কেন্দ্ৰীয় গৃহমন্ত্ৰী অমিত শ্বাহে ৫ জুনত স্পষ্টকৈ কয় যে পশ্চিম বংগ, ত্ৰিপুৰা আৰু বিহাৰৰ দৰে সীমান্তৱৰ্তী ৰাজ্যসমূহৰ জনগাঁথনিগত পৰিৱৰ্তন কেন্দ্ৰই সহ্য নকৰে।
কেন্দ্ৰীয় গৃহমন্ত্ৰী অমিত শ্বাহ ত্ৰিপুৰা ভ্ৰমণৰ কাৰ্যসূচীৰ সময়ত ভাৰত-বাংলাদেশ সীমান্তত নিয়োজিত বি এছ এফ জোৱানসকলৰ সৈতে মতবিনিময় কৰে। এই সময়ত গৃহমন্ত্ৰীগৰাকীয়ে স্পষ্টকৈ কয় যে কেন্দ্ৰীয় চৰকাৰে পশ্চিম বংগ, ত্ৰিপুৰা আৰু বিহাৰৰ দৰে সীমান্তৱৰ্তী ৰাজ্যসমূহৰ জনগাঁথনিগত পৰিৱৰ্তন কোনো কাৰণতে সহ্য নকৰে। ইয়াৰ লগতে তেওঁ উন্নত প্ৰযুক্তি আৰু বৰ্ধিত তদাৰকী ব্যৱস্থাৰ জৰিয়তে সীমান্তৰ সুৰক্ষা শক্তিশালী কৰাৰ বাবে চৰকাৰৰ প্ৰতিশ্ৰুতি পুনৰবাৰ দোহাৰে।
ত্ৰিপুৰাৰ লংকামূৰা সীমান্ত চকীত সীমান্ত সুৰক্ষা বাহিনী (BSF)ৰ জোৱানসকলক সম্বোধন কৰি গৃহমন্ত্ৰী গৰাকীয়ে কয় যে চৰকাৰে ভাৰতৰ আন্তঃৰাষ্ট্ৰীয় সীমান্তৰ দুৰ্বলতাসমূহ দূৰ কৰিবলৈ আৰু অবৈধ অনুপ্ৰৱেশ ৰোধ কৰিবলৈ সকলো প্ৰয়োজনীয় পদক্ষেপ গ্ৰহণ কৰিছে।
গৃহমন্ত্ৰীগৰাকীয়ে কয়, “পশ্চিম বংগ, ত্ৰিপুৰা আৰু বিহাৰৰ জনগাঁথনিগত পৰিৱৰ্তন সহ্য কৰা নহ’ব। আন্তঃৰাষ্ট্ৰীয় সীমান্ত পহৰা দিয়াৰ ক্ষেত্ৰত থকা সুৰুঙাসমূহ দূৰ কৰিবলৈ কেন্দ্ৰই সকলো ধৰণৰ প্ৰচেষ্টা চলাইছে।”
শ্বাহে লগতে ঘোষণা কৰে যে চৰকাৰৰ অভিলাষী ‘স্মাৰ্ট বৰ্ডাৰ’ প্ৰকল্পটো এতিয়া চূড়ান্ত পৰ্যায়ত উপনীত হৈছে আৰু অতি শীঘ্ৰেই দেশৰ কেইবাটাও স্থানত ইয়াক পৰীক্ষামূলকভাৱে কাৰ্যকৰী কৰা হ’ব।
গৃহমন্ত্ৰী গৰাকীৰ মতে, সংবেদনশীল সীমান্ত অঞ্চলসমূহত অধিক কাৰ্যকৰী আৰু ক্ষিপ্ৰ নিৰাপত্তা ব্যৱস্থা গঢ়ি তুলিবলৈ এই স্মাৰ্ট বৰ্ডাৰ উদ্যোগে অত্যাধুনিক প্ৰযুক্তি, স্থানীয় প্ৰশাসনিক সহযোগিতা আৰু সীমান্ত সুৰক্ষা কৰ্মীসকলক একত্ৰিত কৰিব।
তেওঁ কয়, “দেশৰ সাতৰ পৰা আঠখন ঠাইত পাইলট প্ৰজেক্ট হিচাপে এই স্মাৰ্ট বৰ্ডাৰৰ ধাৰণাটো কাৰ্যকৰী কৰা হ’ব।”
বিশেষকৈ আন্তঃৰাষ্ট্ৰীয় সীমান্ত থকা ৰাজ্যসমূহৰ সীমান্ত অঞ্চলত অবৈধ অনুপ্ৰৱেশ, সীমান্তৰ সিপাৰৰ অপৰাধ আৰু নিৰাপত্তাজনিত প্ৰত্যাহ্বানৰ সৃষ্টি হোৱা গভীৰ উদ্বেগৰ মাজতে গৃহমন্ত্ৰীগৰাকীয়ে এই মন্তব্য কৰে।
ৰাষ্ট্ৰীয় নিৰাপত্তা শক্তিশালী কৰিবলৈ আৰু অবৈধ সীমান্ত পাৰাপাৰ ৰোধ কৰিবলৈ কেন্দ্ৰীয় চৰকাৰে উন্নত তদাৰকী ব্যৱস্থা, স্মাৰ্ট ফেঞ্চিং (স্মাৰ্ট বেৰা) আৰু সুৰক্ষা সংস্থাসমূহৰ মাজত উন্নত সমন্বয়ৰ জৰিয়তে সীমান্ত ব্যৱস্থাপনাৰ আধুনিকীকৰণৰ ওপৰত গুৰুত্ব আৰোপ কৰি আহিছে।
