নাছাই তুলিলে মংগল গ্ৰহৰ আগ্নেয়গিৰিৰ প্ৰথমখন ছবি
নাছাৰ মংগল অডিচি অৰ্বিটাৰে ২০২৫ চনৰ ২ মে’ত মংগল গ্ৰহত এনে এক অনন্য দৃশ্য আৱদ্ধ কৰিছিল য’ত ডাৱৰৰ ওপৰত প্ৰাচীন আগ্নেয়গিৰি আৰ্ছিয়া মন্স দেখা গৈছিল । এই ছবি ৬ জুন, ২০২৫ তাৰিখে শ্বেয়াৰ কৰা হৈছিল ।
পৃথিৱীৰ পৰা গড়ে ২২৫ নিযুত কিলোমিটাৰ দূৰত্বত থকা মংগল গ্ৰহত আৰ্ছিয়া মন্স হৈছে এক বিশাল আগ্নেয়গিৰি । ই থাৰচিছ মণ্টেছ নামৰ আগ্নেয়গিৰিৰ অঞ্চলত অৱস্থিত, য’ত আন দুটা শ্বীল্ড আগ্নেয়গিৰিও আছে, পাভ’নিছ মন্স আৰু এছক্ৰেয়াছ মন্স । আৰ্ছিয়া মন্সৰ উচ্চতা ১২ মাইল (২০ কিলোমিটাৰ) আৰু পৃথিৱীৰ আটাইতকৈ ওখ পৰ্বত মাউণ্ট এভাৰেষ্টতকৈ দুগুণ ওখ । অৱশ্যে গ্ৰহটোৰ আটাইতকৈ ওখ আগ্নেয়গিৰিটো হ’ল অলিম্পচ মন্স ।
এই গ্ৰহৰ পৃষ্ঠত থকা ৰাসায়নিক মৌল আৰু খনিজ পদাৰ্থৰ মানচিত্ৰ নিৰ্মাণৰ লক্ষ্যৰে ২০০১ চনত মংগল অডিচি অভিযান আৰম্ভ কৰা হৈছিল । ২০০৪ চনত ই প্ৰাথমিক অভিযান সম্পূৰ্ণ কৰিছিল যদিও ৰঙা গ্ৰহটোৰ পৃষ্ঠ, ডাৱৰ, কুঁৱলী আৰু বতৰৰ ওপৰত অধ্যয়ন অব্যাহত ৰাখিছিল । ২০২৩ চনৰ পৰা অডিচিয়ে গ্ৰহটোৰ দিগন্তৰ উচ্চ উচ্চতাৰ ছবি তুলিবলৈ আৰম্ভ কৰে ।
২০২৫ চনৰ ২ মে’ত সূৰ্য্য উদয়ৰ ঠিক আগতেই অডিচিয়ে আৰ্ছিয়া মন্সক বন্দী কৰে । এই ছবিখনত গ্ৰহটোৰ বায়ুমণ্ডল সেউজীয়া কুঁৱলীৰ দৰে দেখা গৈছে । আৰ্ছিয়া মন্স ডাৱৰৰ ওপৰত ক’লা দাগ হিচাপে উঠি যায় । এইটোৱেই হৈছে এই গ্ৰহত আগ্নেয়গিৰিৰ প্ৰথম দিগন্তমুখী ছবি ।
এই ছবিখন থাৰ্মেল ইমিছন ইমেজিং চিষ্টেম (THEMIS) কেমেৰাৰ সহায়ত তোলা হৈছে । THEMIS এ ৰঙা গ্ৰহটোৰ পৃষ্ঠত পানীৰ বৰফ থকা অঞ্চলৰ মানচিত্ৰ নিৰ্মাণ কৰাত সহায় কৰে, যিটো ভৱিষ্যতে মংগল গ্ৰহত অৱতৰণ কৰা প্ৰথম মহাকাশচাৰীৰ অৱতৰণ স্থান বাছনি কৰাত উপযোগী হ’ব পাৰে ।
লগতে পঢ়ক : ISRO ৰ সফলতা; প্ৰথমবাৰলৈ উত্তৰ প্ৰদেশত পেলোডৰ সৈতে ৰকেট উৎক্ষেপণ পৰীক্ষণ
