ৰাষ্ট্ৰপতি,প্ৰধানমন্ত্ৰী মোদীকে ধৰি অনেকজনৰ অভিনন্দন
আজিৰ পৰা ৬৩ বছৰ পূৰ্বে নাগালেণ্ড ভাৰতৰ ১৬ সংখ্যক ৰাজ্য হিচাপে প্ৰতিষ্ঠা হৈছিল । আজি ৰাজ্যখনৰ ৬৩ সংখ্যক প্ৰতিষ্ঠা দিৱস । ৰাজ্যখনৰ প্ৰতিষ্ঠা দিৱস উপলক্ষে প্ৰধানমন্ত্ৰী মোদী, ৰাষ্ট্ৰপতি দ্ৰৌপদী মুৰ্মু, বিৰোধী নেতা ৰাহুল গান্ধীকে ধৰি দেশৰ বহু নবীন-প্ৰবীণ নেতাই অভিনন্দন জনায় । প্ৰধানমন্ত্ৰী মোদীয়ে ছ’চিয়েল মিডিয়া প্লেটফৰ্ম এক্সত পোষ্ট কৰি নাগালেণ্ডবাসীক অভিনন্দন জনায় । তেওঁ কয় যে নাগালেণ্ডৰ চহকী সংস্কৃতি, সাহস আৰু সেৱাৰ মনোভাৱ সমগ্ৰ দেশতে প্ৰশংসিত । তেওঁ ৰাজ্যবাসীৰ উজ্জ্বল ভৱিষ্যত আৰু উন্নয়ন কামনা কৰে ।
আনহাতে, ৰাষ্ট্ৰপতি দ্ৰৌপদী মুৰ্মুৱেও নাগালেণ্ডবাসীক ৰাজ্যখনৰ ৬৩ সংখ্যক প্ৰতিষ্ঠা দিৱস উপলক্ষে শুভেচ্ছা জনায় । তেওঁ কয় যে নাগালেণ্ডৰ প্ৰাকৃতিক সৌন্দৰ্য্য, চহকী সংস্কৃতি আৰু জনজাতীয় বৈচিত্ৰ্য গৌৰৱৰ বিষয় । প্ৰতিষ্ঠা দিৱসত ৰাজ্যখনত শান্তি, সমৃদ্ধি আৰু প্ৰগতি কামনা কৰে ৰাষ্ট্ৰপতিগৰাকীয়ে ।
গৃহমন্ত্ৰী অমিত শ্বাহেও নাগালেণ্ডৰ প্ৰতিষ্ঠা দিৱসত ৰাজ্যবাসীক অভিনন্দন জ্ঞাপন কৰে । উত্তৰ-পূৰ্বাঞ্চল ৰাজ্যখনৰ চহকী পৰম্পৰা আৰু ইয়াৰ জনসাধাৰণৰ সবল মনোভাৱে দেশৰ সাংস্কৃতিক ঐক্যক অধিক মজবুত কৰি তুলিছে বুলি তেওঁ কয় । ছ’চিয়েল মিডিয়া প্লেটফৰ্ম এক্সৰ এক পোষ্টত অমিত শ্বাহে লিখিছে যে তেওঁ নাগালেণ্ডৰ ভাই-ভনীসকলক প্ৰতিষ্ঠা দিৱসৰ আন্তৰিক শুভেচ্ছা জনাইছে । ৰাজ্যখনৰ সজীৱ পৰম্পৰা আৰু জনসাধাৰণৰ দৃঢ়তাই আমাৰ দেশৰ সাংস্কৃতিক ঐতিহ্যক শক্তিশালী কৰে । নগালেণ্ড যাতে শান্তি, প্ৰগতি আৰু সমৃদ্ধিৰে আগবাঢ়ে তাৰ কামনা কৰিলোঁ ।
ইফালে প্ৰতিৰক্ষা মন্ত্ৰী ৰাজনাথ সিঙেও নাগালেণ্ডবাসীক শুভেচ্ছা বাৰ্তা প্ৰদান কৰে । তেওঁ কয় যে প্ৰতিষ্ঠা দিৱসত নাগালেণ্ডবাসীক শুভেচ্ছা জনালোঁ । ৰাজ্যখনৰ চহকী সাংস্কৃতিক ঐতিহ্য, শক্তিশালী মনোভাৱ আৰু ৰাষ্ট্ৰৰ উন্নয়নত নাগালেণ্ডৰ অৱদান আমাৰ সকলোৰে বাবে গৌৰৱৰ বিষয় । আগন্তুক বছৰে ৰাজ্যখনলৈ নতুন সম্ভাৱনা, প্ৰগতি আৰু সমৃদ্ধি কঢ়িয়াই আনক ।
উল্লেখ্য যে, ১৯৬৩ চনৰ ১ ডিচেম্বৰত নাগালেণ্ডক ভাৰতৰ ১৬ সংখ্যক ৰাজ্য হিচাপে ঘোষণা কৰা হৈছিল আৰু তেতিয়াৰ পৰাই এই দিৱস প্ৰতি বছৰে প্ৰতিষ্ঠা দিৱস হিচাপে পালন কৰি অহা হৈছে ।
লগতে পঢ়ক : আজিৰ পৰা আৰম্ভ সংসদৰ শীতকালীন অধিৱেশন; SIRক লৈ বিতৰ্কৰ সম্ভাৱনা
