IOC-ৰ কাৰ্যবাহী ব’ৰ্ডৰ অনুমোদনৰ পিছত LA অলিম্পিক ২০২৮-ৰ বাবে ক্ৰিকেটৰ যোগ্যতা নিৰ্ণয় প্ৰণালী আনুষ্ঠানিকভাৱে প্ৰকাশ কৰা হৈছে বুলি Olympics.com-এ প্ৰকাশ কৰিছে
আন্তৰ্জাতিক অলিম্পিক সমিতিৰ (IOC) কাৰ্যবাহী ব’ৰ্ডৰ অনুমোদনৰ পিছত লছ এঞ্জেলছ অলিম্পিক ২০২৮-ৰ বাবে ক্ৰিকেটৰ যোগ্যতা নিৰ্ণয় প্ৰণালী আনুষ্ঠানিকভাৱে প্ৰকাশ কৰা হৈছে । Olympics.com-এ প্ৰকাশ কৰিছে এই তথ্য ।এই ঐতিহাসিক ঘোষণাই ক্ৰিকেট অনুৰাগীসকলৰ মাজত নতুন আশাৰ সঞ্চাৰ কৰিছে ।
১২৮ বছৰৰ পিছত অলিম্পিকলৈ ক্ৰিকেটৰ প্ৰত্যাৱৰ্তন-
প্ৰায় ১২৮ বছৰৰ বিৰতিৰ অন্তত পুনৰবাৰ অলিম্পিকৰ মঞ্চত ক্ৰিকেটে নিজৰ স্থান দখল কৰিবলৈ সাজু হৈছে । ১৯০০ চনৰ পেৰিছ অলিম্পিকৰ পিছত এইবাৰ LA28-ত ক্ৰিকেটক অন্তৰ্ভুক্ত কৰা হৈছে । এই ইভেণ্টত পুৰুষ আৰু মহিলাৰ বাবে পৃথককৈ টি-২০ প্ৰতিযোগিতা অনুষ্ঠিত হ’ব ।
প্ৰতিযোগিতাৰ মূল নীতিসমূহ :
দলৰ সংখ্যা: পুৰুষ আৰু মহিলা উভয় শাখাতে ৬টাকৈ দলে অংশগ্ৰহণ কৰিব ।
খেলুৱৈৰ সংখ্যা: প্ৰতিটো দলত সৰ্বাধিক ১৫ জন খেলুৱৈ থাকিব পাৰিব ।
কোটা: পুৰুষ আৰু মহিলা দুয়োটা টুৰ্ণামেন্টৰ বাবে ৯০ টাকৈ খেলুৱৈৰ কোটা নিৰ্ধাৰণ কৰা হৈছে ।
মুঠ মেচ: এই দুটা ইভেণ্টত মুঠ ২৮ খন মেচ অনুষ্ঠিত হ’ব ।
অন্যান্য ক্ৰীড়াৰ যোগ্যতা নিৰ্ণয় প্ৰণালী
LA গেমছৰ বাবে এতিয়ালৈকে ৪৯টা ক্ৰীড়া শাখাৰ যোগ্যতা নিৰ্ণয় প্ৰণালী অনুমোদন কৰা হৈছে । শেহতীয়াকৈ মে’ মাহত বক্সিং আৰু ৱাটাৰ পোলোৰ বাবেও অনুমোদন পোৱা গৈছে । সম্প্ৰতি কেৱল এথলেটিক্স আৰু ফুটবলৰ যোগ্যতা নিৰ্ণয় প্ৰণালী ঘোষণা হ’বলৈ বাকী আছে, যিকেইটা অহা কেইদিনমানৰ ভিতৰতে প্ৰকাশ পাব বুলি আশা কৰা হৈছে ।
ইফালে, ছাৰ্ফিঙৰ যোগ্যতা নিৰ্ণয় প্ৰণালীত কিছু সালসলনি অনা হৈছে । আন্তৰ্জাতিক ছাৰ্ফিঙ সংস্থা আৰু ৱৰ্ল্ড ছাৰ্ফ লীগৰ উদ্যোগত হ’বলগীয়া প্ৰতিযোগিতাসমূহৰ স্থান বিতৰণৰ ক্ষেত্ৰত এই পৰিৱৰ্তন কৰা হৈছে, যাতে বিশ্বৰ শীৰ্ষস্থানীয় খেলুৱৈসকলে অংশগ্ৰহণৰ সমান সুযোগ লাভ কৰে ।
প্ৰস্তুতি আৰু ভৱিষ্যত
LA28-ৰ যোগ্যতা নিৰ্ণয় প্ৰক্ৰিয়া ২০২৬ চনৰ পৰা ২০২৮ চনলৈ চলিব । অলিম্পিক চাৰ্টাৰ অনুসৰি প্ৰতিটো আন্তৰ্জাতিক ফেডাৰেচনক নিজৰ খেলৰ বাবে যোগ্যতা নিৰ্ণয়ৰ মাপকাঠি প্ৰস্তুত কৰাৰ দায়িত্ব দিয়া হৈছে । এই নতুন প্ৰণালীৰ মূল উদ্দেশ্য হৈছে খেলুৱৈসকলক যোগ্যতা অৰ্জনৰ বাবে একাধিক সুযোগ প্ৰদান কৰা আৰু বিশ্বব্যাপী ক্ৰীড়াৰ প্ৰতিনিধিত্ব বৃদ্ধি কৰা ।
২০২৫ চনৰ মাৰ্চ মাহত IOC কাৰ্যবাহী ব’ৰ্ডৰ দ্বাৰা অনুমোদিত ‘কোৱালিফিকেচন ছিষ্টেম প্ৰিন্সিপলছ’-ৰ আধাৰতেই এই সকলোবোৰ প্ৰস্তুত কৰা হৈছে ।
লগতে পঢ়ক : স্বপ্ন ভংগ… মহিলা টি-২০ বিশ্বকাপত অন্ত পৰিল ভাৰতীয় দলৰ যাত্ৰা
