আমেৰিকাৰ ৰাষ্ট্ৰপতি ড’নাল্ড ট্ৰাম্পে পুনৰ হুংকাৰ দিছে যে আমেৰিকাৰ ক্ষতি কৰা যিকোনো দেশৰ ওপৰত আমেৰিকা চৰকাৰে শুল্ক আৰোপ কৰিব । ড’নাল্ড ট্ৰাম্পে ভাৰত, চীন আৰু ব্ৰাজিলৰ নাম উল্লেখ কৰি কয় যে এই দেশসমূহে সৰ্বাধিক শুল্ক আৰোপ কৰে । ফ্ল’ৰিডাত ৰিপাব্লিকান পাৰ্টিৰ এক অনুষ্ঠানত ড’নাল্ড ট্ৰাম্পে কয় যে আমি আমাৰ ক্ষতি কৰা দেশ আৰু বাহিৰৰ লোকৰ ওপৰত শুল্ক আৰোপ কৰিবলৈ ওলাইছো । যদিও তেওঁলোকে নিজৰ দেশৰ বাবে ভাল কাম কৰি আছে, তথাপিও ইয়াৰ ফলত আমাৰ ক্ষতি হ’ব পাৰে ।
ট্ৰাম্পে ভাৰত আৰু চীনৰ নাম লয়-
ট্ৰাম্পে কয়, ‘আন দেশসমূহে কি কৰি আছে, চীন এখন উচ্চ শুল্ক আৰোপ কৰা দেশ আৰু একেদৰে ভাৰত আৰু ব্ৰাজিলকে ধৰি বহু দেশেই তেনে কৰে । কিন্তু এতিয়া এনেকুৱা নহ’ব কাৰণ আমাৰ নীতি হৈছে আমেৰিকা ফাৰ্ষ্ট । আমেৰিকাই এনে ব্যৱস্থা সৃষ্টি কৰিব যিটো ন্যায্য হ’ব আৰু যিয়ে আমাৰ কোষাগাৰলৈ ধন আনিব আৰু আমেৰিকা পুনৰ ধনী হ’ব আৰু এইটো অতি সোনকালে হ’ব । ট্ৰাম্পে কয় যে আমেৰিকাক সেই ব্যৱস্থালৈ ঘূৰি অহাৰ প্ৰয়োজন যিয়ে ইয়াক ধনী আৰু সমৃদ্ধিশালী কৰি তুলিছিল ।
ড’নাল্ড ট্ৰাম্পে কয় যে আমি আমাৰ নাগৰিকৰ ওপৰত কৰ আৰোপ কৰি আন দেশক ধনী নকৰোঁ, বৰঞ্চ আমি আন দেশৰ ওপৰত শুল্ক আৰোপ কৰি আমাৰ নাগৰিকক ধনী কৰিম । আন দেশৰ ওপৰত শুল্ক বৃদ্ধিৰ লগে লগে আমেৰিকানসকলৰ ওপৰত কৰ হ্ৰাস পাব, যাৰ ফলত বৃহৎ সংখ্যক চাকৰি আৰু কাৰখানাৰ সৃষ্টি হ’ব । ইয়াৰ পূৰ্বে ট্ৰাম্পে ব্ৰিকছ দেশসমূহৰ ওপৰতো ১০০ শতাংশ শুল্ক আৰোপ কৰাৰ হুংকাৰ দিছিল । ভাৰতো ব্ৰিকছ গোটৰ অংশ । এনে পৰিস্থিতিত ট্ৰাম্পৰ এই ঘোষণাৰ বাবেই ভাৰতৰ সমস্যা বাঢ়িব পাৰে ।
আমেৰিকাত কাৰখানা স্থাপন কৰা কোম্পানীসমূহক সহায় কৰিব-
আমেৰিকাৰ ৰাষ্ট্ৰপতিগৰাকীয়ে কয় যে যিসকলে শুল্ক পৰিহাৰ কৰিব বিচাৰে তেওঁলোকক আমেৰিকাতেই কোম্পানী আৰু কাৰখানা স্থাপন কৰিবলৈ কোৱা হ’ব । ইয়াৰ ফলত আমেৰিকাত চাকৰি বৃদ্ধি পাব । ট্ৰাম্পে কয় যে ইয়াত বিশেষকৈ ঔষধ, অৰ্ধপৰিবাহী আৰু তীখাৰ দৰে উদ্যোগত কাৰখানা স্থাপন কৰা কোম্পানীসমূহক আমেৰিকাই সহায় কৰিব । ট্ৰাম্পে কয় যে তেওঁৰ প্ৰশাসনে তীখা, এলুমিনিয়াম আৰু তামৰ ওপৰতো শুল্ক আৰোপ কৰিব ।
