অপেক্ষা অন্ত ! বলীউডৰ অভিনেতা আমিৰ খানে আজি (৫ জুলাই) তৃতীয়বাৰৰ বাবে বিবাহপাশত আবদ্ধ হয়।৬১ বছৰ বয়সত আমিৰে নিজৰ লেডী লাভ গৌৰীক বিয়া কৰাই চিৰদিনৰ বাবে জীৱন সংগী কৰি লৈছে।
বলীউডৰ ছুপাৰষ্টাৰ আমিৰ খানে ৫ জুলাইত তেওঁৰ প্ৰেমিকা গৌৰী স্প্ৰেটৰ সৈতে বিবাহপাশত আবদ্ধ হয়। মুম্বাইৰ বান্দ্ৰাত অৱস্থিত আমিৰৰ বাসভৱনত অতি সাধাৰণ ভাৱে এই বিবাহ সম্পন্ন হয়। দুয়ো বিগত দুবছৰতকৈও অধিক সময় ধৰি একেলগে আছিল। দেওবাৰে অনুষ্ঠিত হোৱা এই বিবাহত কেৱল পৰিয়ালৰ লোক আৰু কিছুসংখ্যক বিশেষ বন্ধু-বান্ধৱীহে উপস্থিত থাকে। এই বিবাহত আমিৰৰ পূৰ্বৰ তিনিওটা সন্তানো উপস্থিত আছিল।
এতিয়া আনুষ্ঠানিকভাৱে পতি-পত্নী হ’ল আমিৰ খান আৰু গৌৰী স্প্ৰেট। কিন্তু এই বিয়াত আটাইতকৈ বেছি চৰ্চা লাভ কৰিলে গৌৰীৰ পুত্ৰ কুইনে। বিবাহৰ প্ৰথমখন ছবি পোহৰলৈ অহাৰ লগে লগেই সকলোৰে দৃষ্টি তেওঁৰ ওপৰত পৰে। এইখন ছবিয়ে যেন বহু কাহিনী একেলগে প্ৰকাশ কৰিছে।
আমিৰৰ মাতৃ জিনাতৰ লগতে পুত্ৰ আজাদকো এই বিবাহত দেখা গৈছিল। বিবাহৰ নিয়ম অনুসৰি যেতিয়া অভিনেতাগৰাকীয়ে নথি-পত্ৰত চহী কৰি আছিল, তেতিয়া তেওঁৰ ঠিক কাষতে থকা পুত্ৰ আজাদে সমগ্ৰ প্ৰক্ৰিয়াটো অতি মনোযোগেৰে লক্ষ্য কৰা দেখা গৈছিল। গৌৰী স্প্ৰেটৰ পুত্ৰ কুইনো এই বিবাহৰ এক গুৰুত্বপূৰ্ণ অংশ হৈ পৰিছিল। তেওঁ আমিৰ আৰু গৌৰীৰ মাজত বহি থকা দেখা গৈছিল আৰু তেওঁলোকৰ বিবাহৰ সাক্ষী হৈছিল।
ছচিয়েল মিডিয়াত তেওঁলোকৰ ছবিসমূহ অতি ক্ষিপ্ৰতাৰে ভাইৰেল হৈ পৰিছে। অনুৰাগীসকলে ইয়াক এটা সুন্দৰ ‘ব্লেনডেড ফেমিলীৰ আৰম্ভণি বুলি অভিহিত কৰিছে।
বিবাহৰ ৰীতি-নীতি আৰম্ভ হোৱাৰ পূৰ্বে আমিৰৰ কন্যা ইৰা খান আৰু পুত্ৰ জুনেইদ খানক তেওঁলোকৰ ঘৰত উপস্থিত হোৱা দেখা গৈছিল। ‘লগান’ ছবিৰ পৰিচালক আশুতোষ গোৱাৰীকাৰ আৰু অভিনেত্ৰী এলি অৱৰামো এই বিবাহত উপস্থিত আছিল।
আমিৰ আৰু গৌৰী প্ৰথমবাৰৰ বাবে প্ৰায় ২৫ বছৰ পূৰ্বে লগ পাইছিল। কিন্তু তেওঁলোকৰ সম্পৰ্ক ২০২৪ চনতহে আৰম্ভ হৈছিল, যেতিয়া তেওঁলোকে বেংগালুৰুত আমিৰৰ সম্বন্ধীয় ভগ্নী নুজহত খানৰ জৰিয়তে পুনৰ লগ পাইছিল। প্ৰায় এবছৰ ধৰি সম্পৰ্কটো গোপনে ৰখাৰ পিছত, আমিৰে ২০২৫ চনৰ মাৰ্চ মাহত তেওঁৰ ৬০ সংখ্যক জন্মদিনত গৌৰীক বিশ্ববাসীৰ সৈতে চিনাকি কৰাই দিছিল।
লগতে পঢ়ক: অপেক্ষাৰ অন্ত: অ’টিটি প্লেটফৰ্মত মুক্তি লাভ দিলজিৎ দোচাঞ্জৰ পঞ্জাৱ ৯৫
