ৰাছিয়ান নিউক্লিয়াৰ ফৰ্চৰ অনুশীলন
বুধবাৰে ৰাছিয়াৰ ৰাষ্ট্ৰপতি ভ্লাদিমিৰ পুটিনে দেশখনৰ কৌশলগত নিউক্লিয়াৰ ফৰ্চ তথা পাৰমাণৱিক বাহিনীক বৃহৎ অনুশীলনৰ নিৰ্দেশ দিয়ে । ইয়াৰ ভিতৰত আছিল মিছাইল উৎক্ষেপণৰ অনুশীলন । ইউক্ৰেইন সন্দৰ্ভত আমেৰিকাৰ ৰাষ্ট্ৰপতি ড’নাল্ড ট্ৰাম্পৰ সৈতে অনুষ্ঠিত হোৱা পৰিকল্পিত শীৰ্ষ সন্মিলন স্থগিত ৰখাৰ পিছতে নিউক্লিয়াৰ ফৰ্চক এই আদেশ দিয়ে পুটিনে ।
তিনিওটা বিভাগৰ পাৰমাণৱিক অনুশীলন-
ক্ৰেমলিনৰ মতে, এই অনুশীলনত ৰাছিয়াৰ সমগ্ৰ পৰমাণু ত্ৰয়ী (স্থল, জল আৰু বায়ু পাৰমাণৱিক ক্ষমতা) জড়িত আছিল । বিবৃতি অনুসৰি, স্থলভাগৰ পৰা—আৰ এছ-২৪ ইয়াৰছ আন্তঃমহাদেশীয় বেলিষ্টিক মিছাইলটো উত্তৰ-পশ্চিম ৰাছিয়াৰ প্লেচেটস্ক উৎক্ষেপণ কেন্দ্ৰৰ পৰা নিক্ষেপ কৰা হৈছিল । পানীৰ পৰা—বেৰেণ্টছ সাগৰত নিয়োজিত এখন চাবমেৰিনৰ পৰা আৰ-২৯আৰ এম ইউ চিনেভা আই চি বি এম উৎক্ষেপণ কৰা হৈছিল । আকাশৰ পৰা—টুপলেভ টিউ-৯৫ বোমাৰু বিমানে দীৰ্ঘ দূৰত্বৰ ক্ৰুজ মিছাইল নিক্ষেপ কৰিছিল ।
বৈঠক সন্দৰ্ভত পুটিন-ট্ৰাম্পৰ বিবৃতি-
ক্ৰেমলিনৰ এক বিবৃতিত কোৱা হৈছে যে এই অনুশীলনত সামৰিক আদেশৰ প্ৰস্তুতি আৰু পাৰমাণৱিক অস্ত্ৰ ব্যৱহাৰৰ অনুমোদন প্ৰদানৰ প্ৰক্ৰিয়া পৰীক্ষা কৰা হয় । ৰাছিয়াৰ জেনেৰেল ষ্টাফৰ মুৰব্বী জেনেৰেল ভেলেৰী গেৰাচিমোভে ভিডিঅ’ লিংকৰ জৰিয়তে পুটিনক এই খবৰ দিয়ে । পুটিনে কয় যে এই অনুশীলন পূৰ্ব নিৰ্ধাৰিত আছিল যদিও ইয়াৰ সময় ট্ৰাম্পৰ ঘোষণাৰ কেইঘণ্টামান পিছতে আহিছিল । মঙলবাৰে ট্ৰাম্পে কৈছিল যে তেওঁ হাংগেৰীৰ ৰাজধানী বুডাপেষ্টত পুটিনক সাক্ষাৎ কৰিব নিবিচাৰে কাৰণ “এয়া সময়ৰ অপচয় হ’ব” ।
বুধবাৰে ক্ৰেমলিনৰ মুখপাত্ৰ দিমিত্ৰী পেস্কোভে কয় যে পৰ্যাপ্ত প্ৰস্তুতি চলিলেহে দুয়োখন দেশৰ মাজত শীৰ্ষ সন্মিলন অনুষ্ঠিত হ’ব । তেওঁ কয়, “ট্ৰাম্প বা ৰাষ্ট্ৰপতি পুটিনে, কোনোৱেই নিজৰ সময় নষ্ট কৰিব নিবিচাৰে । দুয়োজন নেতাই ফলপ্ৰসূ আৰু উৎপাদনশীলভাৱে কাম কৰাত অভ্যস্ত আৰু ইয়াৰ বাবে ভাল প্ৰস্তুতিৰ প্ৰয়োজন ।”
লগতে পঢ়ক : এইবাৰ হোৱাইট হাউচত ট্ৰাম্পে চলালে বুলড’জাৰ !
