ৰৈ থকা ট্ৰাকত খুন্দা ট্ৰেভালাৰৰ
দেওবাৰে সন্ধিয়া ৰাজস্থানৰ ফালোডী জিলাৰ মাতোডা থানা এলেকাৰ ভাৰতমালা এক্সপ্ৰেছৱে’ত এক শোকাৱহ পথ দুৰ্ঘটনা সংঘটিত হয়।
যোধপুৰৰ সুৰসাগৰৰ বাসিন্দা ১৮ জন লোকে বিকানেৰৰ কোলায়াত মন্দিৰ পৰিদৰ্শন কৰি এখন ট্ৰেভেলাৰেৰে উভতি আহি আছিল।
কিন্তু তীব্ৰবেগত অহা ট্ৰেভেলাৰ খনে হঠাৎ হনুমান সাগৰ ছেক্সনৰ সমীপত ৰৈ থকা এখন ট্ৰাকত খুন্দা মাৰে। দুৰ্ঘটনাটোৰ ফলত ১৫ জন লোকৰ থিতাতে মৃত্যু হয়।
ফালোড়ীৰ আৰক্ষী অধীক্ষক কুন্দন কানৱাৰিয়াই এই দুৰ্ঘটনাত মৃত্যু হোৱা লোকৰ কথা নিশ্চিত কৰিছে। তেওঁ কয়, ‘দুৰ্ঘটনাটোত ১৫ জন লোকৰ থিতাতে মৃত্যু হয়’।
‘৩ জন আহতক তৎক্ষণাত অছিয়ান চিকিৎসালয়লৈ প্ৰেৰণ কৰা হয়, য’ৰ পৰাই তেওঁলোকক গ্ৰীণ কৰিডৰ সৃষ্টি কৰি যোধপুৰলৈ প্ৰেৰণ কৰা হৈছিল।’
ফালোডীৰ ডিএছপি আচল সিং দেৱদাই কয় যে দুৰ্ঘটনাটো ইমানেই ভয়ংকৰ আছিল যে, ট্ৰেভেলাৰখন সম্পূৰ্ণৰূপে ছিন্নভিন্ন হৈ পৰিছিল।
দুৰ্ঘটনাটোৰ পিছত মৃতদেহবোৰ ট্ৰেভেলাৰৰ আসন আৰু লোহাত বহু বেয়াকৈ আবদ্ধ হৈ পৰিছিল, তেওঁলোকক উদ্ধাৰ কৰিবলৈ আৰক্ষী আৰু স্থানীয় ৰাইজে বহু কষ্ট কৰিবলগীয়া হৈছিল।
ট্ৰেভেলাৰখন তীব্ৰবেগত থকাৰ বাবে পথৰ কাষত ৰখাই থোৱা ট্ৰাকখন চালকজনে দেখা নাপালে বুলি আৰক্ষীয়ে সন্দেহ কৰিছে।
লগতে পঢ়ক: ৰাছিয়াৰ ওপৰত পুনৰ ইউক্ৰেইনৰ বৃহৎ ড্ৰোন আক্ৰমণ; জ্বলি ছাই হ’ল টুৱাপছে বন্দৰ
