ভাৰতীয় সেনাৰ বৃহৎ প্ৰস্তুতি
ভাৰতীয় বায়ুসেনাই ১৩ নৱেম্বৰৰ পৰা ২০ নৱেম্বৰলৈ উত্তৰ-পূব ভাৰতত বৃহৎ পৰিসৰৰ সামৰিক অনুশীলন চলোৱাৰ কথা । চীন, ভূটান, ম্যানমাৰ, বাংলাদেশৰ সৈতে ভাৰতৰ সীমান্তৰ সমীপৰ স্পৰ্শকাতৰ অঞ্চলত এই অনুশীলন অনুষ্ঠিত হ’ব । চুখই-৩০ এম কে আই, ৰাফেল, মিৰাজ-২০০০, তেজছ আৰু জাগুৱাৰৰ দৰে যুদ্ধ বিমানে এই অনুশীলনত অংশগ্ৰহণ কৰিব, লগতে বায়ু প্ৰতিৰক্ষা ব্যৱস্থা আৰু ইনিফাইড ডিফেন্স চিষ্টেমেও অংশগ্ৰহণ কৰিব ।
প্ৰকাশিত এক প্ৰতিবেদন অনুসৰি ভাৰতীয় বায়ুসেনাই অসামৰিক বিমানৰ সুৰক্ষা নিশ্চিত কৰাৰ বাবে উত্তৰ-পূব অঞ্চল সামৰি NOTAM (Notice to Airmen) জাৰি কৰিছে । অৰ্থাৎ এই সময়ছোৱাত কেইবাটাও আকাশমাৰ্গ অঞ্চলত অসামৰিক বিমানসমূহ ডাইভাৰ্ট কৰা হ’ব বা সীমিতভাৱে চলিব । এই সামৰিক অনুশীলনৰ লক্ষ্য হৈছে বায়ু আৰু স্থল বাহিনীৰ মাজত সংযুক্ত প্ৰতিক্ৰিয়া অনুশীলনকে ধৰি সীমান্ত অঞ্চলত সামৰ্থ্য পৰীক্ষা কৰা আৰু চাইবাৰ আৰু ইলেক্ট্ৰনিক যুদ্ধ ব্যৱস্থাৰ ফলপ্ৰসূতা মূল্যায়ন কৰা ।
এই যুদ্ধাভ্যাস এনে এটা সময়ত হৈছে যেতিয়া বাংলাদেশৰ নতুন অন্তৱৰ্তীকালীন চৰকাৰ আৰু ভাৰতৰ সম্পৰ্কত জটিলতাই দেখা দিছে । প্ৰধানমন্ত্ৰী শ্বেখ হাছিনাক পদচ্যুত কৰাৰ পিছত শেহতীয়াকৈ অন্তৱৰ্তীকালীন নেতা মহম্মদ ইউনুছে উত্তৰ-পূব ভাৰতক সাঙুৰি এখন ভুল মানচিত্ৰ শ্বেয়াৰ কৰিছিল । প্ৰথমে পাকিস্তানী সেনাৰ জেনেৰেলৰ সৈতে আৰু পিছলৈ তুৰ্কীৰ প্ৰতিনিধি দলৰ সৈতে এই মানচিত্ৰ শ্বেয়াৰ কৰিছিল ইউনুছে । নতুন দিল্লীয়ে ইউনুছৰ এই ধৃষ্টতাক এক গুৰুতৰ কৌশলগত প্ৰত্যাহ্বান হিচাপে চাইছে ।
ইউনুছে চীনক বাংলাদেশৰ সৈতে আলোচনা সম্প্ৰসাৰণৰ বাবে আমন্ত্ৰণ জনাই ভাৰতৰ উত্তৰ-পূবৰ ৰাজ্যসমূহক লেণ্ডলক আখ্যা দি শিলিগুৰি কৰিডৰৰ সংবেদনশীলতাক আন্তৰ্জাতিক আলোচনালৈ আনিছিল, যাক চিকেনছ নেক বুলিও কোৱা হয় । গতিকে উত্তৰ-পূবত ভাৰতীয় বায়ুসেনাৰ এই অনুশীলন কেৱল প্ৰতিৰক্ষা প্ৰস্তুতিৰ অংশই নহয়, ভাৰতে কোনো কাৰণতে নিজৰ সীমান্তৰ নিৰাপত্তাৰ ক্ষেত্ৰত আপোচ নকৰাৰ স্পষ্ট ৰাজনৈতিক বাৰ্তাও ।
পশ্চিম সীমান্তত অপাৰেচন ত্ৰিশূল ২০২৫-
উত্তৰ-পূৰ্বাঞ্চলৰ লগতে ভাৰতৰ পশ্চিম সীমান্তত ভাৰতীয় সেনা, নৌসেনা আৰু বায়ুসেনাৰ যৌথ সামৰিক অনুশীলন ত্ৰিশুল ২০২৫ জাৰি আছে । ৩০ অক্টোবৰৰ পৰা আৰম্ভ হোৱা এই অনুশীলন গুজৰাট আৰু ৰাজস্থানৰ বিস্তৃত অঞ্চল সামৰি ১০ নৱেম্বৰলৈকে চলি থকাৰ কথা । মূল কেন্দ্ৰবিন্দু এলেকাসমূহ হ’ল কচ্চ আৰু ছাৰ ক্ৰিক সীমান্ত অঞ্চল, য’ত ভাৰত আৰু পাকিস্তানৰ মাজত বাৰে বাৰে উত্তেজনা সৃষ্টি হৈছে । এই অনুশীলনৰ সময়ত ভাৰতীয় বাহিনীয়ে যৌথ অভিযান, বাস্তৱ সময়ৰ তথ্য বিনিময় আৰু যুদ্ধৰ সমন্বয়ত নিজৰ সামৰ্থ্য প্ৰদৰ্শন কৰে ।
উল্লেখ্য যে, অনুশীলন ত্ৰিশূল ২০২৫ত টি-৯০ টেংক, প্ৰচণ্ড হেলিকপ্টাৰ, আকাশ মিছাইল চিষ্টেম, ব্ৰাহ্মছ ছুপাৰছনিক মিছাইল, ৰাফেল আৰু ছুখই-৩০ এম কে আইকে ধৰি বিভিন্ন ধৰণৰ সামৰিক সঁজুলি আৰু অস্ত্ৰ ব্যৱহাৰ কৰা হৈছে । লগতে চোৰাংচোৱাগিৰিৰ বাবে নিয়োগ কৰা হৈছে ছি গাৰ্ডিয়ান আৰু হেৰন ড্ৰোন । পশ্চিম উপকূলত মোতায়েন কৰা হৈছে কলকাতা আৰু নীলগিৰি শ্ৰেণীৰ যুদ্ধ জাহাজ । এই অনুশীলনক অপাৰেচন সিন্দুৰৰ পিছত ভাৰতীয় সেনাৰ সৰ্ববৃহৎ সামৰিক কাৰ্যকলাপ বুলি গণ্য কৰা হৈছে, আৰু ইয়াৰ লক্ষ্য হৈছে তিনিওটা সশস্ত্ৰ বাহিনীৰ মাজত যৌথ অভিযানৰ সামৰ্থ্য উন্নীত কৰা ।
লগতে পঢ়ক : যুদ্ধ বিমানৰ শব্দত কঁপিব গুৱাহাটী; বৰলুইতৰ ওপৰত বায়ুসেনাৰ বিশেষ এয়াৰ শ্ব’
