এই ভয়ংকৰ দুৰ্ঘটনাত বাছখনত থকা ১১ বছৰীয়া এজন স্কুলীয়া ছাত্ৰৰ কৰুণ মৃত্যু হোৱাৰ বিপৰীতে আন চাৰিজন শিক্ষাৰ্থী আহত হয়
মহাৰাষ্ট্ৰৰ মুম্বাইত এক অতি কৰুণ তথা হৃদয় বিদাৰক ঘটনা সংঘটিত হৈছে । মুম্বাইৰ চেম্বুৰ অঞ্চলত হঠাতে এটা পথৰ কাষৰ প্ৰকাণ্ড গছ উভালি এখন স্কুল বাছৰ ওপৰত বাগৰি পৰে । এই ভয়ংকৰ দুৰ্ঘটনাত বাছখনত থকা ১১ বছৰীয়া এজন স্কুলীয়া ছাত্ৰৰ কৰুণ মৃত্যু হোৱাৰ বিপৰীতে আন চাৰিজন শিক্ষাৰ্থী আহত হয় ।
মুম্বাই পৌৰ নিগম (BMC)ৰ মুম্বাই ফায়াৰ ব্ৰিগেডৰ তথ্য অনুসৰি, মঙলবাৰে দুপৰীয়া প্ৰায় ২:৫৮ বজাত এই শোকাৱহ ঘটনাটো সংঘটিত হয় । জানিব পৰা মতে, ‘মেক ফৰ্চ’ কোম্পানীয়ে চলোৱা আৰু ‘ইউনিভাৰ্চেল হাইস্কুল’ৰ শিক্ষাৰ্থী কঢ়িয়াই নিয়া বাছখনৰ ওপৰত পথৰ কাষৰ এজোপা প্ৰকাণ্ড গছ উভালি পৰে ।
স্থানীয় ৰাইজ আৰু কণ্ডাক্টৰৰ তৎপৰতা
দুৰ্ঘটনাটো সংঘটিত হোৱাৰ সময়ত বাছখনত ১২টি শিশু আছিল । ঘটনাৰ লগে লগে বাছৰ কণ্ডাক্টৰ আৰু স্থানীয় ৰাইজে অতি তৎপৰতাৰে বাছৰ ভিতৰত আৱদ্ধ হৈ পৰা শিশুসকলক সুৰক্ষিতভাৱে উদ্ধাৰ কৰিবলৈ সক্ষম হয় । ইয়াৰ পিছতে ঘটনাস্থলীত অগ্নিনিৰ্বাপক বাহিনী আৰু আৰক্ষী উপস্থিত হৈ উদ্ধাৰ অভিযান সম্পূৰ্ণ কৰে ।
হাস্পতালত ছাত্ৰৰ মৃত্যু
উদ্ধাৰ কৰা শিশুসকলৰ ভিতৰত পাঁচজন শিক্ষাৰ্থী আঘাতপ্ৰাপ্ত হৈছিল । তেওঁলোকক লগে লগে জেন হাস্পতাললৈ লৈ যোৱা হয় । চিকিৎসালয়খনে প্ৰকাশ কৰা অনুসৰি, গুৰুতৰভাৱে আঘাতপ্ৰাপ্ত হোৱা ১১ বছৰীয়া এগৰাকী ছাত্ৰ আবেলি ৪:২৩ বজাত চিকিৎসকে মৃত ঘোষণা কৰে ।
আনহাতে, সামান্যভাৱে আহত হোৱা বাকী চাৰিজন শিক্ষাৰ্থীৰ অৱস্থা বৰ্তমান সুস্থিৰ বুলি জানিব পৰা গৈছে । এই ঘটনাক লৈ সমগ্ৰ অঞ্চলটোতে তীব্ৰ শোকৰ ছাঁ পৰিছে ।
লগতে পঢ়ক : জুইৰ লেলিহান শিখাত জাহ গ’ল কোচিং চেণ্টাৰ, অতি কমেও ১৫ জনৰ মৃত্যু
