আজি ভাৰতত উপস্থিত হ’ব শ্ৰীলংকাৰ প্ৰধানমন্ত্ৰী
বৃহস্পতিবাৰৰ পৰা তিনিদিনীয়া ভ্ৰমণসূচীৰে ভাৰতত উপস্থিত হ’ব শ্ৰীলংকাৰ প্ৰধানমন্ত্ৰী হৰিণী অমৰাসূৰ্য়া । প্ৰধানমন্ত্ৰী হোৱাৰ পিছত এয়া হ’ব তেওঁৰ প্ৰথম ভাৰত ভ্ৰমণ । বৈদেশিক পৰিক্ৰমা মন্ত্ৰালয়ৰ তথ্য অনুসৰি ১৬ অক্টোবৰৰ পৰা ১৮ অক্টোবৰলৈ প্ৰধানমন্ত্ৰীগৰাকী ভাৰতত থাকিব । এই সময়ছোৱাত ভাৰতীয় নেতাসকলৰ সৈতে সাক্ষাৎ কৰি শিক্ষা, প্ৰযুক্তি, বাণিজ্যিক সহযোগিতাৰ দৰে মূল বিষয়সমূহৰ ওপৰত আলোচনা কৰিব তেওঁ ।
এই ভ্ৰমণৰ সময়ত অমৰসূৰ্যাই আই আই টি দিল্লী আৰু নিটি আয়োগ ভ্ৰমণ কৰিব, য’ত তেওঁ শিক্ষা আৰু উদ্ভাৱনৰ ক্ষেত্ৰত ভাৰত-শ্ৰীলংকাৰ সহযোগিতাৰ বিষয়ে আলোচনা কৰিব । শ্ৰীলংকাৰ শিক্ষামন্ত্ৰী হিচাপে তেওঁ এই ক্ষেত্ৰত নতুন সুযোগ বিচাৰি উলিওৱাত গুৰুত্ব দিব । বৈদেশিক পৰিক্ৰমা মন্ত্ৰালয়ে কয় যে তেওঁৰ এই ভ্ৰমণে দুয়োখন দেশৰ মাজত গভীৰ আৰু বহুমুখী দ্বিপাক্ষিক সম্পৰ্ক আৰু অধিক শক্তিশালী কৰিব ।
বৃহস্পতিবাৰে দিল্লী বিশ্ববিদ্যালয়ৰ অন্তৰ্গত হিন্দু মহাবিদ্যালয়ত এক বিশেষ অনুষ্ঠানত অংশগ্ৰহণ কৰিব শ্ৰীলংকাৰ প্ৰধানমন্ত্ৰীগৰাকীয়ে । ১৯৯১ চনৰ পৰা ১৯৯৪ চনলৈকে বি এ অনাৰ্ছ (সমাজবিজ্ঞান) অধ্যয়ন কৰিছিল তেওঁ । প্ৰধানমন্ত্ৰী হোৱাৰ পিছত এই মহাবিদ্যালয়খনলৈ তেওঁৰ এয়া প্ৰথম ভ্ৰমণ ।
লগতে পঢ়ক : প্ৰধানমন্ত্ৰী মোদীক সাক্ষাৎ মংগোলিয়াৰ ৰাষ্ট্ৰপতিৰ; সাক্ষৰিত হ’ল ৬খনকৈ চুক্তি
