ৰাইমনা ৰাষ্ট্ৰীয় উদ্যানৰ আশে-পাশে থকা অৰণ্যসমূহ ঘন উদ্ভিদ আৰু বিচিত্ৰ অণুপৰিৱেশৰ বাবে জনাজাত
ৰাইমনা ৰাষ্ট্ৰীয় উদ্যানৰ সমীপৰ কোকৰাঝাৰ জিলাৰ কচুগাঁও অঞ্চলত ‘বেণ্ট-ট’ড গেকো’ৰএটা নতুন প্ৰজাতি ‘চাইৰ্ট’ডেক্টাইলাছ ৰাইমনাএনছিছ’ (Cyrtodactylus raimonaensis) আৱিষ্কাৰ কৰিছে গৱেষকসকলে । এই আৱিস্কাৰ এক গুৰুত্বপূৰ্ণ বৈজ্ঞানিক সফলতা হিচাপে চিহ্নিত হৈছে ।
এই আৱিষ্কাৰে পূব হিমালয়ৰ পাদদেশত অৱস্থিত ৰাষ্ট্ৰীয় উদ্যানখনৰ চহকী অথচ বহুলাংশে অন্বেষণ নোহোৱা জৈৱ-বৈচিত্ৰ্যৰ প্ৰতি পুনৰ দৃষ্টি আকৰ্ষণ কৰিছে । বিজ্ঞানীসকলে কয় যে এই উপলব্ধিয়ে অঞ্চলটোৰ পাৰিপাৰ্শ্বিক গুৰুত্বক আলোকপাত কৰিছে, যি বিশ্বজুৰি গুৰুত্বপূৰ্ণ ইণ্ডো-বাৰ্মা জৈৱ-বৈচিত্ৰ্য হটস্পটৰ অংশ ।
নতুনকৈ চিনাক্ত কৰা এই প্ৰজাতিটো ‘চাইৰ্ট’ডেক্টাইলাছ’ বংশৰ অন্তৰ্ভুক্ত, যিটো দক্ষিণ আৰু দক্ষিণ-পূব এছিয়াত বিস্তৃত জেঠীৰ অন্যতম বিচিত্ৰ গোট । অধ্যয়নটোৰ সৈতে জড়িত গৱেষকসকলে উল্লেখ কৰিছে যে ‘চাইৰ্ট’ডেক্টাইলাছ ৰাইমনাএনছিছ’ৰ সুকীয়া শাৰীৰিক গঠনৰ বৈশিষ্ট্য আছে যিবোৰে ইয়াক আন জ্ঞাত প্ৰজাতিৰ পৰা স্পষ্টভাৱে পৃথক কৰে । ভাৰতৰ সৰীসৃপ প্ৰাণীজগতৰ বাবে ই এক গুৰুত্বপূৰ্ণ সংযোজন হিচাপে বিবেচিত হৈছে ।
ৰাইমনা ৰাষ্ট্ৰীয় উদ্যানৰ আশে-পাশে থকা অৰণ্যসমূহ ঘন উদ্ভিদ আৰু বিচিত্ৰ অণুপৰিৱেশৰ বাবে জনাজাত, যিয়ে এনে দুৰ্লভ আৰু কম পৰিচিত প্ৰজাতিসমূহৰ জীয়াই থকাৰ বাবে অনুকূল পৰিৱেশ প্ৰদান কৰে । বিজ্ঞানীসকলে বিশ্বাস কৰে যে এই অঞ্চলত আজিও বিশাল জৈৱিক সম্পদ লুকাই আছে যাৰ নথিভুক্তিকৰণ হোৱাটো বাকী আছে ।
উল্লেখ্য যে, ২০২১ চনত ৰাষ্ট্ৰীয় উদ্যান হিচাপে ঘোষিত ৰাইমনা অসমৰ অন্যতম নতুন সুৰক্ষিত অঞ্চল । তেতিয়াৰ পৰাই ইয়াৰ চহকী উদ্ভিদ আৰু প্ৰাণীজগতৰ লগতে কেইবাটাও বিৰল তথা থলুৱা প্ৰজাতিৰ বাবে উদ্যানখনে সংৰক্ষণবিদ আৰু গৱেষকসকলৰ ক্ৰমাগত মনোযোগ আকৰ্ষণ কৰি আহিছে ।
লগতে পঢ়ক : সলনি হ’ব হাইস্কুল শিক্ষান্ত পৰীক্ষাৰ ফলাফলৰ নিয়ম, কম্পাৰ্টমেণ্টেল পৰীক্ষাৰো বিলুপ্তি
