আই চি চি মহিলা বিশ্বকাপ
আই চি চি মহিলা বিশ্বকাপৰ নৱমখন মেচ বুধবাৰে কলম্বোত পাকিস্তান আৰু অষ্ট্ৰেলিয়াৰ মাজত অনুষ্ঠিত হয় । এই মেচত অষ্ট্ৰেলিয়াই পাকিস্তানক ১০৭ ৰানত বৃহৎ ব্যৱধানত পৰাস্ত কৰে । টছত জয়ী হৈ পাকিস্তানে প্ৰথমে বলিং কৰিবলৈ সিদ্ধান্ত লয় । প্ৰথমে বেটিং কৰি সাতবাৰৰ বিশ্ব চেম্পিয়ন অষ্ট্ৰেলিয়া পাকিস্তানী বলাৰৰ সন্মুখত অসহায় হৈ পৰা যেন লাগিছিল । অৱশ্যে বেথ মুনীয়ে শতক অৰ্জন কৰি দশম উইকেটৰ বাবে ১০০ ৰানৰো অধিক অংশীদাৰিত্ব গঢ়ি তোলে । ইয়াৰ সহায়ত অষ্ট্ৰেলিয়াই পাকিস্তানৰ সন্মুখত ২২২ ৰানৰ বিজয় লক্ষ্য নিৰ্ধাৰণ কৰি দিয়ে ।
২২২ ৰানৰ লক্ষ্য অনুসৰণ কৰি পাকিস্তান ১১৪ ৰানতে ইনিংছ সামৰিবলৈ বাধ্য হয় । কিম গাৰ্থে তিনিটা উইকেট দখল কৰে । উল্লেখ্য যে, বৰ্তমানলৈকে পাকিস্তান দলটোৱে চলিত বিশ্বকাপত তিনিখন মেচ খেলিছে । কিন্তু তিনিওখন মেচতে পৰাজয়ৰ সন্মুখীন হৈছে দলটো ।
ইফালে মহিলা বিশ্বকাপত ৭ বাৰকৈ চেম্পিয়ন হৈছে অষ্ট্ৰেলিয়া । অৰ্থাৎ সৰ্বাধিক বিশ্বকাপ জয়ৰ অভিলেখ অষ্ট্ৰেলিয়াৰ হাতত আছে । ১৯৭৮, ১৯৮২, ১৯৮৮, ১৯৯৭, ২০০৫, ২০১৩, আৰু ২০২২ চনত অষ্ট্ৰেলিয়াই এই খিতাপ দখল কৰিছে ।
আনহাতে ২৮ বছৰে পাকিস্তানৰ মহিলা ক্ৰিকেট দলে অষ্ট্ৰেলিয়াক এদিনীয়াত পৰাস্ত কৰিব পৰা নাই । এই পৰ্যন্ত দুয়োটা দলে ১৮খন এদিনীয়া খেলিছে যদিও প্ৰতিবাৰেই অষ্ট্ৰেলিয়াই জয়লাভ কৰিছে ।
লগতে পঢ়ক : অষ্ট্ৰেলিয়া ভ্ৰমণত ৮খন মেচ খেলিব ভাৰতীয় দলে; জানক দুয়োটা দলৰ স্কোৱাড আৰু সম্পূৰ্ণ সূচী
