কেৰালাত বাওঁপন্থীৰ অক্ষত দুৰ্গত মোক্ষম আঘাত, অভিনন্দন জনালে প্ৰধানমন্ত্ৰী মোদীয়ে

তিৰুৱনন্তপুৰমত বাওঁ শিবিৰক ওফৰাই ঐতিহাসিক জয় সাব্যস্ত কৰিছে বিজেপিয়ে । এই জয়ৰ বাবে প্ৰধানমন্ত্ৰী মোদীয়ে জনসাধাৰণক অভিনন্দন জ্ঞাপন কৰিছে ।

কেৰালাৰ স্থানীয় নিকায় নিৰ্বাচনৰ ফলাফলত ভাৰতীয় জনতা পাৰ্টিয়ে তিৰুৱনন্তপুৰম পৌৰ নিগমত ঐতিহাসিক জয় সাব্যস্ত কৰিছে । চাৰি দশক ধৰি বাওঁ গণতান্ত্ৰিক মৰ্চাৰ দুৰ্গ তিৰুৱনন্তপুৰমত বিজেপিয়ে এই ঐতিহাসিক বিজয় সাব্যস্ত কৰিবলৈ সক্ষম হৈছে । বিজেপিৰ এই প্ৰদৰ্শনে কেৰালা বিধানসভা নিৰ্বাচনৰ পূৰ্বে ৰাজ্যখনত এক ৰাজনৈতিক ধুমুহাৰ সৃষ্টি কৰিছে । এই ঐতিহাসিক বিজয়ৰ বাবে প্ৰধানমন্ত্ৰী নৰেন্দ্ৰ মোদীয়ে বিজেপিক অভিনন্দন জ্ঞাপন কৰিছে ।

কেৰালাৰ জনসাধাৰণৰ প্ৰতি কৃতজ্ঞতা প্ৰকাশ প্ৰধানমন্ত্ৰী মোদীৰ-

প্ৰধানমন্ত্ৰী মোদীয়ে শনিবাৰে ছ’চিয়েল মিডিয়া প্লেটফৰ্ম এক্সত এটা পোষ্ট শ্বেয়াৰ কৰি তিৰুৱনন্তপুৰমৰ জনসাধাৰণক নিৰ্বাচনী বিজয়ৰ বাবে ধন্যবাদ জনায় । তেওঁ কয়, “কেৰালাৰ স্থানীয় নিকায় নিৰ্বাচনত বিজেপি আৰু এন ডি এৰ প্ৰাৰ্থীক ভোট দিয়া ৰাজ্যখনৰ সকলো জনসাধাৰণৰ প্ৰতি কৃতজ্ঞতা জ্ঞাপন কৰিছো । কেৰালা এতিয়া ইউ ডি এফ আৰু এল ডি এফৰ পৰা বিৰক্ত হৈছে । ৰাজ্যৰ জনসাধাৰণে এতিয়া এন ডি এক একমাত্ৰ বিকল্প হিচাপে দেখিছে যিয়ে সুশাসন প্ৰদান কৰিব পাৰে আৰু সকলোৰে বাবে সুযোগেৰে ভৰা এখন উন্নত কেৰালা গঢ়ি তুলিব পাৰে ।”

আন এটা পোষ্টত প্ৰধানমন্ত্ৰী মোদীয়ে কয়, “ধন্যবাদ, তিৰুৱনন্তপুৰম! তিৰুৱনন্তপুৰম পৌৰ নিগমত বিজেপি-এনডিএক দিয়া আদেশ কেৰালাৰ ৰাজনীতিত এক ঐতিহাসিক টাৰ্নিং পইণ্ট । জনসাধাৰণৰ সম্পূৰ্ণ আস্থা আছে যে কেৱল আমাৰ দলেহে ৰাজ্যখনৰ উন্নয়নৰ আকাংক্ষা পূৰণ কৰিব পাৰিব । আমাৰ দলে এই সজীৱ চহৰখনৰ উন্নয়ন আৰু জনসাধাৰণৰ জীৱন-যাপনৰ সুচল উন্নত কৰাৰ বাবে অধ্যৱসায়ীভাৱে কাম কৰিব ।”

দলীয় কৰ্মীক অভিনন্দন-

লগতে প্ৰধানমন্ত্ৰী মোদীয়ে কয়, “তিৰুৱনন্তপুৰম পৌৰ নিগমৰ এক দৰ্শনীয় নিৰ্বাচনী ফলাফল নিশ্চিত কৰাৰ বাবে জনসাধাৰণৰ মাজত কাম কৰা সকলো কঠোৰ পৰিশ্ৰমী বিজেপি কৰ্মীলৈ মই কৃতজ্ঞতা আৰু অভিনন্দন জ্ঞাপন কৰিছো । আজি কেৰালাত প্ৰজন্ম ধৰি তৃণমূল পৰ্যায়ত কাম কৰি অহা কৰ্মীসকলৰ কঠোৰ পৰিশ্ৰম আৰু সংগ্ৰামক স্মৰণ কৰাৰ দিন আৰু তেওঁলোকৰ বাবেই এই ফলাফল সম্ভৱ হৈছে ।” তেওঁ কয় যে আমাৰ কৰ্মীসকল আমাৰ শক্তি আৰু তেওঁলোকৰ বাবে আমি গৌৰৱান্বিত ।

কেৰালাত বাওঁ শিবিৰৰ বৃহৎ বিপৰ্যয়-

কেৰালাৰ ৰাজধানী তিৰুৱনন্তপুৰমত স্থানীয় সংস্থাৰ নিৰ্বাচনত ভাৰতীয় জনতা পাৰ্টি আৰু এন ডি এৰ প্ৰাৰ্থীৰ বিজয়ক চাৰি দশকৰো অধিক সময় ইয়াত ক্ষমতা দখল কৰা বাওঁপন্থী দলসমূহৰ বাবে এক বৃহৎ ৰাজনৈতিক আঘাত হিচাপে বিবেচিত হৈছে । কংগ্ৰেছ দলৰ বাবেও ই এক বিপৰ্যয়ৰ প্ৰতিনিধিত্ব কৰে, কিয়নো কংগ্ৰেছ নেতা শশী থাৰুৰে তিৰুৱনন্তপুৰম লোকসভা আসনৰ পৰা একেৰাহে চাৰিটা কাৰ্যকালৰ বাবে সাংসদ নিৰ্বাচিত হৈছে ।

লগতে পঢ়ক : ইভিএম নহয়, হৃদয় হেক কৰে প্ৰধানমন্ত্ৰী মোদীয়ে… লোকসভাত গৰজি উঠিল কংগনা ৰানাৱট