এদিনীয়া বিশ্বকাপৰ বাবে ঘোষণা ভাৰতীয় দল
এদিনীয়া বিশ্বকাপ ২০২৫ৰ বাবে ভাৰতীয় মহিলা ক্ৰিকেট দলটো মঙলবাৰে ঘোষণা কৰা হৈছে । ৩০ ছেপ্টেম্বৰৰ পৰা ভাৰতত অনুষ্ঠিত হ’ব এই প্ৰতিযোগিতা । এইবাৰ নিৰ্বাচনত কিছু আচৰিত ধৰণৰ সিদ্ধান্ত লোৱা হৈছে । ফাষ্ট বলাৰ ৰেণুকা ঠাকুৰ ফিট হৈ দললৈ ঘূৰি আহিছে, আনহাতে আগ্ৰাসী অ’পেনাৰ শ্বেফালী বাৰ্মা দলৰ পৰা বাদ পৰিছে ।
আই চি চি মহিলাৰ এদিনীয়া বিশ্বকাপত হৰমনপ্ৰীত কৌৰে দলটোৰ অধিনায়কত্ব লাভ কৰাৰ বিপৰীতে স্মৃতি মন্ধনাক উপ-অধিনায়ক হিচাপে নিৰ্বাচিত কৰা হৈছে ।
শ্বেফালিৰ অনুপস্থিতি-
দীৰ্ঘদিন ধৰি ৰেনুকা ঠাকুৰৰ ফিটনেছক লৈ প্ৰশ্ন উত্থাপন হৈ আছিল যদিও অৱশেষত তেওঁক বিশ্বকাপৰ দলত অন্তৰ্ভুক্ত কৰা হৈছে । আনহাতে, শ্বেফালী বাৰ্মাক দলৰ পৰা বাদ দিয়াটো এক কঠিন সিদ্ধান্ত বুলি বিবেচিত হৈছে । তেওঁৰ আগ্ৰাসী বেটিং ভাৰতৰ বাবে বহু সময়ত ফলপ্ৰসূ হৈছে ।
পুৰস্কৃত প্ৰতিকা ৰাৱাল-
টপ অৰ্ডাৰ যুৱ বেটছমেন প্ৰতীকা ৰাৱালকো এই দলত সুযোগ দিয়া হৈছে । বিগত ১৪খন এদিনীয়াত ধাৰাবাহিকভাৱে ভাল ৰান সংগ্ৰহ কৰি নিজৰ স্থান গঢ়ি তুলিছে তেওঁ । দল পৰিচালনাই তেওঁক ভাৰতৰ বেটিঙত স্থিতিশীলতা আনিব পৰা খেলুৱৈ বুলি গণ্য কৰিছে ।
৩০ ছেপ্টেম্বৰৰ পৰা এদিনীয়া বিশ্বকাপ-
চলিত বৰ্ষৰ ৩০ ছেপ্টেম্বৰৰ পৰা ভাৰতত অনুষ্ঠিত হ’ব মহিলা এদিনীয়া ক্ৰিকেট বিশ্বকাপ । ঘৰুৱা খেলপথাৰত খিতাপ জয় কৰাৰ উদ্দেশ্যেৰে হৰমনপ্ৰীত কৌৰৰ নেতৃত্বত প্ৰৱেশ কৰিব ভাৰতীয় দলে ।
অষ্ট্ৰেলিয়া ছিৰিজৰ বাবেও ঘোষণা দল-
বিশ্বকাপৰ পূৰ্বে নিৰ্বাচকসকলে ১৪ ছেপ্টেম্বৰৰ পৰা আৰম্ভ হ’বলগীয়া তিনিখন মেচৰ এদিনীয়া শৃংখলাৰ বাবেও ১৫ জনীয়া দল ঘোষণা কৰিছে । এই শৃংখলা বিশ্বকাপৰ প্ৰস্তুতিৰ এক গুৰুত্বপূৰ্ণ পদক্ষেপ হিচাপে বিবেচিত হৈছে ।
এদিনীয়া বিশ্বকাপৰ বাবে ভাৰতীয় দল-
হৰমনপ্ৰীত কৌৰ (অধিনায়ক), স্মৃতি মন্ধনা (উপ অধিনায়ক), প্ৰতিকা ৰাৱাল, হৰলিন দেউল, দীপ্তি শৰ্মা, জেমিমা ৰড্ৰিগোছ, ৰেনুকা সিং ঠাকুৰ, অৰুন্ধতী ৰেড্ডী, ৰিচা ঘোষ (উইকেটকীপাৰ), ক্ৰান্তি গৌড়, অমনজোত কৌৰ, ৰাধা যাদৱ, শ্ৰী চৰানী, যস্তিকা ভাটিয়া (উইকেটকীপাৰ) আৰু স্নেহ ৰাণা ।
অষ্ট্ৰেলিয়াৰ বিৰুদ্ধে দল-
হৰমনপ্ৰীত কৌৰ (অধিনায়ক), স্মৃতি মন্ধনা (উপ অধিনায়ক), প্ৰতিকা ৰাৱাল, হৰলিন দেউল, দীপ্তি শৰ্মা, জেমিমা ৰড্ৰিগোছ, ৰেনুকা সিং ঠাকুৰ, অৰুন্ধতী ৰেড্ডী, ৰিচা ঘোষ (উইকেটকীপাৰ), ক্ৰান্তি গৌড়, সয়ালি সতঘৰে, ৰাধা যাদৱ, শ্ৰী চৰাণী, যস্তিকা ভাটিয়া (উইকেটকীপাৰ), স্নেহ ৰাণা ।
লগতে পঢ়ক : এছিয়া কাপ ২০২৫ৰ বাবে ভাৰতীয় দল ঘোষণা… সূৰ্যকুমাৰক দলৰ অধিনায়কৰ দায়িত্ব
