শনিবাৰে যোৰহাটত সংঘটিত হোৱা শোকাৱহ বিমান দুৰ্ঘটনাত সৰ্বোচ্চ বলিদান দিলে দেশৰ সেৱাত নিয়োজিত ভাৰতীয় বায়ুসেনাৰ পাঁজনকৈ জোৱানে । ইফালে ভাৰতীয় বায়ুসেনাই ততালিকে এই ঘটনাৰ এক উচ্চ পৰ্যায়ৰ তদন্তৰ নিৰ্দেশ দিছে । প্ৰকিৰক্ষা মন্ত্ৰী ৰাজনাথ সিঙে এই দুখজনক ঘটনাক লৈ শোক প্ৰকাশ কৰি এই দুখৰ সময়ত সমগ্ৰ দেশবাসী শোকসন্তপ্ত পৰিয়ালবৰ্গৰ সৈতে আছে বুলি ঘোষণা কৰে ।
অসমৰ যোৰহাট এয়াৰবেচত সংঘটিত হোৱা শোকাৱহ বিমান দুৰ্ঘটনাৰ ডাঙৰ খবৰ । ভাৰতীয় বায়ুসেনাৰ এখন ‘এণ্টনভ এন-৩২’ (An-32) নামৰ পৰিবহন বিমান দুৰ্ঘটনাগ্ৰস্ত হোৱাৰ ফলত দেশৰ সেৱাত নিয়োজিত পাঁচগৰাকী সাহসী জোৱানে সৰ্বোচ্চ বলিদান দি শ্বহীদ হয় । বায়ুসেনাৰ চৰকাৰী সূত্ৰই এই বেদনাদায়ক ঘটনাৰ খবৰ নিশ্চিত কৰিছে ।
অৱশ্যে এই ভয়ংকৰ দুৰ্ঘটনাৰ মাজতো একমাত্ৰ সকাহৰ খবৰ এয়ে যে বিমানখনৰ সহ-পাইলটগৰাকী অলৌকিকভাৱে প্ৰাণৰক্ষা পৰিছে । বৰ্তমান তেওঁ গুৰুতৰভাৱে আঘাতপ্ৰাপ্ত হৈ চিকিৎসালয়ত চিকিৎসাধীন হৈ আছে ।
শ্বহীদ হোৱা দেশৰ পাঁচগৰাকী বীৰ জোৱান :
দুৰ্ঘটনাত দেশৰ বাবে প্ৰাণ আহুতি দিয়া বায়ুসেনাৰ জোৱানসকল হৈছে—
-স্কোয়াড্ৰন লিডাৰ প্ৰশান্ত সিং
-ফ্লাইট লেফটিনেন্ট শুভম কুমাৰ
-চাৰ্জেণ্ট জিতেন্দ্ৰ শৰ্মা
-অগ্নিবীৰবায়ু খেমাৰাম কুমাৱত
-অগ্নিবীৰবায়ু দানিছ আলম
বায়ুসেনাৰ শোক প্ৰকাশ :
এই অভিশপ্ত ঘটনাক লৈ ভাৰতীয় বায়ুসেনাই এক চৰকাৰী বিবৃতিযোগে গভীৰ শোক প্ৰকাশ কৰিছে । বায়ুসেনাৰ তৰফৰ পৰা জনোৱা হৈছে, “ভাৰতীয় বায়ুসেনাই শোকসন্তপ্ত পৰিয়ালবৰ্গৰ প্ৰতি গভীৰ সমবেদনা জ্ঞাপন কৰিছে । দুখৰ এই কঠিন মুহূৰ্তত সমগ্ৰ বায়ুসেনা শ্বহীদসকলৰ পৰিয়ালৰ সৈতে দৃঢ়তাৰে থিয় দিছে ।”
‘কোৰ্ট অৱ ইনকুৱাৰী’ৰ উচ্চ পৰ্যায়ৰ তদন্তৰ নিৰ্দেশ :
ঘটনাৰ গুৰুত্ব আৰু ভয়াৱহতাৰ প্ৰতি লক্ষ্য ৰাখি ভাৰতীয় বায়ুসেনাৰ শীৰ্ষ বিষয়াসকলে ততালিকে এক উচ্চ পৰ্যায়ৰ তদন্তৰ নিৰ্দেশ দিছে । এই দুৰ্ঘটনা কেনেকৈ আৰু কি পৰিস্থিতিত সংঘটিত হ’ল, তাৰ প্ৰকৃত কাৰণ বিচাৰি উলিয়াবলৈ এটা ‘কোৰ্ট অৱ ইনকুৱাৰী’ (তদন্ত সমিতি) গঠন কৰা হৈছে ।
ৰাজনাথ সিঙৰ শোকপ্ৰকাশ-
ইফালে প্ৰতিৰক্ষা মন্ত্ৰী ৰাজনাথ সিঙে এই শোকাৱহ বিমান দুৰ্ঘটনাত নিহত জোৱান সকলৰ প্ৰতি গভীৰ শোক প্ৰকাশ কৰাৰ লগতে এই দুখৰ সময়ত সমগ্ৰ দেশবাসী শোকসন্তপ্ত পৰিয়ালবৰ্গৰ সৈতে আছে বুলি ঘোষণা কৰে ।
ৰাজনাথ সিঙে কয়, “অসমৰ যোৰহাটত সংঘটিত এন-৩২ বিমান দুৰ্ঘটনাত পাঁচগৰাকী বায়ুসেনাৰ জোৱানক হেৰুৱাই মই গভীৰভাৱে মৰ্মাহত হৈছোঁ । দেশৰ সেৱাত নিয়োজিত অৱস্থাতে স্কোয়াড্ৰন লিডাৰ প্ৰশান্ত সিং, ফ্লাইট লেফটিনেন্ট শুভম কুমাৰ, চাৰ্জেণ্ট জিতেন্দ্ৰ শৰ্মা, অগ্নিবীৰবায়ু খেমাৰাম কুমাৱত আৰু অগ্নিবীৰবায়ু দানিছ আলমে নিজৰ সৰ্বোচ্চ বলিদান দিলে । দেশৰ প্ৰতি তেওঁলোকৰ সাহস আৰু সেৱাক সদায় গৌৰৱ আৰু কৃতজ্ঞতাৰে স্মৰণ কৰা হ’ব । শোকসন্তপ্ত পৰিয়ালবৰ্গলৈ মই মোৰ অন্তৰ্থক সমবেদনা জ্ঞাপন কৰিছোঁ । দুখৰ এই কঠিন মুহূৰ্তত সমগ্ৰ দেশ তেওঁলোকৰ সৈতে দৃঢ়তাৰে থিয় দিছে ।”
লগতে পঢ়ক : যোৰহাটৰ ৰৰৈয়াত অঘটন; অৱতৰণৰ পাছতেই বিস্ফোৰণ বায়ুসেনাৰ বিমান
