বিশ্বৰ ভিতৰতে আটাইতকৈ দ্ৰুতগতিত উত্তপ্ত হোৱা মহাদেশ ইউৰোপে বৰ্তমান এক বৰ্ধিত জনস্বাস্থ্য জৰুৰীকালীন অৱস্থাৰ মাজেৰে গতি কৰিছে
শেহতীয়াকৈ প্ৰচণ্ড গ্ৰীষ্ম প্ৰৱাহৰ কবলত পৰিছে সমগ্ৰ ইউৰোপ । ইউৰোপে বৰ্তমান ইয়াৰ ইতিহাসৰ আটাইতকৈ তীব্ৰ আৰু ভয়াৱহ গ্ৰীষ্ম প্ৰৱাহৰ সন্মুখীন হৈছে । অস্বাভাৱিকভাৱে বৃদ্ধি পোৱা তাপমাত্ৰাৰ বাবে সমগ্ৰ মহাদেশখনত হাহাকাৰ পৰিস্থিতিৰ সৃষ্টি হৈছে । এই প্ৰচণ্ড গৰমৰ ফলত কেৱল স্বাস্থ্য খণ্ডই নহয়, পৰিবহন ব্যৱস্থা আৰু বিদ্যুৎ আন্তঃগাঁথনিও গভীৰ সংকটত পৰিছে ।
বিশ্ব স্বাস্থ্য সংস্থাৰ গুৰুতৰ সতৰ্কবাণী
বিশ্ব স্বাস্থ্য সংস্থাই সতৰ্ক কৰি দিছে যে বিশ্বৰ ভিতৰতে আটাইতকৈ দ্ৰুতগতিত উত্তপ্ত হোৱা মহাদেশ ইউৰোপে বৰ্তমান এক বৰ্ধিত জনস্বাস্থ্য জৰুৰীকালীন অৱস্থাৰ মাজেৰে গতি কৰিছে ।
WHO-ৰ সঞ্চালক প্ৰধান টেড্ৰ’ছ আধানম গেব্ৰেয়েছাছে সদৰী কৰা মতে ১৫০ নিযুততকৈও অধিক লোক বৰ্তমান চৰম গৰমৰ পৰিস্থিতিত জীৱন কটাইছে । ২১ জুনৰ পৰা এতিয়ালৈকে ১,৩০০ তকৈও অধিক অতিৰিক্ত মৃত্যুৰ ঘটনা পঞ্জীয়ন কৰা হৈছে । তেওঁ কয়- “তাপৰ মানসিক আৰু শাৰীৰিক চাপ হৈছে এক ‘মনে মনে অহা হত্যাকাৰী’ । ইউৰোপৰ ঘৰ, কৰ্মক্ষেত্ৰ তথা বিদ্যালয়সমূহ এই ধৰণৰ চৰম তাপমাত্ৰাৰ বাবে সজা হোৱা নাছিল ।”
৪০ ডিগ্ৰীৰ ওপৰত তাপমাত্ৰা: ভাঙিলে পূৰ্বৰ ৰেকৰ্ড
উপলব্ধ চৰকাৰী তথ্য অনুসৰি, বিগত সপ্তাহান্তত ইউৰোপৰ কেইবাখনো দেশত তাপমাত্ৰাই ৪০°C ৰ সীমা অতিক্ৰম কৰিছে । ক্ৰমে- চেক গণৰাজ্য ৪১.৯°C, জাৰ্মানী ৪১.৭°C, পোলেণ্ড ৪০.৫°C ।
ছচিয়েল মিডিয়াত ভাইৰেল গৰমৰ ভয়াবহ দৃশ্য
প্ৰচণ্ড গৰমৰ বাবে সাধাৰণ জনজীৱন সম্পূৰ্ণৰূপে ব্যাহত হৈ পৰিছে । ছচিয়েল মিডিয়াত ভাইৰেল হোৱা কেইবাটাও ভিডিঅ’ত দেখা গৈছে যে মানুহে মুকলি আকাশৰ তলত, সূৰ্যৰ পোহৰত ফ্ৰাইং পেন ৰাখি কণী আৰু বেকন ৰান্ধিবলৈ সক্ষম হৈছে । দোকানৰ ভিতৰতে চকলেট গলি যোৱা, প্লাষ্টিকৰ শ্বপিং ট্ৰলী আৰু জোতা-চটি গৰমত বেঁকা হৈ যোৱাৰ দৰে ঘটনাও পোহৰলৈ আহিছে । জাৰ্মানীৰ বাৰ্লিনত প্ৰচণ্ড গৰমৰ পৰা সকাহ দিবলৈ আৰক্ষীয়ে নাগৰিকৰ ওপৰত পানীৰ হিলৈ ব্যৱহাৰ কৰিবলগীয়া হৈছে । আনহাতে লাইপজিগত তীব্ৰ গৰমৰ বাবে ট্ৰামৰ ৰেলপথ বেঁকা হৈ পৰাত ট্ৰাম সেৱা সাময়িকভাৱে বন্ধ কৰা হৈছে ।
ইফালে আন একাংশ দৃশ্যত তীব্ৰ গৰমত গাড়ীৰ টায়াৰ গলি যোৱা আনকি গাড়ীৰ সন্মুখৰ ভাগ গলি যোৱা দেখা গৈছে ।
চিকিৎসালয় আৰু মৰ্গত ঠাইৰ অভাৱ
ফ্ৰান্স বৰ্তমান এই উষ্ণপ্ৰবাহৰ ফলত আটাইতকৈ বেয়াকৈ প্ৰভাৱিত হৈছে । ফ্ৰান্সৰ স্বাস্থ্য কৰ্তৃপক্ষৰ মতে, যোৱা বুধবাৰৰ পৰা দেশখনত স্বাভাৱিকতকৈ প্ৰায় ১,০০০ জন অধিক লোকৰ মৃত্যু হৈছে ।
নেচনেল ফিউনাৰেল ফেডাৰেচনৰ প্ৰতিনিধি এলিজাবেথ চেৰিয়াৰে জানিবলৈ দিয়া মতে, পেৰিছৰ শৱদাহগৃহ বা অন্ত্যেষ্টিক্ৰিয়া গৃহসমূহৰ ব্যৱহাৰৰ হাৰ ৬০ শতাংশতকৈ অধিক বৃদ্ধি পাইছে (যিটো স্বাভাৱিকতে ৩০ ৰ পৰা ৪৫ শতাংশ থাকে)। কেন্দ্ৰীয় পেৰিছৰ মৰ্গসমূহ সম্পূৰ্ণ ভৰি পৰাৰ বাবে মৃতদেহ সজাবৰ বাবে শোকসন্তপ্ত পৰিয়ালসমূহে উপনগৰসমূহৰ কাষ চাপিবলগীয়া হৈছে ।
বিদ্যুৎ ব্যৱস্থাত প্ৰচণ্ড চাপ: ব্লেকআউটৰ আশংকা
প্ৰচণ্ড গৰমৰ বাবে এয়াৰ কণ্ডিচনাৰ আৰু কুলিং ব্যৱহাৰ বৃদ্ধি পোৱাত বিদ্যুৎ ব্যৱস্থাৰ ওপৰত তীব্ৰ চাপ পৰিছে । বিশেষকৈ যুদ্ধবিধ্বস্ত ইউক্ৰেইনত শক্তি সংকট অধিক ঘনীভূত হৈছে । ৰাছিয়াৰ সৈতে চলি থকা যুদ্ধৰ বাবে ইতিমধ্যে ক্ষতিগ্ৰস্ত হোৱা ইউক্ৰেইনৰ শক্তি গ্ৰীডৰ চাপ কমাবলৈ পশ্চিমীয়া ৰিভন অঞ্চলত জৰুৰীকালীন বিদ্যুৎ কৰ্তনৰ নিৰ্দেশ দিয়া হৈছে ।
বতৰ বিজ্ঞান সংস্থাসমূহৰ মতে, এই ভয়াৱহ উষ্ণপ্ৰবাহ বৰ্তমান ক্ৰমান্বয়ে পূব দিশলৈ গতি কৰিছে, যাৰ ফলত আগন্তুক দিনবোৰত ইউৰোপৰ আন বহু অঞ্চলত তাপমাত্ৰা আৰু বৃদ্ধি পোৱাৰ সম্ভাৱনা আছে ।
লগতে পঢ়ক : সিন্ধু জল চুক্তিক লৈ ভীৰু পাকিস্তানৰ ভাবুকি, ভাৰতৰ হাত কটাৰো হুংকাৰ
