বিৰোধীৰ অভিযোগক লৈ সংসদত গৰজি উঠিল সাসংদ আৰু অভিনেত্ৰী কংগনা ৰানাৱট । তেওঁ প্ৰধানমন্ত্ৰী মোদীয়ে ইভিএম নহয়, হৃদয় হেক কৰে বুলি বিৰোধীক প্ৰত্যুত্তৰ দিয়ে ।
সংসদত নিৰ্বাচনী সংস্কাৰৰ বিতৰ্কৰ সময়ত বিজেপি সাংসদ তথা অভিনেত্ৰী কংগনা ৰানাৱটে কয় যে প্ৰধানমন্ত্ৰী নৰেন্দ্ৰ মোদীয়ে ইভিএম হেক নকৰে, বৰঞ্চ মানুহৰ হৃদয় হেক কৰে । বিৰোধী দলৰ অভিযোগৰ প্ৰতিক্ৰিয়া প্ৰকাশ কৰি কংগনা ৰানাৱটে এই মন্তব্য কৰে ।
৯ ডিচেম্বৰত লোকসভাত নিৰ্বাচনী সংস্কাৰৰ বিতৰ্ক আৰম্ভ হয় । ইভিএমৰ ওপৰত জনসাধাৰণৰ সন্দেহ বেলট পেপাৰেৰে সমাধান কৰিব লাগে বুলি যুক্তি দি কংগ্ৰেছ দলে ইভিএমৰ খেলিমেলিৰ বিষয়টো উত্থাপন কৰে । তদুপৰি নিৰ্বাচন আয়োগৰ গোপন বুজাবুজিৰ অভিযোগ উত্থাপন কৰি মোদী চৰকাৰ আৰু বিজেপিক সমালোচনা কৰি নিৰ্বাচনী সংস্কাৰৰ বিতৰ্কৰ সময়ত বিৰোধী দলৰ নেতা ৰাহুল গান্ধীয়েও ভাষণ দিয়ে ।
বুধবাৰে লোকসভাত হিমাচল প্ৰদেশৰ মাণ্ডীৰ বিজেপি সাংসদ আৰু অভিনেত্ৰী কংগনা ৰানাৱটেও এই বিষয়ত ভাষণ দিয়ে । ৰাহুল গান্ধীক লক্ষ্য কৰি তেওঁ লগতে কয় যে প্ৰধানমন্ত্ৰী মোদীয়ে ইভিএম হেক নকৰে, বৰঞ্চ মানুহৰ হৃদয় হেক কৰে ।
কংগ্ৰেছ দলৰ বিৰুদ্ধে কংগনাই কয়, “এই লোকসকলে দাবী কৰে যে আগৰ দিনত ভোট দিয়াটোৱেই আছিল সৰ্বোত্তম । তেতিয়া ৰিগিং হৈছিল; এই লোকসকলে বেলট বাকচ চুৰি কৰিছিল ।”
বিৰোধী পক্ষক আক্ৰমণ কৰি বিজেপিৰ সাংসদ কংগনা ৰানাৱটে কয় যে, ‘SIR, SIR,SIR’ বুলি চিঞৰি প্ৰতিদিনে হুলস্থুলৰ সৃষ্টি কৰিছে । তেওঁলোকক চাই দুখ লাগি যায় । কালি ৰাহুল গান্ধীয়ে ভাষণত একেটা কথাকে আওৰাই থাকিল । অৱশেষত তেওঁলোক এগৰাকী বিদেশী মহিলাৰ ফটোক লৈ বিতৰ্ক কৰে । তেওঁ নিজেই বহুবাৰ উল্লেখ কৰিছে যে তেওঁ কেতিয়াও ভাৰতলৈ অহা নাই । তেওঁৰ ফটোখন প্লে কাৰ্ডত ব্যৱহাৰ কৰিছিল । তেওঁৰ ব্যক্তিত্বৰ অধিকাৰক আওকাণ কৰিলে । ইয়াৰ বাবে সংসদৰ হৈ মই ক্ষমা বিচাৰিছো ।“
