এজেন্সীটোৱে UGC-NET জুন ২০২৬ পৰীক্ষাৰ বাবে অনলাইন আবেদন পত্ৰ জমা দিয়াৰ অন্তিম তাৰিখ বৃদ্ধি কৰাৰ কথা ঘোষণা কৰিছে

নেশ্যনেল টেষ্টিং এজেন্সীয়ে (NTA) সমগ্ৰ দেশৰ ছাত্ৰ-ছাত্ৰীৰ অনুৰোধৰ প্ৰতি সঁহাৰি জনাই এক গুৰুত্বপূৰ্ণ সিদ্ধান্ত গ্ৰহণ কৰিছে । এজেন্সীটোৱে UGC-NET জুন ২০২৬ পৰীক্ষাৰ বাবে অনলাইন আবেদন পত্ৰ জমা দিয়াৰ অন্তিম তাৰিখ বৃদ্ধি কৰাৰ কথা ঘোষণা কৰিছে । ইয়াৰ লগতে পৰীক্ষাৰ মাছুল পৰিশোধ আৰু আবেদন পত্ৰৰ ভুল সংশোধনৰ বাবেও সংশোধিত সময়সীমা প্ৰকাশ কৰা হৈছে ।

ছ’চিয়েল মিডিয়া প্লেটফৰ্ম এক্সত (X) এই ‘ভাল খবৰ’ শ্বেয়াৰ কৰি NTA-ই স্পষ্ট কৰি দিছে যে আবেদন কৰাৰ এইয়াই শেষ সুযোগ আৰু ইয়াৰ পিছত কোনো ধৰণৰ সময় বৃদ্ধি কৰা নহ’ব ।

UGC-NET জুন ২০২৬-ৰ গুৰুত্বপূৰ্ণ সময়সীমা :

• আবেদন পত্ৰ জমা দিয়াৰ অন্তিম তাৰিখ: ২৪ মে’, ২০২৬ (নিশা ১১:৫০ বজালৈ)
• মাছুল পৰিশোধৰ অন্তিম তাৰিখ: ২৪ মে’, ২০২৬ (নিশা ১১:৫০ বজালৈ)
• আবেদন পত্ৰৰ সংশোধন উইণ্ড’ (Correction Window): ২৬ মে’ৰ পৰা ২৮ মে’, ২০২৬ (নিশা ১১:৫০ বজালৈ)

উল্লেখ্য যে, ২০১৮ চনৰ ডিচেম্বৰ মাহৰ পৰা NTA-ই কম্পিউটাৰ ভিত্তিক টেষ্ট (CBT) মাধ্যমত এই UGC NET পৰীক্ষা অনুষ্ঠিত কৰি আহিছে । ভাৰতীয় বিশ্ববিদ্যালয় আৰু মহাবিদ্যালয়সমূহত সহকাৰী অধ্যাপক আৰু জুনিয়ৰ ৰিচাৰ্চ ফেল’শ্বিপ (JRF) লাভৰ যোগ্যতা নিৰূপণৰ ক্ষেত্ৰত এই পৰীক্ষা অত্যন্ত গুৰুত্বপূৰ্ণ । পৰীক্ষাৰ প্ৰথম আৰু দ্বিতীয় দুয়োখন পত্ৰৰ সামগ্ৰিক প্ৰদৰ্শনৰ ওপৰত ভিত্তি কৰিয়েই এই যোগ্যতা নিৰ্ণয় কৰা হয় ।

NEET (UG) প্ৰাৰ্থীৰ বাবে মাছুল ঘূৰাই পোৱাৰ বিশেষ সুবিধা :

আন এক গুৰুত্বপূৰ্ণ জাননীত NTA-ই জনাইছে যে NEET (UG)-২০২৬ ৰ পঞ্জীয়ন প’ৰ্টেলত এটা নতুন লিংক সক্ৰিয় কৰা হৈছে । এই লিংকৰ জৰিয়তে পৰীক্ষাৰ মাছুল ঘূৰাই পোৱাৰ (Fee Refund) বাবে যোগ্য প্ৰাৰ্থীসকলে নিজৰ পছন্দৰ বেংক একাউণ্টৰ সবিশেষ তথ্য জমা দিব পাৰিব ।

NTA-ৰ আহ্বান :

যোগ্য প্ৰাৰ্থীসকলে নিজৰ লগ-ইন ক্ৰিডেনচিয়েল ব্যৱহাৰ কৰি প’ৰ্টেলত প্ৰৱেশ কৰিব লাগিব আৰু বেংক একাউণ্টৰ সবিশেষ তথ্য সঠিকভাৱে আপলোড কৰিব লাগিব ।

১২ মে’, ২০২৬ ত প্ৰকাশিত পাব্লিক ন’টিচৰ ধাৰাবাহিকতা ৰক্ষা কৰি জাৰি কৰা এই নিৰ্দেশনা অনুসৰি, বেংক একাউণ্টৰ সবিশেষ তথ্য জমা দিয়াৰ অন্তিম সময়সীমা হৈছে ২৭ মে’, ২০২৬ (নিশা ১১:৫০ বজালৈ) ।

লগতে পঢ়ক : NEET পৰীক্ষা সন্দৰ্ভত ডাঙৰ ঘোষণা; সলনি হ’ব পৰীক্ষাৰ ফৰ্মেট