এই মিছাইলটো থলুৱা প্ৰযুক্তিৰে ডিআৰডিঅ’ৰ গৱেষণাগাৰসমূহত দেশৰ বিভিন্ন উদ্যোগৰ সহযোগত নিৰ্মাণ কৰা হৈছে

ভাৰতীয় প্ৰতিৰক্ষাৰ ইতিহাসত এক নতুন অধ্যায়ৰ সূচনা কৰি প্ৰতিৰক্ষা গৱেষণা আৰু উন্নয়ন সংস্থাই (DRDO) ২০২৬ চনৰ ৮ মে’ত ওড়িশাৰ ড০ এপিজে আব্দুল কালাম দ্বীপৰ পৰা এমআইআৰভি (MIRV) প্ৰযুক্তিযুক্ত এক উন্নত ‘অগ্নি‘ মিছাইলৰ সফল উৰণ পৰীক্ষণ সম্পন্ন কৰিছে । এই অত্যাধুনিক মিছাইলটোৰ বিশেষত্ব এয়ে যে ই আকাশৰ পৰা একেলগে বিভিন্ন দিশত থকা একাধিক লক্ষ্যবস্তুক নিখুঁতভাৱে আঘাত হানিব পাৰে ।

পৰীক্ষণৰ সময়ত মিছাইলটোৱে একাধিক পেলোড কঢ়িয়াই লৈ গৈছিল, যিবোৰ ভাৰত মহাসাগৰীয় অঞ্চলৰ এক বৃহৎ ভৌগোলিক এলেকাত বিস্তৃত হৈ থকা বিভিন্ন লক্ষ্যস্থানলৈ নিক্ষেপ কৰা হয় । ডিআৰডিঅ’ই ছচিয়েল মিডিয়া প্লেটফৰ্ম ‘এক্স’ৰ জৰিয়তে এই সফলতাৰ কথা সদৰী কৰি কয় যে অভিযানৰ সকলো লক্ষ্য নিৰ্ধাৰিত সময়ত সফলভাৱে পূৰণ হৈছে ।

এই সমগ্ৰ প্ৰক্ৰিয়াটো একাধিক ভূমি আৰু জাহাজ ভিত্তিক ট্ৰেকিং কেন্দ্ৰৰ জৰিয়তে নিৰীক্ষণ কৰা হৈছিল । মিছাইলটো উক্ষেপণ কৰাৰ পৰা আৰম্ভ কৰি ইয়াৰ পেলোডসমূহ লক্ষ্যস্থানত উপনীত হোৱালৈকে প্ৰতিটো খোজৰ তথ্য সংগ্ৰহ কৰা হয়, যিয়ে ভাৰতৰ এই সামৰিক শক্তিৰ পৰিচয় দাঙি ধৰে ।

উল্লেখ্য যে, এই মিছাইলটো থলুৱা প্ৰযুক্তিৰে ডিআৰডিঅ’ৰ গৱেষণাগাৰসমূহত দেশৰ বিভিন্ন উদ্যোগৰ সহযোগত নিৰ্মাণ কৰা হৈছে । এই ঐতিহাসিক মুহূৰ্তৰ সাক্ষী হৈ ৰয় ডিআৰডিঅ’ৰ জ্যেষ্ঠ বিজ্ঞানী আৰু ভাৰতীয় সেনাৰ উচ্চপদস্থ বিষয়াসকল ।

প্ৰতিৰক্ষা মন্ত্ৰী ৰাজনাথ সিঙে এই বৃহৎ সাফল্যৰ বাবে ডিআৰডিঅ’, ভাৰতীয় সেনা আৰু ইয়াৰ সৈতে জড়িত উদ্যোগসমূহক অভিনন্দন জ্ঞাপন কৰিছে । তেওঁ কয় যে এই সফলতাই বৰ্ধিত গোলকীয় ভাবুকিৰ মাজত দেশৰ প্ৰতিৰক্ষা প্ৰস্তুতিক এক নতুন মাত্ৰা প্ৰদান কৰিব আৰু ভাৰতীয় সেনাৰ শক্তি বহুগুণে বৃদ্ধি কৰিব ।

লগতে পঢ়ক : চেমি-ক্ৰায়’জেনিক ইঞ্জিনৰ বিকাশৰ বাবে ভাৰত আৰু ৰাছিয়াৰ মাজত চুক্তি