বাণিজ্যিক এলপিজি যোগানৰ ওপৰত সাময়িক নিষেধাজ্ঞাসমূহ অৱশেষত প্ৰত্যাহাৰ কৰাৰ সিদ্ধান্ত লৈছে ভাৰত চৰকাৰে
দেশৰ ব্যৱসায়ী তথা উদ্যোগ খণ্ডলৈ এক ডাঙৰ সকাহৰ খবৰ । পশ্চিম এছিয়াৰ সাম্প্ৰতিক সংকটৰ বাবে বাণিজ্যিক এলপিজি যোগানৰ ওপৰত জাপি দিয়া সাময়িক নিষেধাজ্ঞাসমূহ অৱশেষত প্ৰত্যাহাৰ কৰাৰ সিদ্ধান্ত লৈছে ভাৰত চৰকাৰে । কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰালয়ৰ শেহতীয়া এক পৰ্যালোচনা বৈঠকৰ অন্তত এই গুৰুত্বপূৰ্ণ সিদ্ধান্ত গ্ৰহণ কৰা হৈছে ।
মন্ত্ৰালয়ৰ সচিব ড° নীৰজ মিত্তলে সকলো ৰাজ্য আৰু কেন্দ্ৰীয় শাসিত অঞ্চলৰ মুখ্য সচিবসকললৈ প্ৰেৰণ কৰা এক চৰকাৰী পত্ৰৰ জৰিয়তে এই ঐতিহাসিক সিদ্ধান্তৰ কথা আনুষ্ঠানিকভাৱে জানিবলৈ দিয়ে ।
ঘৰুৱা গ্ৰাহকৰ সুৰক্ষাৰ বাবে লোৱা হৈছিল পদক্ষেপ
প্ৰেৰিত পত্ৰখনত উল্লেখ কৰা অনুসৰি, পশ্চিম এছিয়াৰ ভূ-ৰাজনৈতিক সংকটৰ বাবে দেশত গেছ যোগান ব্যৱাহত হোৱাৰ এক চৰম আশংকা দেখা দিছিল । সেই সংকটকালত সাধাৰণ ঘৰুৱা গ্ৰাহকসকলক অবিৰতভাৱে এলপিজি যোগান ধৰাটো নিশ্চিত কৰিবলৈ চৰকাৰে সাময়িকভাৱে বাণিজ্যিক পেকেটজাত এলপিজিৰ যোগান সীমিত কৰিছিল ।
বৰ্তমান পৰিস্থিতি পুনৰীক্ষণ কৰি অ-ঘৰুৱা পেকেটজাত এলপিজিৰ যোগানৰ ওপৰত থকা সকলো খণ্ডভিত্তিক প্ৰতিবন্ধকতা সম্পূৰ্ণৰূপে উঠাই দিয়া হৈছে । ইয়াৰ লগে লগে ব্যৱসায়িক খণ্ডত যোগান ব্যৱস্থা সংকট-পূৰ্বৰ স্তৰলৈ পুনঃস্থাপন কৰাৰ নিৰ্দেশ দিয়া হৈছে ।
কেন্দ্ৰীয় চৰকাৰে যোগান ব্যৱস্থা সৰল কৰাৰ লগতে কেইবাটাও নতুন নিৰ্দেশনা জাৰি কৰিছে :
বাল্ক এলপিজি যোগানত শিথিলতা : কেৱল চিলিণ্ডাৰেই নহয়, বাল্ক এলপিজি যোগানৰ ওপৰত থকা নিষেধাজ্ঞাও শিথিল কৰা হৈছে । এতিয়াৰে পৰা গ্ৰাহকে সংকট-পূৰ্ব ব্যৱহাৰ স্তৰৰ ৫০% পৰ্যন্ত বাল্ক এলপিজি পোনপটীয়াকৈ লাভ কৰিব পাৰিব ।
একত্ৰিত কেন্দ্ৰীয় তথ্যভাণ্ডাৰ : ক’লা বজাৰ বন্ধ কৰা আৰু স্বচ্ছতা অনাৰ উদ্দেশ্যে দেশৰ তিনিওটা চৰকাৰী তেল বিপণন কোম্পানীয়ে (IOCL, HPCL, BPCL) সকলো বাণিজ্যিক আৰু ঔদ্যোগিক গ্ৰাহকৰ তথ্য নিজৰ ডাটাবেছত সংৰক্ষণ কৰিব লাগিব । সমগ্ৰ খণ্ডটোৰ বাবে এটা একত্ৰিত কেন্দ্ৰীয় তথ্যভাণ্ডাৰো ৰক্ষণাবেক্ষণ কৰা হ’ব ।
পিএনজি ব্যৱহাৰত বিশেষ গুৰুত্ব : যিসকল বাণিজ্যিক বা বাল্ক গ্ৰাহকে ইতিমধ্যে পাইপলাইন প্ৰাকৃতিক গেছ সংযোগলৈ স্থানান্তৰিত হৈছে, তেওঁলোকে পুনৰ এলপিজিলৈ ঘূৰি আহিব নোৱাৰিব, অৰ্থাৎ পিএনজিতেই থাকিব লাগিব ।
স্থানীয় গ্ৰাহকলৈ আহ্বান : যিবোৰ অঞ্চলত পিএনজিৰ স্থানীয় নেটৱৰ্ক বা পাইপলাইন উপলব্ধ আছে, সেই অঞ্চলৰ বাণিজ্যিক এলপিজি গ্ৰাহকসকলক স্থায়ীভাৱে পিএনজিলৈ স্থানান্তৰিত হ’বলৈ চৰকাৰে উৎসাহিত কৰিব ।
হোটেল আৰু উদ্যোগ খণ্ড লাভান্বিত হ’ব
কেন্দ্ৰীয় মন্ত্ৰালয়ে তেল বিপণন কোম্পানী আৰু চহৰ গেছ বিতৰণ সংস্থাসমূহক যৌথভাৱে কাম কৰি এই স্থানান্তৰ প্ৰক্ৰিয়া ক্ষিপ্ৰ কৰিবলৈ নিৰ্দেশ দিছে । এই সমগ্ৰ প্ৰক্ৰিয়াৰ অগ্ৰগতিৰ বুজ ল’বলৈ মন্ত্ৰালয়ে নিয়মীয়া প্ৰতিবেদনো তলব কৰিব ।
চৰকাৰৰ এই নতুন সিদ্ধান্তৰ ফলত দেশৰ লগতে অসমৰো হোটেল-ৰেস্তোৰাঁ, কেটাৰিং ব্যৱসায় আৰু মজলীয়া তথা ক্ষুদ্ৰ উদ্যোগ খণ্ডই কেঁচা সামগ্ৰীৰ যোগানৰ ক্ষেত্ৰত যথেষ্ট সকাহ পাব বুলি আশা কৰা হৈছে ।
লগতে পঢ়ক : পুনৰ বাঢ়িল ঘৰুৱা চিলিণ্ডাৰৰ দাম : আজিৰ পৰা কাৰ্যকৰী হ’ব নতুন দৰ
