ৰাছিয়াৰ ৰাষ্ট্ৰপতিৰ ওপৰত ক্ষুব্ধ ট্ৰাম্প
আমেৰিকাৰ ৰাষ্ট্ৰপতি ড’নাল্ড ট্ৰাম্প আৰু ৰাছিয়াৰ ৰাষ্ট্ৰপতি ভ্লাদিমিৰ পুটিনৰ মাজত সকলো ভালে চলি থকা নাই।পুটিনক তীব্ৰ সমালোচনা কৰি পুনৰবাৰ অসন্তুষ্টি প্ৰকাশ কৰিছে ট্ৰাম্পে।
ফিফা বিশ্বকাপৰ ফাইনেলৰ পৰা উভতি অহাৰ পিছত সংবাদ মাধ্যমৰ সৈতে কথা পাতি ট্ৰাম্পে কয় যে ৰাষ্ট্ৰপতি পুটিনক লৈ মই অতি হতাশ হৈছো।
তেওঁ বৰ ভালকৈ কথা কয়। কথা কোৱাৰ বিশেষজ্ঞ যদিও ৰাতিৰ আন্ধাৰত মানুহৰ ওপৰত বোমা নিক্ষেপ কৰে।
শেহতীয়াকৈ চলি থকা এই যুদ্ধৰ মাজতে পুটিনৰ সৈতে হোৱা বাৰ্তালাপৰ প্ৰেক্ষাপটত ট্ৰাম্পে এই মন্তব্য কৰে।
দৰাচলতে কাৰ্যকালৰ আৰম্ভণিৰে পৰাই ট্ৰাম্পে এই যুদ্ধৰ অন্ত পেলাব বিচাৰিছিল।কিন্তু ৰাছিয়াই যোৱা কেইদিনমানৰ পৰা ইউক্ৰেইনত ড্ৰ’ন আৰু মিছাইল আক্ৰমণৰ গতি বৃদ্ধি কৰি ট্ৰাম্পক ক্ষুব্ধ কৰি তুলিছে।
২০ জানুৱাৰীত আমেৰিকাৰ ৰাষ্ট্ৰপতি হিচাপে শপত গ্ৰহণ কৰাৰ পিছত ট্ৰাম্পে স্পষ্ট কৰি দিছিল যে চলি থকা যুদ্ধ ৰোধ কৰাটোৱেই তেওঁৰ অগ্ৰাধিকাৰ।
কিন্তু মাৰ্চ মাহৰ পৰা ৰাছিয়াই ইউক্ৰেইনৰ ওপৰত আক্ৰমণ তীব্ৰতৰ কৰি তুলিছে।ট্ৰাম্পে এই আক্ৰমণসমূহক পুটিনৰ দ্বৈত মানদণ্ডৰ সৈতে জড়িত কৰি তুলিছে, য’ত তেওঁ দিনত শান্তিৰ কথা কয় কিন্তু ৰাতি আক্ৰমণ কৰে।
শেহতীয়াকৈ ট্ৰাম্পে পুটিনৰ সৈতে কেইবাবাৰো ফোনত কথা পাতিছে, য’ত তেওঁ এই যুদ্ধৰ অন্ত পেলাবলৈ শান্তি আলোচনা অনুষ্ঠিত কৰাৰ চেষ্টা কৰিছিল।
ইয়াৰ পূৰ্বে ট্ৰাম্পে পুটিনৰ সৈতে ভাল সম্পৰ্ক থকা বুলি দাবী কৰিছিল যদিও আক্ৰমণ আৰু শান্তি আলোচনাত পুটিনৰ অসহযোগী মনোভাৱক লৈ বাৰে বাৰে হতাশা প্ৰকাশ কৰিছিল।
ট্ৰাম্পে ৰাছিয়াৰ ওপৰত নতুন নিষেধাজ্ঞা আৰোপ কৰিবলৈ আমেৰিকা আৰু ইউৰোপীয় মিত্ৰ দেশসমূহক হেঁচা দিছিল।
লগতে পঢ়ক: পুনৰ ভয়ংকৰ বিমান দুৰ্ঘটনা; উৰণৰ পিছতেই দাউ দাউ কৈ জ্বলি উঠিল বিমান
