্ৰপতি ট্ৰাম্পক তেওঁৰ নেতৃত্ব আৰু ইৰাণৰ পাৰমাণৱিক কাৰ্যসূচীৰ সন্মুখীন হোৱাৰ বাবে মই আপোনাক ধন্যবাদ জনাইছো।

নেতান্যাহুৱে কয় যে এই অভিযান ‘যেতিয়ালৈকে প্ৰয়োজন হয়’ চলি থাকিব, তেওঁ কয় যে যদি আমি এতিয়াই ব্যৱস্থা গ্ৰহণ নকৰো, তেতিয়া পৰৱৰ্তী প্ৰজন্ম নাহিব।

এই আক্ৰমণৰ পিছত ইৰাকে নিজৰ আকাশমাৰ্গ বন্ধ কৰি দিছে।এতিয়া ইৰাকৰ সকলো বিমানবন্দৰ বন্ধ।এখনো বিমানৰ গতিবিধি কৰা নাই।

ইৰাণৰ বিৰুদ্ধে ইজৰাইলৰ আক্ৰমণৰ পিছত ইজৰাইলৰ প্ৰতিৰক্ষা মন্ত্ৰী ইজৰাইল কাটজে সমগ্ৰ দেশতে জৰুৰীকালীন অৱস্থা ঘোষণা কৰিছে।

কাটজে সকীয়াই দিয়ে যে ইজৰাইল আৰু ইয়াৰ অসামৰিক জনসাধাৰণক লক্ষ্য কৰি মিছাইল আৰু ড্ৰ’ন আক্ৰমণ অতি সোনকালে কৰাৰ সম্ভাৱনা আছে।সমগ্ৰ দেশৰ ঘৰুৱা ফ্ৰণ্টত এই জৰুৰীকালীন অৱস্থা জাপি দিবলৈ বিশেষ আদেশত স্বাক্ষৰ কৰে।

সমগ্ৰ ইজৰাইলত চাইৰেন বাজি থকাৰ সময়তে প্ৰধানমন্ত্ৰী বেঞ্জামিন নেতান্যাহুৱে ইৰাণৰ বিৰুদ্ধে বিমান আক্ৰমণ অব্যাহত থকাৰ সময়তে নিজৰ নিৰাপত্তা মন্ত্ৰীসভাৰ জৰুৰী বৈঠক আহ্বান কৰিছে।

ইজৰাইলৰ আক্ৰমণৰ পিছত ইৰাণে ৰাজধানীৰ মূল আন্তঃৰাষ্ট্ৰীয় বিমানবন্দৰ ইমাম খোমেইনীত বিমান সেৱা বন্ধ কৰি দিয়া হৈছে, কাৰণ তেহৰাণৰ আশে-পাশে প্ৰচণ্ড বিস্ফোৰণৰ শব্দ শুনা গৈছে।

এই আক্ৰমণ সন্দৰ্ভত ইজৰাইল সেনাই এক বিবৃতি প্ৰকাশ কৰিছে।IDF এ কৈছে যে, ‘কিছু সময়ৰ আগতে ৰাজনৈতিক নেতৃত্বৰ নিৰ্দেশনাৰ পিছত, IDF এ ইৰাণৰ পাৰমাণৱিক কাৰ্যসূচী আক্ৰমণ কৰিবলৈ উচ্চমানৰ চোৰাংচোৱাৰ ওপৰত ভিত্তি কৰি এক আগতীয়া সিদ্ধান্ত, নিখুঁত আৰু যৌথ আক্ৰমণ আৰম্ভ কৰিছে, আৰু ইৰাণী শাসনে ইজৰাইলৰ বিৰুদ্ধে চলি থকা আগ্ৰাসনৰ প্ৰতি সঁহাৰি জনাই এই কাম কৰা হৈছিল।

কিছু সময়ৰ ভিতৰতে, বহু IAF জেট বিমানসমূহে প্ৰথম পৰ্যায় সম্পূৰ্ণ কৰিছে, য’ত ইৰাণৰ বিভিন্ন অঞ্চলত পাৰমাণৱিক লক্ষ্যকে ধৰি কেইবা ডজন সামৰিক লক্ষ্যত আক্ৰমণ কৰা হৈছিল।

লগতে পঢ়ক: চীট নম্বৰ 11 A; লাকী চীটত বহিয়েই প্ৰাণ ৰক্ষা পৰিছিল বিশ্বাস কুমাৰ ৰমেশ