ইছৰোৰ ১০০ সংখ্যক মিছন GSLV-F15 ৰকেটৰ সৈতে উপগ্ৰহ NVS-02 উৎক্ষেপণৰ কাউণ্টডাউন আৰম্ভ । ২৯ জানুৱাৰীৰ পুৱা ৬.২৩ বজাত শ্ৰীহৰিকোটাৰ সতীশ ধাৱান মহাকাশ কেন্দ্ৰৰ দ্বিতীয়টো লঞ্চ পেডৰ পৰা উৎক্ষেপণ কৰা হ’ব থলুৱা ক্ৰাইজেনিক ষ্টেজযুক্ত ৰকেটটো । ২৭ ঘণ্টীয়া কাউণ্টডাউন সম্পূৰ্ণ কৰাৰ পিছত উপগ্ৰহটোৰ সৈতে উৰা মাৰিব ৰকেটো । ইয়াৰ লগতে ইছৰোৰ নতুন অধ্যক্ষ ভি নাৰায়ণনৰ এইটোৱেই হ’ব প্ৰথম মিছন ।

ইছৰোৱে কয় যে জি এছ এল ভি-এফ ১৫-এ এন ভি এছ-০২ উপগ্ৰহটোক জিঅ’ষ্টেচনেৰী ট্ৰেন্সফাৰ কক্ষপথত স্থাপন কৰিব । ইয়াৰ ২৭.৩০ ঘণ্টাৰ কাউণ্টডাউন মঙলবাৰে পুৱা ০২.৫৩ বজাৰ পৰা আৰম্ভ হয় । ইছৰোৰ তথ্য অনুসৰি NavIC (Navigation with Indian Constellation) হৈছে ভাৰতৰ স্বতন্ত্ৰ আঞ্চলিক নেভিগেচন উপগ্ৰহ ব্যৱস্থা । ইয়াৰ লক্ষ্য হৈছে ভাৰত আৰু ভাৰতৰ পৃষ্ঠৰ পৰা ১৫০০ কিলোমিটাৰ পৰ্যন্ত বিস্তৃত অঞ্চলৰ ব্যৱহাৰকাৰীসকলক সঠিক অৱস্থান, বেগ আৰু সময় সেৱা প্ৰদান কৰা ।

ইছৰোৱে জনোৱা মতে, ইউ আৰ চেটেলাইট চেণ্টাৰৰ ডিজাইন আৰু বিকশিত এন ভি এছ-০২ উপগ্ৰহটোৰ ওজন প্ৰায় ২২৫০ কিলোগ্ৰাম । ই L1, L5 আৰু S বেণ্ডত নেভিগেচন পেলোডৰ লগতে C-বেণ্ডত ৰেঞ্জিং পেলোড কঢ়িয়াই লৈ ফুৰে, যেনে ইয়াৰ প্ৰথম প্ৰজন্মৰ উপগ্ৰহ NVS-01 ।

এন ভি এছ-০২ হৈছে এন ভি এছ ছিৰিজৰ দ্বিতীয়টো উপগ্ৰহ-

উল্লেখ্য যে, দ্বিতীয় প্ৰজন্মৰ প্ৰথম উপগ্ৰহ NVS-01 ২০২৩ চনৰ ২৯ মে’ত GSLV-F12 ৰ জৰিয়তে উৎক্ষেপণ কৰা হৈছিল । আনহাতে, এন ভি এছ-০২ হৈছে এন ভি এছ ছিৰিজৰ দ্বিতীয়টো উপগ্ৰহ । ই L1, L5 আৰু S বেণ্ডত নেভিগেচন পেলোডৰ লগতে C-বেণ্ডত ৰেঞ্জিং পেলোড কঢ়িয়াই লৈ ফুৰে, যেনে ইয়াৰ প্ৰথম প্ৰজন্মৰ উপগ্ৰহ NVS-01 ।

ভাৰতীয় মহাকাশ গৱেষণা সংস্থাৰ নতুন মুৰব্বীৰ নাম ঘোষণা কৰা হৈছে । ইছৰোৰ নতুন মুৰব্বী হ’ব ড০ ভি নাৰায়ণন । ১৪ জানুৱাৰীত তেওঁ এছ. সোমনাথৰ স্থানত দায়িত্ব গ্ৰহণ কৰিব । মঙলবাৰে (৭ জানুৱাৰী) এক জাননী জাৰি কৰি এই তথ্য দিয়া হৈছে ।

ইছৰোৰ বিশিষ্ট বিজ্ঞানী ড° ভি নাৰায়ণন বৰ্তমান লিকুইড প্ৰপালচন চিষ্টেম চেণ্টাৰ (এল পি এছ চি)ৰ সঞ্চালক । প্ৰায় ৪ দশকজুৰি চলি থকা তেওঁৰ কেৰিয়াৰত তেওঁ ইছৰোৰ ভিতৰত বহু গুৰুত্বপূৰ্ণ পদত কাম কৰিছে । ড° নাৰায়ণন ৰকেট আৰু মহাকাশযান প্ৰপালচনত বিশেষজ্ঞ ।

ড° নাৰায়ণনৰ এটা ডাঙৰ কৃতিত্ব হৈছে GSLV Mk III বাহনৰ C25 ক্ৰাইজেনিক প্ৰকল্পৰ প্ৰকল্প সঞ্চালক হিচাপে কাম কৰা । তেওঁৰ নেতৃত্বত দলটোৱে GSLV Mk III ৰ এটা জটিল উপাদান C25 ষ্টেজ সফলতাৰে বিকশিত কৰে ।

বহু মিছনত গুৰুত্বপূৰ্ণ অৱদান-

ড° নাৰায়ণনৰ নিৰ্দেশনাত এল পি এছ চিয়ে ইছৰোৰ বিভিন্ন অভিযানৰ বাবে ১৮৩টা লিকুইড প্ৰপালচন চিষ্টেম আৰু কণ্ট্ৰল পাৱাৰ প্লেণ্ট ডেলিভাৰী কৰে । তেওঁ পি এছ এল ভিৰ দ্বিতীয় আৰু চতুৰ্থ পৰ্যায়ৰ নিৰ্মাণৰ তদাৰক কৰিছিল আৰু পি এছ এল ভি চি৫৭ৰ বাবে নিয়ন্ত্ৰণ শক্তি কেন্দ্ৰৰ ডিজাইনো কৰিছিল । আদিত্য মহাকাশযান, জি এছ এল ভি এম কে-III মিছন, চন্দ্ৰযান-২ আৰু চন্দ্ৰযান-৩ৰ প্ৰপালচন ব্যৱস্থাতো তেওঁ অৰিহণা যোগাইছিল ।

বহু বঁটাৰে সন্মানিত হৈছে-

ইছৰোৰ বিজ্ঞানী ড° নাৰায়ণন বহু বঁটা আৰু সন্মানেৰে সন্মানিত হৈছে । ইয়াৰ ভিতৰত আছে আই আই টি খড়গপুৰৰ ৰূপৰ পদক, ভাৰতীয় মহাকাশ সমাজ (এ এছ আই)ৰ স্বৰ্ণ পদক আৰু এন ডি আৰ এফৰ ৰাষ্ট্ৰীয় ডিজাইন বঁটা ।

২০২২ চনত সোমনাথে দায়িত্ব গ্ৰহণ কৰিছিল-

২০২২ চনৰ জানুৱাৰী মাহত এছ. সোমনাথে ইছৰোৰ মুৰব্বী হিচাপে দায়িত্ব গ্ৰহণ কৰিছিল । এই মাহতে তেওঁৰ দুবছৰীয়া কাৰ্যকাল শেষ হ’ব । ইছৰোৰ মুৰব্বী হোৱাৰ পূৰ্বে সোমনাথ বিক্ৰম সাৰাভাই মহাকাশ কেন্দ্ৰৰ পৰিচালক আৰু ইছৰোৰ মুখ্য বিজ্ঞানী আছিল । তেওঁ তিৰুৱনন্তপুৰমস্থিত ভি এছ এছ চিৰ পৰিচালক আছিল । সোমনাথ দেশৰ অন্যতম শ্ৰেষ্ঠ ৰকেট প্ৰযুক্তিবিদ আৰু মহাকাশ অভিযন্তা । VSSC ৰ আগত তিৰুৱনন্তপুৰমত অৱস্থিত লিকুইড প্ৰপালচন চিষ্টেম চেণ্টাৰৰ (এল পি এছ চি) সঞ্চালক হিচাপেও কাম কৰি আহিছে সোমনাথে ।