প্ৰচণ্ড গৰমৰ প্ৰতি লক্ষ্য ৰাখি মুখ্যমন্ত্ৰীয়ে ৰাজ্যবাসীক প্ৰয়োজনীয় সাৱধানতা অৱলম্বন কৰিবলৈ আহ্বান জনায়
উৎকট গৰমে দহিছে ৰাজ্যবাসীক । অসহনীয়া গৰমৰ বাবে ৰাজ্যত স্বাভাৱিক জীৱন যাত্ৰাটো প্ৰভাৱ পৰা পৰিলক্ষিত হৈছে । বৃদ্ধি পোৱা গৰমৰ প্ৰতি লক্ষ্য ৰাখি মুখ্যমন্ত্ৰী ড০ হিমন্ত বিশ্ব শৰ্মাই শনিবাৰে ৰাজ্যবাসীক প্ৰয়োজনীয় সাৱধানতা অৱলম্বন কৰিবলৈ আহ্বান জনায় । লগতে মুখ্যমন্ত্ৰীগৰাকীয়ে ৰাইজক অতিপাত গৰমৰ বাবে হ’ব পৰা অসুস্থতাৰ পৰা সতৰ্ক হৈ থাকিবলৈ আৰু নিজৰ স্বাস্থ্যক অগ্ৰাধিকাৰ দিবলৈ অনুৰোধ জনায় ।
ফেচবুকত শ্বেয়াৰ কৰা এটা বাৰ্তাত মুখ্যমন্ত্ৰীগৰাকীয়ে কয় যে যোৱা কেইদিনমানৰ পৰা গৰম স্বাভাৱিকতকৈ অধিক তীব্ৰতৰ হৈ পৰিছে । তেওঁ ৰাইজক নিয়মীয়া অন্তৰালত পানী খাই পৰ্যাপ্ত পৰিমাণে হাইড্ৰেটেড হৈ থাকিবলৈ পৰামৰ্শ দিয়ে । বৰ্তমানৰ বতৰৰ পৰিস্থিতিৰ সৈতে মোকাবিলা কৰাত সহায়ক হ’বলৈ তেওঁ ৰাইজক দৈনন্দিন খাদ্য তালিকাত স্থানীয়ভাৱে উপলব্ধ ফল-মূল আৰু প্ৰাকৃতিক পানীয় অন্তৰ্ভুক্ত কৰিবলৈও উৎসাহিত কৰে ।
মুখ্যমন্ত্ৰী ড০ শৰ্মাই লগতে বাহিৰলৈ ওলাই যোৱা লোকসকলক, বিশেষকৈ যিসকলে দিনৰ ভাগত প্ৰখৰ ৰ’দৰ সময়ত কাম কৰিবলগীয়া বা ভ্ৰমণ কৰিবলগীয়া হয়, তেওঁলোকক সাৱধানতা অৱলম্বন কৰিবলৈ পৰামৰ্শ দিয়ে । তেওঁ ৰাইজক প্ৰত্যক্ষ সূৰ্যৰ পোহৰৰ সংস্পৰ্শলৈ অহাৰ পৰা বিৰত থাকিবলৈ আৰু অতিপাত গৰমৰ বাবে হোৱা স্বাস্থ্যজনিত জটিলতাৰ আশংকা হ্ৰাস কৰিবলৈ উপযুক্ত প্ৰতিৰোধমূলক ব্যৱস্থা গ্ৰহণ কৰিবলৈ অনুৰোধ জনায় ।
মুখ্যমন্ত্ৰীগৰাকীয়ে মূৰ ঘূৰোৱা, দুৰ্বলতা বা গৰমৰ বাবে হোৱা অন্য কোনো ধৰণৰ অস্বস্তিৰ লক্ষণ অনুভৱ কৰা লোকসকলক কোনো পলম নকৰাকৈ লগে লগে চিকিৎসাৰ সহায় ল’বলৈ আহ্বান জনায় ।
ৰাজ্যখনৰ স্বাস্থ্যসেৱাৰ আন্তঃগাঁথনিৰ ওপৰত আলোকপাত কৰি ড০ শৰ্মাই কয় যে বিগত বৰ্ষসমূহত অসমৰ চিকিৎসা সেৱা যথেষ্ট উন্নত হৈছে, যাৰ ফলত সমগ্ৰ ৰাজ্যৰে ৰাইজৰ বাবে স্বাস্থ্যসেৱা অধিক সুলভ হৈ পৰিছে । চিকিৎসাৰ প্ৰয়োজন হ’লেই ওচৰৰে স্বাস্থ্য কেন্দ্ৰসমূহলৈ যাবলৈ তেওঁ ৰাইজক কুণ্ঠাবোধ নকৰিবলৈ অনুৰোধ জনায় ।
ৰাইজক আশ্বাস দি মুখ্যমন্ত্ৰীগৰাকীয়ে কয় যে প্ৰয়োজনত থকা সকলো লোককে যাতে সময়মতে আৰু ফলপ্ৰসূ চিকিৎসা প্ৰদান কৰিব পৰা যায়, তাৰ বাবে ৰাজ্য চৰকাৰে স্বাস্থ্যসেৱা অধিক শক্তিশালী কৰিবলৈ সম্পূৰ্ণ প্ৰতিশ্ৰুতিবদ্ধ ।
লগতে পঢ়ক : ভাৰতৰ ভিতৰতে প্ৰথম: অসমত আৰম্ভ হ’ল বিশ্ববিখ্যাত ‘মাচ্চা চাহ’ৰ বাণিজ্যিক উৎপাদন
