২০২৪ বৰ্ষটোত ক্ৰীড়া ক্ষেত্ৰত ভাৰতৰ প্ৰদৰ্শন যথেষ্ঠ উৎসাহজনক আছিল । এই বছৰ অলিম্পিক আৰু টি-২০ ক্ৰিকেট বিশ্বকাপৰ দৰে বিশ্বব্যাপী ইভেণ্টকে ধৰি বহুতো ডাঙৰ ডাঙৰ ইভেণ্ট অনুষ্ঠিত হৈছিল । ২০২৪ বৰ্ষ পাৰ হোৱাৰ লগে লগে এই বছৰ ভাৰতে লাভ কৰা ৫ টা ডাঙৰ ক্ৰীড়া কৃতিত্বৰ ওপৰত চকু ফুৰাওঁ আহক ।
টি-২০ বিশ্বকাপৰ খিতাপ দখল-
টি-২০ বিশ্বকাপ জয় কৰাটো ভাৰতীয় পুৰুষ ক্ৰিকেট দলৰ বাবে এক অতি বিশেষ কৃতিত্ব আছিল । ৰোহিত শৰ্মাৰ নেতৃত্বত এই জয়ৰ ফলত ভাৰতৰ ১১ বছৰীয়া আই চি চি ট্ৰফীৰ খৰাং পৰিস্থিতিৰ অন্ত পৰে । ৱেষ্ট ইণ্ডিজ আৰু আমেৰিকাই যৌথভাৱে আয়োজন কৰা বিশ্বকাপত বাৰ্বাডোছত অনুষ্ঠিত হোৱা ফাইনেলত দক্ষিণ আফ্ৰিকাক ৭ ৰানত পৰাস্ত কৰি ভাৰতীয় দলটোৱে দ্বিতীয়বাৰৰ বাবে ট্ৰফী দখল কৰে । ইয়াৰ পূৰ্বে মহেন্দ্ৰ সিং ধোনীৰ নেতৃত্বত ২০০৭ চনত টি-২০ বিশ্বকাপৰ উদ্বোধনী সংস্কৰণত ভাৰতে জয়লাভ কৰিছিল । ভাৰতীয় ক্ৰিকেটৰ বাবে বিশ্বকাপ এক গুৰুত্বপূৰ্ণ মাইলৰ খুঁটি হিচাপে প্ৰমাণিত হয় । ৰোহিত শৰ্মা, বিৰাট কোহলী আৰু ৰবীন্দ্ৰ জাডেজাৰ দৰে খেলুৱৈয়ে টি-২০ ফৰ্মেটৰ পৰা অৱসৰো ঘোষণা কৰে ।
মনু ভাকৰে ৰচিলে ইতিহাস-
যদিও ভাৰতে পেৰিছ অলিম্পিকত টকিঅ’ অলিম্পিকৰ অভিলেখ ভংগ কৰিব নোৱাৰিলে, কিন্তু ভাৰতৰ যুৱ তাৰকা শ্বুটাৰ মনু ভাকৰে ইতিহাস সৃষ্টি কৰিলে । টকিঅ’ অলিম্পিকত নিজৰ অভিযান অতি হতাশাজনকভাৱে সমাপ্ত কৰাৰ পিছত মনু ভাকৰে কল্পনাতীত প্ৰত্যাৱৰ্তন ঘটায় । মনু ভাকৰে ২০২৪ চনৰ পেৰিছ অলিম্পিকত ১০ মিটাৰ এয়াৰ পিষ্টল শাখাত ব্যক্তিগত আৰু দলীয় ইভেণ্টত দুটাকৈ ব্ৰঞ্জৰ পদক লাভ কৰি অভিলেখ সৃষ্টি কৰে । ইয়াৰ লগে লগে একেখন অলিম্পিকতে দুটাকৈ পদক লাভ কৰা প্ৰথমগৰাকী ভাৰতীয় মহিলা খেলুৱৈ হিচাপে পৰিগণিত হয় তেওঁ ।
গ’ল্ডেন বয়ৰ কৃতিত্ব-
টকিঅ’ অলিম্পিকৰ গ’ল্ডেন বয় নীৰজ চোপ্ৰাই পেৰিছ অলিম্পিকত ৰূপৰ পদক লাভ কৰি ইতিহাস সৃষ্টি কৰে । ট্ৰেক এণ্ড ফিল্ডত ভাৰতৰ প্ৰথমগৰাকী স্বৰ্ণ পদক বিজয়ী নীৰজ চোপ্ৰাই পেৰিছত অনুষ্ঠিত জেভলিন থ্ৰ’ ইভেণ্টত ৰূপৰ পদক লাভ কৰিবলৈ সক্ষম হয় । যদিও তেওঁ অলিম্পিকৰ অভিলেখ গঢ়ি তোলা এক অসাধাৰণ থ্ৰ’ (৯২.৯৭ মিটাৰ) কৰি সোণৰ পদক লাভ কৰা পাকিস্তানৰ আৰ্ছাদ নাদীমৰ পিছ পৰি আছিল, তথাপিও পেৰিছত নীৰজৰ ৰূপৰ পদক ভাৰতৰ আটাইতকৈ ডাঙৰ পদক হিচাপে প্ৰমাণিত হৈছিল, যিয়ে তাৰকা খেলুৱৈগৰাকীৰ উচ্চতাক উজ্জ্বল কৰি তুলিছিল ।
পেৰালিম্পিক গেমছত ভাৰতৰ অভিলেখ ভংগকাৰী প্ৰদৰ্শন-
পেৰিছ অলিম্পিকৰ পিছত পেৰালিম্পিক গেমছতো ভাৰতৰ প্ৰদৰ্শন আছিল অতি বিশেষ । এই খেলসমূহত ভাৰতে পেৰিছ পেৰালিম্পিকৰ প্ৰদৰ্শনক অতিক্ৰম কৰি ইতিহাসৰ সৃষ্টি কৰিছিল । পেৰিছ পেৰালিম্পিকত ভাৰতে ৭টা স্বৰ্ণ পদককে ধৰি মুঠ ২৯টা পদক লাভ কৰে । ইয়াৰ উপৰিও ৯টা ৰূপৰ পদক আৰু ১৩টা ব্ৰঞ্জৰ পদকো লাভ কৰে । ইয়াৰ পূৰ্বে ভাৰতীয় পেৰালিম্পিক খেলুৱৈসকলে টকিঅ’ ২০২০ গেমছত সৰ্বোত্তম প্ৰদৰ্শন আগবঢ়াইছিল, য’ত তেওঁলোকে ৫টা স্বৰ্ণ পদককে ধৰি ১৯টা পদক লাভ কৰিছিল ।
দবা খেলত বিশ্ববাসীক আচৰিত কৰি তুলিলে ডি গুকেশে-
ক্ৰিকেট, অলিম্পিক আৰু পেৰালিম্পিক গেমছৰ উপৰিও এইবাৰ দবাৰ জগতখনত আধিপত্য বিস্তাৰ কৰা ডি গুকেশে মাত্ৰ ১৮ বছৰ বয়সতে বিশ্ব দবা চেম্পিয়ন হৈ ইতিহাস সৃষ্টি কৰে । ভাৰতৰ হৈ এই কৃতিত্ব অৰ্জন কৰা গুকেশ দ্বিতীয়জন খেলুৱৈ । ২০২৪ চনৰ ১২ ডিচেম্বৰত চীনৰ ডিং লিৰেনক পৰাস্ত কৰি তেওঁ এই অসাধাৰণ কৃতিত্ব অৰ্জন কৰে । এই জয়েৰে ভাৰতে ১১ বছৰৰ পাছত এই খিতাপ পুনৰ দখল কৰে । ইয়াৰ পূৰ্বে কেৱল বিশ্বনাথন আনন্দে এই কৃতিত্ব অৰ্জন কৰিছিল ।
