‘মাদাৰ অব্ অল ডীলছ…’, ইতিহাস সৃষ্টিৰে ভাৰত আৰু ইউৰোপীয় সংঘৰ মাজত সম্পন্ন বৃহৎ চুক্তি
ভাৰত আৰু ইউৰোপীয় সংঘৰ মাজত স্বাক্ষৰিত হৈছে মুক্ত বাণিজ্য চুক্তি । কি কি সামগ্ৰী হব সস্তা ?
ভাৰত আৰু ইউৰোপীয় সংঘৰ মাজত স্বাক্ষৰিত হৈছে মুক্ত বাণিজ্য চুক্তি (FTA) । ইয়াক “মাদাৰ অব্ অল ডীল” বুলিও কোৱা হৈছে । মঙলবাৰে দিল্লীৰ হায়দৰাবাদ হাউচত এই চুক্তি স্বাক্ষৰিত হয় । ইউৰোপীয় আয়োগৰ অধ্যক্ষ উৰ্চুলা ভন ডাৰ লেয়েন আৰু ইউৰোপীয় পৰিষদৰ অধ্যক্ষ এণ্টনিঅ’ কষ্টাক প্ৰধানমন্ত্ৰী মোদীয়ে আতিথ্য প্ৰদান কৰে ।
ভন ডেৰ লেয়েনে কয় যে আজি ইউৰোপ আৰু ভাৰতে ইতিহাস ৰচনা কৰিছে । আমি এতিয়ালৈকে হোৱা আটাইতকৈ ডাঙৰ চুক্তি স্বাক্ষৰিত কৰিছো । তেওঁ কয়- “এয়া মাত্ৰ আৰম্ভণিহে । আমি আমাৰ কৌশলগত সম্পৰ্ক আৰু অধিক শক্তিশালী কৰিম ।”
তেওঁ কয় যে ই ভাৰতীয় দক্ষতা, সেৱা আৰু পৰিসৰক ইউৰোপীয় প্ৰযুক্তি, পুঁজি আৰু উদ্ভাৱনৰ সৈতে একত্ৰিত কৰিব । এই চুক্তিৰ দ্বাৰা কোনো পক্ষই অকলে লাভ কৰিব নোৱাৰা বিকাশৰ সূচনা হ’ব । আমাৰ শক্তিসমূহক একত্ৰিত কৰি আমি এনে এটা সময়ত কৌশলগত নিৰ্ভৰশীলতা হ্ৰাস কৰোঁ যেতিয়া বাণিজ্যক অস্ত্ৰ হিচাপে ক্ৰমান্বয়ে ব্যৱহাৰ কৰা হৈছে ।
কি ক’লে ইউৰোপীয় পৰিষদৰ অধ্যক্ষই ?
ইউৰোপীয় পৰিষদৰ অধ্যক্ষ এণ্টনিঅ’ লুইছ ছান্টোছ দা কোষ্টাই কয়, “আমাৰ শীৰ্ষ সন্মিলনত আমি ইউক্ৰেইনত ইউক্ৰেইনৰ স্বাধীনতা, সাৰ্বভৌমত্ব আৰু ভূখণ্ডৰ অখণ্ডতাক সম্পূৰ্ণৰূপে সন্মান কৰা এক ব্যাপক, ন্যায়সংগত আৰু স্থায়ী শান্তিৰ প্ৰচেষ্টাক সমৰ্থন কৰাৰ প্ৰতিশ্ৰুতি পুনৰ দৃঢ় কৰিছো । এইটো এটা গুৰুত্বপূৰ্ণ মুহূৰ্ত । আমি ন্যায়সংগত আৰু স্থায়ী শান্তি লাভৰ সকলো প্ৰচেষ্টাক সমৰ্থন কৰিছো । ইউক্ৰেইনে ইয়াৰ প্ৰস্তুতি প্ৰদৰ্শন কৰিছে, আনকি এই কঠিন সময়তো ।” কোষ্টাই কয় যে বিশ্বৰ সৰ্ববৃহৎ গণতন্ত্ৰ আৰু মাল্টিলেটাৰিজিমৰ চেম্পিয়ন হিচাপে ৰাষ্ট্ৰসংঘৰ চনদৰ ওপৰত ভিত্তি কৰি আন্তঃৰাষ্ট্ৰীয় আইন ৰক্ষা কৰাৰ ইউৰোপীয় সংঘ আৰু ভাৰতৰ দায়িত্ব আছে ।’
মুক্ত বাণিজ্য চুক্তি হৈছে এক অতি উল্লেখযোগ্য চুক্তি, ইয়াক “মাদাৰ অব্ অল ডীলছ“ বুলি কোৱা হয় । ইয়াৰ দ্বাৰা দুয়োখন দেশৰ মাজত সম্পৰ্কৰ সামগ্ৰিক দিশ যথেষ্ট সম্প্ৰসাৰিত হ’ব, যাৰ ফলত বিভিন্ন ক্ষেত্ৰত সহযোগিতাৰ নতুন সুযোগ মুকলি হ’ব । এই চুক্তিত আনুষ্ঠানিক স্বাক্ষৰ কৰিবলৈ কমেও ছমাহ সময় লাগিব বুলি আশা কৰা হৈছে, কিয়নো ইয়াৰ বাবে দুয়োপক্ষৰ আইনী তদাৰকীৰ প্ৰয়োজন হ’ব ।
১৮ বছৰীয়া অচলাৱস্থাৰ অন্ত-
ইউৰোপীয় সংঘ আৰু ভাৰতে প্ৰথমে ২০০৭ চনত মুক্ত বাণিজ্য চুক্তিৰ আলোচনা আৰম্ভ কৰিছিল যদিও কিছু সমস্যাৰ বাবে ২০১৩ চনত আলোচনা স্থগিত ৰখা হয় । ২০২২ চনৰ জুন মাহত পুনৰ এই আলোচনা আৰম্ভ হয় ।
ইউৰোপীয় সংঘ, এটা ব্লক হিচাপে ভাৰতীয় সামগ্ৰীৰ সৰ্ববৃহৎ বাণিজ্যিক অংশীদাৰ । ইউৰোপীয় সংঘৰ সৈতে ভাৰতৰ মুঠ সামগ্ৰীৰ বাণিজ্য ২০২৪-২৫ বিত্তীয় বৰ্ষত প্ৰায় ১৩৬ বিলিয়ন মাৰ্কিন ডলাৰ বুলি অনুমান কৰা হৈছিল, য’ত ৰপ্তানিৰ পৰিমাণ প্ৰায় ৭৬ বিলিয়ন মাৰ্কিন ডলাৰ আৰু আমদানিৰ পৰিমাণ আছিল ৬০ বিলিয়ন মাৰ্কিন ডলাৰ ।
কি ক’লে প্ৰধানমন্ত্ৰী মোদীয়ে ?
প্ৰধানমন্ত্ৰী মোদীয়ে কয় যে বিশ্বৰ জিডিপিৰ ২৫ শতাংশ আৰু বিশ্ব বাণিজ্যৰ এক তৃতীয়াংশ ইয়াতেই আছে । ভাৰত-ইউৰোপীয় ইউনিয়নৰ বাণিজ্যিক চুক্তিক মানুহে মাদাৰ অৱ অল ডীলছ বুলি অভিহিত কৰিছে । এই চুক্তিয়ে ১.৪ বিলিয়ন ভাৰতীয়ৰ লগতে ইউৰোপীয় লোকৰ বাবেও বহু সুযোগৰ সৃষ্টি কৰিব ।
প্ৰধানমন্ত্ৰী মোদীয়ে কয়, বিশ্বৰ দুখন প্ৰধান অৰ্থনীতিৰ মাজত সমন্বয়ৰ এয়া এক উৎকৃষ্ট উদাহৰণ । এই চুক্তিয়ে বিশ্বৰ জিডিপিৰ ২৫ শতাংশ আৰু বিশ্ব বাণিজ্যৰ এক তৃতীয়াংশ অংশগ্ৰহণ কৰে । ভাৰত আৰু ইউৰোপীয় সংঘৰ পাৰস্পৰিক বাণিজ্য ১৮০ বিলিয়ন ডলাৰ বুলি কয় প্ৰধানমন্ত্ৰীগৰাকীয়ে । ইউৰোপত ৮ লাখ ভাৰতীয় বাস কৰে ।
চুক্তিৰ বৃহৎ ঘোষণাঃ
-বিয়েৰৰ ওপৰত কৰ ৫০%লৈ হ্ৰাস কৰা হ’ব
-স্পিৰিট (সুৰা)ৰ ওপৰত কৰ ৪০%লৈ হ্ৰাস কৰা হ’ব
-ৱাইনৰ ওপৰত কৰ ২০% লৈ ৩০% হ্ৰাস কৰা হ’ব
-মটৰ গাড়ীৰ কৰ ১১০%ৰ পৰা ১০%লৈ হ্ৰাস কৰা হ’ব, প্ৰতি বছৰে ২.৫ লাখ বাহনৰ সীমা নিৰ্ধাৰণ কৰা হ’ব
-অলিভ অইল, মাৰ্জাৰিন আৰু ভেজিটেবল অইলৰ ওপৰত থকা কৰ সম্পূৰ্ণৰূপে নাইকিয়া হ’ব
-ফলৰ ৰস আৰু প্ৰচেছড খাদ্যৰ ওপৰত কৰ বাতিল কৰা হ’ব
-ইউৰোপীয় সংঘৰ প্ৰায় সকলো ৰাসায়নিক সামগ্ৰীৰ ওপৰত কৰ আঁতৰোৱা হ’ব
-যন্ত্ৰপাতিৰ ওপৰত ৪৪% পৰ্যন্ত কৰ বহুলাংশে আঁতৰোৱা হ’ব
-ৰাসায়নিক পদাৰ্থৰ ওপৰত ২২% পৰ্যন্ত কৰ বহুলাংশে আঁতৰোৱা হ’ব
-ঔষধৰ ওপৰত ১১% পৰ্যন্ত কৰ বহুলাংশে আঁতৰোৱা হ’ব
-প্ৰায় সকলো বিমান আৰু মহাকাশযানৰ সামগ্ৰীৰ ওপৰত কৰ বাতিল কৰা হ’ব
-ভাৰতত ইউৰোপীয় ইউনিয়নৰ ৯০%তকৈ অধিক সামগ্ৰীৰ ওপৰত কৰ বাতিল বা হ্ৰাস কৰা হ’ব
-ভাৰতে অহা দুবছৰত ইউৰোপীয় সংঘৰ সহায়ত ৫০ কোটি ইউৰো (প্ৰায় ৪৫০০ কোটি টকা) লাভ কৰিব যাতে সেউজ গৃহ গেছৰ নিৰ্গমন হ্ৰাস কৰাত সহায়ক হয়
-ইউৰোপীয় ইউনিয়নৰ ট্ৰেডমাৰ্ক, ডিজাইন, কপিৰাইট আৰু ট্ৰেড ছিক্ৰেটসমূহে শক্তিশালী আইনী সুৰক্ষা লাভ কৰিব
-অনলাইন বাণিজ্য সুৰক্ষিত, ন্যায্য আৰু নিৰ্ভৰযোগ্য হোৱাটো নিশ্চিত কৰিবলৈ ডিজিটেল বাণিজ্যৰ বাবে এটা বিশেষ অধ্যায় থাকিব
-ইউৰোপীয় সংঘৰ সেৱা কোম্পানীসমূহে বিত্তীয় আৰু সামুদ্ৰিক সেৱাত ভাৰতত বিশেষ সুবিধা লাভ কৰিব
-বজাৰৰ উন্নত প্ৰৱেশে নতুন ব্যৱসায় আৰু নিয়োগৰ সুযোগ মুকলি কৰিব
-ক্ষুদ্ৰ আৰু মজলীয়া উদ্যোগৰ বাবে এটা নিৰ্দিষ্ট অধ্যায় থাকিব
-কোম্পানীসমূহক বাণিজ্যৰ সুবিধা প্ৰদানৰ বাবে সহায়ক হোৱাকৈ ক্ষুদ্ৰ আৰু মজলীয়া উদ্যোগৰ যোগাযোগ পইণ্ট স্থাপন কৰা হ’ব
লগতে পঢ়ক : গণৰাজ্য দিৱসত দেশবাসীক শুভেচ্ছা জ্ঞাপন প্ৰধানমন্ত্ৰী মোদীৰ… দোহাৰিলে ‘বিকশিত ভাৰত’ৰ সংকল্প