দিল্লী বিস্ফোৰণত জড়িত কাকো ৰেহাই দিয়া নহ’ব
কেন্দ্ৰীয় গৃহমন্ত্ৰী অমিত শ্বাহে মঙলবাৰে লালকিল্লাৰ সমীপত সংঘটিত বিস্ফোৰণৰ পিছত ৰাষ্ট্ৰীয় ৰাজধানী আৰু দেশৰ অন্যান্য প্ৰান্তৰ নিৰাপত্তা পৰিস্থিতিৰ পৰ্যালোচনা কৰে । শ্বাহে দুখন পৃথক বৈঠক অনুষ্ঠিত কৰি বিষয়াসকলক গুৰুত্বপূৰ্ণ নিৰ্দেশনা জাৰি কৰে । জানিব পৰা মতে মঙলবাৰে পুৱা শ্বাহৰ অধ্যক্ষতাত এখন বৈঠক অনুষ্ঠিত হয় । দুপৰীয়া আন এখন সভাও আহ্বান কৰা হয় ।
প্ৰথমখন বৈঠকত কেন্দ্ৰীয় গৃহ সচিব গোবিন্দ মোহন, ইন্টেলিজেন্স ব্যুৰোৰ সঞ্চালক তপন ডেকা, দিল্লী আৰক্ষী আয়ুক্ত সতীশ গোলচা আৰু ৰাষ্ট্ৰীয় তদন্ত সংস্থাৰ সঞ্চালক প্ৰধান সদানন্দ বসন্ত ডেটে উপস্থিত থাকে । জম্মু-কাশ্মীৰৰ আৰক্ষী সঞ্চালক প্ৰধান নলিন প্ৰভাতে ভাৰ্চুৱেলি এই বৈঠকত অংশগ্ৰহণ কৰে ।
বৈঠকত শীৰ্ষ বিষয়াসকলে বিস্ফোৰণৰ পিছত উদ্ভৱ হোৱা পৰিস্থিতি সন্দৰ্ভত গৃহমন্ত্ৰীক বিতংভাৱে উপস্থাপন কৰে । বিয়লিৰ নিৰাপত্তা পৰ্যালোচনা বৈঠকত প্ৰায় একেখিনি বিষয়াই অংশগ্ৰহণ কৰে । বিস্ফোৰণৰ গম্ভীৰতা আৰু পৰিস্থিতিৰ সংবেদনশীলতাক লক্ষ্য কৰি গৃহ মন্ত্ৰালয়ে সমগ্ৰ তদন্ত ৰাষ্ট্ৰীয় অনুসন্ধান সংস্থাৰ হাতত অৰ্পণ কৰিছে । প্ৰকাশিত এক প্ৰতিবেদনত কোৱা হৈছে যে তদন্ত এন আই এক গতাই দিয়াটো চৰকাৰে এই ঘটনাক সন্ত্ৰাসবাদী কাৰ্য বুলি গণ্য কৰাৰ স্পষ্ট ইংগিত ।
লগতে পঢ়ক : দিল্লী বিস্ফোৰণ: বিদেশৰ পৰাই গৃহমন্ত্ৰীৰ পৰা পৰিস্থিতিৰ বুজ ল’লে ৰাষ্ট্ৰপতি মুৰ্মূৱে
