মঙলবাৰে সৰ্বসাধাৰণৰ বাবে মুকলি কৰা হ’ব অসমৰ দীৰ্ঘতম উৰণ সেতু মহাৰাজ পৃথু (দীঘলীপুখুৰী-নুনমাটি সংযোগী) উৰণ সেতু
গুৱাহাটীৰ সদা ব্যস্ত যাতায়ত ব্যৱস্থালৈ এক বৃহৎ পৰিৱৰ্তন আনি ১০ মাৰ্চ, মঙলবাৰে সৰ্বসাধাৰণৰ বাবে মুকলি কৰা হ’ব অসমৰ দীৰ্ঘতম উৰণ সেতু ‘মহাৰাজ পৃথু উৰণ সেতু’ । প্ৰায় ৫.৫ কিলোমিটাৰ দৈৰ্ঘ্যৰ এই উৰণ সেতুখনে নুনমাটিক দীঘলীপুখুৰীৰ সৈতে সংযোগ কৰিব আৰু চহৰখনৰ অন্যতম ব্যস্ত পথটোত যান-জঁটৰ সমস্যা যথেষ্ট পৰিমাণে হ্ৰাস কৰিব বুলি আশা কৰা হৈছে ।
উল্লেখ্য যে, চাৰি লেনযুক্ত এই উৰণ সেতুখনৰ নিৰ্মাণ ব্যয় হৈছে প্ৰায় ৮৫০ কোটি টকা । ২০২৩ চনৰ শেষৰ ফালে আৰম্ভ হোৱা এই উৰণ সেতুৰ কাম প্ৰায় ১৮ মাহৰ ভিতৰত সম্পূৰ্ণ হৈ উঠে । ১২২টা খুটাৰ ওপৰত এই বিশাল উৰণ সেতুখন নিৰ্মাণ কৰা হৈছে ।
এই উৰণ সেতুখনে চহৰখনৰ পূব অংশ (নুনমাটি) আৰু কেন্দ্ৰীয় অংশক (দীঘলীপুখুৰী) সংযোগ কৰিব । এই পথছোৱাৰ ভিতৰত আমবাৰী আৰু বামুণীমৈদানৰ দৰে কেইবাটাও গুৰুত্বপূৰ্ণ অঞ্চল অন্তৰ্ভুক্ত হৈ আছে । কৰ্তৃপক্ষৰ মতে, প্ৰায়ে সৃষ্টি হোৱা তীব্ৰ যান-জঁটৰ পৰা ই যাত্ৰীসকলক সকাহ দিব ।
উল্লেখ্য যে, ৰাজ্যৰ ঐতিহাসিক ঐতিহ্যৰ সৈতে জড়িত প্ৰাচীন শাসক মহাৰাজ পৃথুৰ নামেৰে এই উৰণ সেতুখনৰ নামকৰণ কৰা হৈছে । এই নামকৰণৰ জৰিয়তে অসমৰ সাংস্কৃতিক অতীতক সন্মান জনোৱাৰ লগতে গুৱাহাটীৰ আন্তঃগাঁথনি উন্নয়নত এক নতুন দিশ সংযোজন কৰিছে ।
লগতে পঢ়ক : পতাকা উত্তোলন কাৰ্যসূচীতে সীমিত থাকিব আনুষ্ঠানিকাত, চেপনত উদযাপন নহয় বিহু
