ধাৰাসাৰ বৰষুণৰ পাছত হোৱা এক বৃহৎ ডাৱৰ বিস্ফোৰণে জিলাখনত নতুনকৈ আকস্মিক বানৰ সৃষ্টি কৰিছে
অৰুণাচল প্ৰদেশত প্ৰকৃতিৰ ৰুদ্ৰৰূপে চৰম বিপৰ্যয় কঢ়িয়াই আনিছে । কেই পান্যৰ জিলাত ডাৱৰ বিস্ফোৰণৰ ফলত হোৱা আকস্মিক বানে কেইবাখনো গাঁও ধ্বংস কৰা মৰ্মান্তিক ঘটনাৰ ২০ দিন নৌহওঁতেই, সোমবাৰে কুৰুং কুমেই জিলাত প্ৰকৃতিৰ আন এক ভয়ংকৰ তাণ্ডৱ দেখিবলৈ পোৱা গৈছে । ধাৰাসাৰ বৰষুণৰ পাছত হোৱা এক বৃহৎ ডাৱৰ বিস্ফোৰণে জিলাখনত নতুনকৈ আকস্মিক বানৰ সৃষ্টি কৰিছে, যাৰ ফলত স্বাভাৱিক জীৱনযাত্ৰা সম্পূৰ্ণ ব্যাহত হোৱাৰ লগতে ব্যাপক আন্তঃগাঁথনি ধ্বংস হৈছে ।
ফেনে-ফোটোকাৰে বাঢ়িছে কুমেই নদী, উটি গৈছে ঘৰ-দুৱাৰ
প্ৰত্যক্ষদৰ্শীৰ মতে, ধাৰাবাহিক বৰষুণৰ বাবে কুমেই নদীৰ পানী বিপদসীমাৰ ওপৰেৰে বৈ গৈছে আৰু ইয়াৰ পাৰ বাগৰি প্লাৱিত কৰিছে বিস্তীৰ্ণ অঞ্চল । বানৰ প্ৰবল সোঁতে আক্ৰান্ত অঞ্চলসমূহৰ বাট-পথ, দলং আৰু কেইবাটাও আৱাস গৃহ উটুৱাই লৈ গৈছে । এটা গুৰুত্বপূৰ্ণ দলং খহি পৰাৰ ফলত ভাৰত-তিব্বত সীমান্ত আৰক্ষীৰ এটা শিবিৰৰ সৈতে পথ যোগাযোগ সম্পূৰ্ণ বিচ্ছিন্ন হৈ পৰিছে আৰু তাত কৰ্তব্যৰত জোৱানসকল আৱদ্ধ হৈ পৰিছে ।
১৫ জনীয়া আইটিবিপি জোৱানৰ সৈতে যোগাযোগ বিছিন্ন
সবাতোকৈ চিন্তাজনক কথাটো হৈছে যে, ভাৰত-চীন সীমান্তৰ প্ৰকৃত নিয়ন্ত্ৰণ ৰেখাৰ নিচেই কাষত অৱস্থিত দামিন চাৰ্কেলৰ অধীনস্থ তপা সীমান্ত চকীত নিয়োজিত ১৫ জনীয়া এটা আইটিবিপি দলৰ সৈতে বৰ্তমান যোগাযোগ সম্পূৰ্ণৰূপে বিছিন্ন হৈ পৰিছে । ডাৱৰ বিস্ফোৰণ আৰু আকস্মিক বানপানীয়ে সমগ্ৰ অঞ্চলটো বিধ্বস্ত কৰাৰ বাবেই এই যোগাযোগ ব্যৱস্থা ব্যাহত হোৱা বুলি জানিব পৰা গৈছে ।
উদ্ধাৰ কাৰ্যত প্ৰতিকূল বতৰৰ প্ৰাচীৰ
বানৰ সংহাৰে কেইবাখনো গাঁও জিলা সদৰৰ পৰা বিছিন্ন কৰি পেলোৱাৰ বাবে উদ্ধাৰ আৰু সাহায্য কাৰ্যত তীব্ৰ বাধাৰ সৃষ্টি হৈছে । কুমেই নদীৰ জলস্তৰ ধাৰাবাহিকভাৱে বৃদ্ধি পাই থকা বাবে অধিক বানৰ আশংকাত অসুৰক্ষিত অঞ্চলৰ বাসিন্দাসকলে নিজৰ ঘৰ-দুৱাৰ এৰি উচ্চ স্থানত আশ্ৰয় লৈছে । অৱশ্যে বৰ্তমানলৈকে কোনো লোকৰ মৃত্যু হোৱাৰ চৰকাৰী খবৰ অহা নাই ।
প্ৰশাসনৰ তৰফৰ পৰা জনোৱা হৈছে যে আৱদ্ধ হৈ থকা জোৱানসকলৰ সৈতে যোগাযোগ স্থাপনৰ বাবে এটা প্ৰশাসনিক দলে তালাচী আৰু উদ্ধাৰ অভিযান আৰম্ভ কৰাৰ পূৰ্ণ প্ৰস্তুতি চলাইছে । কিন্তু ধাৰাসাৰ বৰষুণ আৰু প্ৰতিকূল বতৰৰ বাবে বৰ্তমানৰ বাবে আকাশমাৰ্গৰ জৰিয়তে কৰা নিৰীক্ষণ সম্ভৱ হোৱা নাই । জিলা কৰ্তৃপক্ষ আৰু উদ্ধাৰকাৰী দলসমূহে পৰিস্থিতি তীক্ষ্ণভাৱে পৰ্যবেক্ষণ কৰি আছে আৰু বতৰৰ অলপ উন্নতি হ’লেই ক্ষয়-ক্ষতিৰ বিতং মূল্যায়ন তথা যোগাযোগ ব্যৱস্থা পুনৰুদ্ধাৰৰ কাম যুদ্ধকালীন তৎপৰতাৰে আৰম্ভ কৰা হ’ব ।
লগতে পঢ়ক : যোৰাবাটত ভয়ংকৰ কৃত্ৰিম বান, পৃথক পথ নিৰ্দেশনা জাৰি মহানগৰ প্ৰশাসনৰ
