বঁটা প্ৰদান কৰি ৰাষ্ট্ৰসংঘৰ সচিব প্ৰধানে সামাজিক মাধ্যম ‘এক্স’ত মেজৰ বাৰাকক ভূয়সী প্ৰশংসা কৰে
দেশৰ বাবে এক গৌৰৱোজ্জ্বল মুহূৰ্ত কঢ়িয়াই আনি ভাৰতীয় সেনাৰ মেজৰ অভিলাষা বাৰাকে লাভ কৰিছে ৰাষ্ট্ৰসংঘৰ মৰ্যাদাপূৰ্ণ ‘২০২৫ বৰ্ষৰ ইউএন মিলিটাৰী জেণ্ডাৰ এডভোকেট বঁটা’ (UN Military Gender Advocate Award) । উল্লেখনীয় যে মেজৰ বাৰাক কেৱল এগৰাকী দক্ষ সামৰিক বিষয়াই নহয়, তেওঁ দেশৰ প্ৰথমগৰাকী মহিলা কম্বেট হেলিকপ্টাৰ পাইলটো ।
বৰ্তমান লেবাননত ৰাষ্ট্ৰসংঘৰ শান্তিৰক্ষা বাহিনীৰ অধীনত কৰ্মৰত মেজৰ বাৰাকক যোৱা শুকুৰবাৰে নিউয়ৰ্কস্থিত ৰাষ্ট্ৰসংঘৰ মুখ্য কাৰ্যালয়ত আয়োজিত এক বিশেষ অনুষ্ঠানত ৰাষ্ট্ৰসংঘৰ সচিব প্ৰধান এণ্টনিঅ’ গুটেৰেছে আনুষ্ঠানিকভাৱে এই বঁটা প্ৰদান কৰে ।
বঁটা প্ৰদান কৰি ৰাষ্ট্ৰসংঘৰ সচিব প্ৰধানে সামাজিক মাধ্যম ‘এক্স’ত (X) মেজৰ বাৰাকক ভূয়সী প্ৰশংসা কৰে । তেওঁ লিখে- “আমাৰ এই বছৰৰ ‘ইউএন মিলিটাৰী জেণ্ডাৰ এডভোকেট’, ভাৰতৰ মেজৰ অভিলাষা বাৰাকক আন্তৰিক অভিনন্দন, যিয়ে লেবাননত ৰাষ্ট্ৰসংঘৰ শান্তিৰক্ষা বাহিনীৰ হৈ শান্তি প্ৰতিষ্ঠাৰ বাবে অহোপুৰুষাৰ্থ কৰিছে । তেওঁৰ কাৰ্যই দেখুৱাই দিছে যে UNIFIL-এ সংঘাতপূৰ্ণ অঞ্চলসমূহত কেনে গুৰুত্বপূৰ্ণ ভূমিকা পালন কৰিছে আৰু ইয়াৰ উপস্থিতিয়ে অত্যন্ত প্ৰত্যাহ্বানজনক পৰিস্থিতিৰ মাজতো স্থানীয় মহিলা আৰু কন্যাসকলৰ জীৱন সুৰক্ষিত কৰাৰ লগতে কেনেকৈ সলনি কৰিছে । মেজৰ বাৰাক, আপুনি যাৰ বাবে সেৱা আগবঢ়াইছে আৰু যাৰ সৈতে মিলি কাম কৰিছে- সকলোৰে বাবে এক আদৰ্শ । আপোনাৰ এই অনন্য সেৱাৰ বাবে ধন্যবাদ ।”
কি এই বঁটা আৰু ইয়াৰ তাৎপৰ্য ?
ৰাষ্ট্ৰসংঘৰ নিৰাপত্তা পৰিষদৰ ঐতিহাসিক ‘১৩২৫ নং প্ৰস্তাৱ’-ৰ নীতিসমূহক প্ৰসাৰিত কৰাৰ ক্ষেত্ৰত দেখুওৱা উৎকৃষ্ট প্ৰতিশ্ৰুতি আৰু নেতৃত্বৰ বাবে ২০১৬ চনৰ পৰা প্ৰতি বছৰে এগৰাকী সামৰিক শান্তিৰক্ষকক (পুৰুষ অথবা মহিলা) এই সন্মান প্ৰদান কৰা হয় ।
ৰাষ্ট্ৰসংঘৰ এই নিৰ্দিষ্ট প্ৰস্তাৱটোৱে তলত উল্লেখ কৰা মূল বিষয়সমূহৰ ওপৰত গুৰুত্ব আৰোপ কৰে :
লিংগভিত্তিক দৃষ্টিকোণ : শান্তিৰক্ষা আৰু শান্তিস্থাপনৰ প্ৰতিটো দিশতে পুৰুষ আৰু মহিলাৰ সমান অধিকাৰ তথা লিংগভিত্তিক সমতাক মূলসুঁতিলৈ অনা ।
মহিলাৰ অংশগ্ৰহণ : যিকোনো দেশৰ বা অঞ্চলৰ শান্তি স্থাপন তথা ৰাজনৈতিক প্ৰক্ৰিয়াত মহিলাৰ সক্ৰিয় অংশগ্ৰহণ সুনিশ্চিত কৰা ।
সুৰক্ষা আৰু প্ৰতিৰোধ : যুদ্ধ বা সংঘাতকালীন সময়ত সংঘটিত হ’ব পৰা যৌন হিংসাৰ পৰা মহিলাসকলক সুৰক্ষা দিয়া আৰু ইয়াক সম্পূৰ্ণৰূপে প্ৰতিৰোধ কৰা ।
ভূমিকা সম্প্ৰসাৰণ : ৰাষ্ট্ৰসংঘৰ সামৰিক অভিযানসমূহত ইউনিফৰ্ম পৰিহিত মহিলা শান্তিৰক্ষী তথা মহিলা বিষয়াৰ সংখ্যা আৰু অৱদান বৃদ্ধি কৰা ।
বিশ্বৰ আটাইতকৈ বিপদসংকুল আৰু প্ৰত্যাহ্বানপূৰ্ণ অঞ্চলসমূহৰ অন্যতম লেবাননত কৰ্তব্যৰত অৱস্থাত মেজৰ অভিলাষা বাৰাকে প্ৰদৰ্শন কৰা সাহসিকতা আৰু লিংগ সমতাৰ বাবে চলোৱা প্ৰচেষ্টাই আজি বিশ্ব দৰবাৰত ভাৰতীয় সেনাৰ লগতে সমগ্ৰ দেশখনলৈকে এক অভূতপূৰ্ব সন্মান কঢ়িয়াই আনিবলৈ সক্ষম হৈছে ।
লগতে পঢ়ক : ৰাষ্ট্ৰসংঘত পুনৰ মুখথেকেচা পাকিস্তানৰ: কাশ্মীৰক লৈ মিছা আখ্যান ৰচনা কৰাৰ বাবে ভাৰতৰ উচিত প্ৰত্যুত্তৰ
