‘তেওঁ শচীন আৰু বিৰাটৰ দৰেই প্ৰতিভাশালী’; বৈভৱ সূৰ্যৱংশীক লৈ কপিল দেবৰ বিশেষ মন্তব্য  

ভাৰতৰ কিংবদন্তি অধিনায়ক কপিল দেৱে ১৫ বছৰীয়া বৈভৱ সূৰ্যবংশীক শচীন তেণ্ডুলকাৰ আৰু বিৰাট কোহলীৰ দৰেই প্ৰতিভাশালী বুলি অভিহিত কৰিছে। অৱশ্যে তেওঁ স্পষ্টকৈ উল্লেখ কৰে যে যুৱ বেটছমেন গৰাকীক অত্যধিক বোজা জাপি দিব নালাগে।

প্ৰাক্তন মহান ভাৰতীয় অলৰাউণ্ডাৰ তথা ১৯৮৩ চনৰ বিশ্বকাপ বিজয়ী অধিনায়ক কপিল দেবে যুৱ বেটছমেন বৈভৱ সূৰ্যৱংশীক লৈ এক ডাঙৰ মন্তব্য কৰিছে। কপিল দেবে বৈভৱৰ ভূয়সী প্ৰশংসা কৰে, কিন্তু একে সময়তে তেওঁক লৈ সৃষ্টি হোৱা পৰিৱেশক লৈও চিন্তা প্ৰকাশ কৰে। তেওঁ কয় যে বৈভৱ এজন অসাধাৰণ প্ৰতিভাশালী খেলুৱৈ, কিন্তু ইমান কম বয়সতে তেওঁৰ ওপৰত প্ৰয়োজনতকৈ অধিক প্ৰত্যাশাৰ বোজা জাপি দিব নালাগে।

যেতিয়া কপিল দেবক সোধা হৈছিল যে তেওঁ বৈভৱ সূৰ্যৱংশীক কেনে দৃষ্টিৰে চায়, তেতিয়া তেওঁ কয়— “তেওঁৰ মাজত প্ৰচুৰ প্ৰতিভা আছে, ইয়াত কোনো সন্দেহ নাই। কিন্তু মোৰ অনুভৱ হয় যে আমি তেওঁৰ বিষয়ে বহুত ডাঙৰ ডাঙৰ কথা পাতি আছোঁ। এতিয়া তেওঁক অলপ সময় দিয়ক। তেওঁক ইমান বেছি হাইপ নিদিব যাতে তেওঁ নিজেই চাপৰ মাজত সোমাই পৰে।”

কপিল দেবে বৈভৱৰ প্ৰতিভাক ভাৰতীয় ক্ৰিকেটৰ দুটা ডাঙৰ নামৰ সৈতে তুলনা কৰে। তেওঁ কয় যে প্ৰতিভাৰ ক্ষেত্ৰত বৈভৱ সূৰ্যৱংশী শচীন টেণ্ডুলকাৰ আৰু বিৰাট কোহলীৰ দৰেই প্ৰতিভাশালী। অৱশ্যে তেওঁ এয়াও সংযোগ কৰে যে কেৱল প্ৰতিভাই যথেষ্ট নহয়, দীৰ্ঘদিন ধৰি ধাৰাবাহিক প্ৰদৰ্শন কৰিলেহে এজন খেলুৱৈ মহান হৈ পৰে। তেওঁ কয়— “প্ৰতিভাৰ কথা ক’বলৈ গ’লে, হয়, তেওঁ শচীন আৰু বিৰাটৰ দৰেই প্ৰতিভাশালী। তেওঁৰ অপাৰ ক্ষমতা আছে।”

কপিল দেবৰ মতে বৈভৱে টি-২০ ক্ৰিকেটত নিজৰ ক্ষমতা প্ৰমাণ কৰি দেখুৱাইছে। ইমান কম বয়সতে তেওঁ যি প্ৰভাৱ পেলাইছে, সেয়া অত্যন্ত বিৰল। তেওঁ কয়— “টি-২০ত তেওঁ নিজক প্ৰমাণ কৰিছে। ইমান কম বয়সতে ইমান ডাঙৰ প্ৰভাৱ পেলোৱা খেলুৱৈ সমগ্ৰ বিশ্বতে হয়তো এক শতাংশও নোলাব।”

অৱশ্যে কপিল দেবে এয়াও কয় যে ক্ৰিকেটৰ প্ৰকৃত পৰীক্ষা দীঘলীয়া ফৰ্মেটতহে হয়। তেওঁ প্ৰশ্ন উত্থাপন কৰে যে যেতিয়া বৈভৱে টেষ্ট ক্ৰিকেট খেলিব, তেতিয়া তেওঁ একে স্তৰৰ ধাৰাবাহিকতা দেখুৱাব পাৰিবনে? তেওঁ ধেমেলীয়া সুৰত কয় যে বীৰেন্দ্ৰ সেহৱাগে হয়তো এইদৰে চিন্তা নকৰিবও পাৰে, কিন্তু ক্ৰিকেটত মানুহে এনেকুৱা প্ৰশ্নই সোধে।

কপিল দেবে কয় যে যেতিয়া ১৯৮৮-৮৯ চনত শচীন টেণ্ডুলকাৰ ভাৰতীয় ক্ৰিকেটলৈ আহিছিল, তেতিয়া তেওঁৰ চাৰিওফালে ইমান কোলাহল বা হাইপ নাছিল, যিমান আজি বৈভৱ সূৰ্যৱংশীক লৈ দেখিবলৈ পোৱা গৈছে। গতিকে আমি তেওঁক এটা স্বাভাৱিক পৰিৱেশ দিয়াটো জৰুৰী, যাতে তেওঁৰ ওপৰত কোনো অনাহক চাপ সৃষ্টি নহয়।

বৈভৱৰ আন্তঃৰাষ্ট্ৰীয় অভিষেকক লৈ চলি থকা বিতৰ্কৰ সন্দৰ্ভত কপিল দেবে স্পষ্টকৈ কয় যে যদি খেলুৱৈজন প্ৰস্তুত, তেন্তে তেওঁক সুযোগ দিয়াত পলম কৰিব নালাগে। তেওঁ কয়— “মানুহে সোধে যে এতিয়াই বৰ সোনকাল হৈ যোৱা নাইনে? মই ক’ম যে এতিয়া বৰ পলম হৈ যোৱা নাইনে? যদি তেওঁ সাজু, তেন্তে তেওঁক খেলিবলৈ দিয়ক।”

অৱশ্যে তেওঁ পুনৰ দোহাৰে যে দলত বাছনিৰ সমান্তৰালকৈ খেলুৱৈজনৰ মানসিক বিকাশৰ প্ৰতিও চকু ৰখাটো জৰুৰী। তেওঁ কয়— “অনুগ্ৰহ কৰি তেওঁক অভাৰ-হাইপ নকৰিব। তেওঁৰ ওপৰত অনাহক চাপ জাপি নিদিব।”

কথা-বতৰাৰ মাজতে কপিল দেবে এয়াও কয় যে বৈভৱৰ বয়স এতিয়া মাত্ৰ ১৫-১৬ বছৰ আৰু বৰ্তমান তেওঁৰ সমগ্ৰ পৃথিৱীখন কেৱল ক্ৰিকেটক কেন্দ্ৰ কৰিয়েই আৱৰ্তিত। গতিকে এতিয়াই তেওঁক মহান খেলুৱৈসকলৰ সৈতে তুলনা কৰাটো খৰখেদা হ’ব। তেওঁ বহুত সৰু, কিন্তু বিশেষ প্ৰতিভা আছে। যেতিয়া তেওঁৰ বয়স ২০-২২ বছৰ হ’ব, তেতিয়াহে আমি হিচাপ কৰিম যে তেওঁ কিমান দীঘলীয়া যাত্ৰা অতিক্ৰম কৰিলে। শচীনো ১৬ বছৰ বয়সত এনেকুৱাই ব্যতিক্ৰমী আছিল, কিন্তু তেওঁ বহু বছৰ ধৰি সেই স্তৰ ধৰি ৰাখিছিল। সেয়াই হৈছে আটাইতকৈ ডাঙৰ প্ৰত্যাহ্বান।”

কপিল দেবৰ এই বক্তব্যৰ পৰা স্পষ্ট যে তেওঁ বৈভৱ সূৰ্যৱংশীৰ প্ৰতিভাক লৈ সম্পূৰ্ণ আশাবাদী, কিন্তু একে সময়তে তেওঁ বিচাৰে যে ভাৰতীয় ক্ৰিকেট আৰু অনুৰাগীসকলে এই খেলুৱৈজনক অতিৰিক্ত প্ৰত্যাশাৰ বোজাৰ তলত হেঁচি নাৰাখক। তেওঁৰ বাৰ্তা স্পষ্ট— যদি বৈভৱ প্ৰস্তুত, তেন্তে তেওঁ সুযোগ পাব লাগে, কিন্তু সময়ৰ লগে লগে তেওঁৰ প্ৰতিভা বিকশিত হোৱাৰ সুযোগো পোৱাটো প্ৰয়োজন।

লগতে পঢ়ক: ৪১ বছৰতো অপ্ৰতিৰোধ্য ৰোনাল্ডো! বিশ্বকাপৰ নকআউটত গ’ল দি গঢ়িলে অনন্য ইতিহাস