ভাৰতীয় মহিলা ক্ৰিকেট দলক সাক্ষাৎ কৰি প্ৰধানমন্ত্ৰী মোদীয়ে
ইতিহাস ৰচনা কৰি প্ৰথমবাৰৰ বাবে আই চি চি এদিনীয়া মহিলা বিশ্বকাপৰ খিতাপ দখল কৰে ভাৰতীয় মহিলা ক্ৰিকেট দলে । ২ নৱেম্বৰত নৱী মুম্বাইৰ ডি ৱাই পাটিল স্প’ৰ্টছ একাডেমীত অনুষ্ঠিত হোৱা আই চি চি মহিলা ক্ৰিকেট বিশ্বকাপ ২০২৫ৰ ফাইনেলত ভাৰতীয় দলটোৱে ঐতিহাসিক প্ৰদৰ্শন আগবঢ়ায় । এই মেচত দক্ষিণ আফ্ৰিকাক ৫২ ৰানত পৰাস্ত কৰি খিতাপ দখল কৰে হৰমনপ্ৰীত কৌৰ নেতৃত্বাধীন ভাৰতীয় দলে । এয়া ভাৰতীয় মহিলা দলৰ প্ৰথমটো বিশ্বকাপ জয় ।
এই ঐতিহাসিক জয়ৰ পিছতে টিম ইণ্ডিয়াৰ খেলুৱৈসকলক প্ৰধানমন্ত্ৰী মোদীয়ে সাক্ষাৎ কৰিব । বুধবাৰে (৫ নৱেম্বৰ) দিল্লীত প্ৰধানমন্ত্ৰী মোদীয়ে মহিলা দলটোক সাক্ষাৎ কৰাৰ সম্ভাৱনা আছে । এই সাক্ষাৎ দলটোৰ উল্লেখযোগ্য কৃতিত্বক উদযাপন কৰাই নহয় ভাৰতীয় মহিলা ক্ৰিকেটৰ বাবে এক নতুন যুগৰ আৰম্ভণি বুলিও বিবেচিত হৈছে ।
উল্লেখ্য যে এই বৈঠকত প্ৰধানমন্ত্ৰী মোদীয়ে মহিলা ক্ৰিকেট দলৰ খেলুৱৈসকলৰ সৈতে মত বিনিময় কৰিব আৰু তেওঁলোকৰ অভিজ্ঞতা শুনিব । প্ৰধানমন্ত্ৰীৰ সৈতে এই বৈঠক মহিলা খেলুৱৈসকলৰ বাবে এক স্মৰণীয় মুহূৰ্ত হিচাপে প্ৰমাণিত হ’ব, যাৰ অসাধাৰণ প্ৰদৰ্শনে সমগ্ৰ ৰাষ্ট্ৰক গৈৰাৱান্বিত কৰি তুলিছে । ইতিমধ্যে ভাৰতীয় ক্ৰিকেট নিয়ন্ত্ৰণ ব’ৰ্ডে চেম্পিয়ন মহিলা দলটোৰ বাবে ৫১ কোটিৰ নগদ পুৰস্কাৰ ঘোষণা কৰিছে ।
ভাৰতীয় মহিলা ক্ৰিকেট দলৰ ঐতিহাসিক বিজয়ৰ পাছতে প্ৰধানমন্ত্ৰী মোদীয়ে নিজৰ এক্স একাউণ্টত বিশেষ টুইট কৰে । প্ৰধানমন্ত্ৰী নৰেন্দ্ৰ মোদীয়ে লিখিছে, “আই চি চি মহিলা ক্ৰিকেট বিশ্বকাপ ২০২৫ৰ ফাইনেলত ভাৰতীয় দলটোৱে জয় লাভ কৰিছে । সমগ্ৰ প্ৰতিযোগিতাখনত খেলুৱৈসকলে উৎকৃষ্ট দক্ষতা, আত্মবিশ্বাস আৰু টীম ৱৰ্ক প্ৰদৰ্শন কৰে । এই ঐতিহাসিক জয়ে ভৱিষ্যতৰ চেম্পিয়নসকলক এই ক্ৰীড়া গ্ৰহণ কৰিবলৈ আৰু দেশলৈ গৌৰৱ কঢ়িয়াই আনিবলৈ অনুপ্ৰাণিত কৰিব । টিম ইণ্ডিয়ালৈ বহুত অভিনন্দন ।”
লগতে পঢ়ক : ভাৰতীয় কন্যাই ৰচিলে ইতিহাস; প্ৰথমবাৰৰ বাবে মহিলাৰ এদিনীয়া বিশ্বকাপৰ খিতাপ দখল
