কামপুৰত শনিবাৰে সংঘটিত হোৱা ৰেল দুৰ্ঘটনাক লৈ কঠোৰ মুখ্যমন্ত্ৰী হিমন্ত বিশ্ব শৰ্মা । ঘটনাত সাতটাকৈ হাতীৰ মৃত্যুত দুখ প্ৰকাশ কৰি বন বিভাগ কঠোৰ নিৰ্দেশ দিলে মুখ্যমন্ত্ৰীগৰাকীয়ে ।

কামপুৰত শুকুৰবাৰে গভীৰ নিশা ছাইৰাং-নতুন দিল্লী ৰাজধানী এক্সপ্ৰেছৰ সৈতে এজাক হাতীৰ সংঘৰ্ষত ৭টা হাতী নিহত হোৱাৰ লগতে আন এটা হাতীৰ পোৱালী গুৰুতৰভাৱে আহত হৈছে । এই ৰেল দুৰ্ঘটনাত পাঁচটা ডবা আৰু ৰে’লখনৰ ইঞ্জিন ৰেলপথৰ পৰা লাইনচ্যুত হয় । প্ৰথম অৱস্থাত আটাইকেইটা হাতীৰ মৃত্যুৰ খবৰ পোৱা গৈছিল যদিও পৰৱৰ্তী সময়ত ইয়াৰে এটা হাতী পোৱালী আহত অৱস্থাত উদ্ধাৰ হোৱা বুলি জানিব পৰা যায় । ৰাজ্যখনৰ মুখ্যমন্ত্ৰী হিমন্ত বিশ্ব শৰ্মাই এই ঘটনাক লৈ টুইটাৰযোগে শোক প্ৰকাশ কৰে ।

তেওঁ লিখিছে যে আজি পুৱা সংঘটিত হোৱা এক মৰ্মান্তিক ৰেল দুৰ্ঘটনাত ৭টা হাতী – তিনিটা প্ৰাপ্তবয়স্ক আৰু চাৰিটা পোৱালিৰ মৃত্যুত তেওঁ গভীৰ শোক প্ৰকাশ কৰিছোঁ । এই অত্যন্ত চিন্তনীয় দুৰ্ঘটনাৰ বিশদ তদন্ত কৰিবলৈ আৰু বিশেষকৈ কম দৃশ্যমানতাৰ বতৰত আমাৰ বন্যপ্ৰাণী কৰিডৰসমূহৰ সুৰক্ষা বৃদ্ধিৰ বাবে পদক্ষেপ ল’বলৈ বন বিভাগক নিৰ্দেশ দিছো ।

এগৰাকী বিষয়াই কয় যে, “মৃত সাতটা হাতীৰ মৰণোত্তৰ পৰীক্ষা চলি আছে আৰু আহত হাতী পোৱালীটোৰ চিকিৎসা স্থানীয় পশু চিকিৎসকে কৰি আছে । আইনী আনুষ্ঠানিকতা সম্পূৰ্ণ কৰা হৈছে ।” উত্তৰ-পূব সীমান্ত ৰে’লৱেৰ মুখ্য মুখপাত্ৰ কপিঞ্জল কিশোৰ শৰ্মাই জানিবলৈ দিয়া মতে, গুৱাহাটীৰ পৰা প্ৰায় ১২৬ কিলোমিটাৰ নিলগৰ লামডিং সংমণ্ডলৰ যমুনামুখ-কামপুৰ অংশত সংঘটিত হৈছে এই ৰেল দুৰ্ঘটনা । তেওঁ কয় যে এই দুৰ্ঘটনাটো হাতী পথ হিচাপে নিৰ্ধাৰণ নকৰা অঞ্চলত সংঘটিত হৈছে । শৰ্মাই কয়, “এজাক হাতী দেখি ৰে’লৰ চালকে জৰুৰীকালীন ব্ৰেক লগায় । তথাপিও হাতীকেইটাৰ সৈতে ৰে’লৰ সংঘৰ্ষ হয় ।”

এন এফ আৰৰ এগৰাকী মুখপাত্ৰই জনোৱা মতে, ক্ষতিগ্ৰস্ত ডবাসমূহৰ যাত্ৰীসকলক অস্থায়ীভাৱে অন্য ডবাৰ খালী আসনলৈ নিয়া হয় আৰু ৰে’লখন পুৱা ৬:১১ বজাত গুৱাহাটী অভিমুখে ৰাওনা হয় । অৱশ্যে ক্ষতিগ্ৰস্ত ডবাকেইটা ঘটনাস্থলীতে এৰি থৈ যায় । তেওঁ উল্লেখ কৰে যে যাত্ৰীসকলক ৰখাৰ বাবে গুৱাহাটীত ৰে’লখনত অতিৰিক্ত ডবা সংলগ্ন কৰা হ’ব, তাৰ পিছত ৰে’লখনে পুনৰ যাত্ৰা আৰম্ভ কৰিব । শৰ্মাই উল্লেখ কৰে যে ক্ষতিগ্ৰস্ত অংশৰ মাজেৰে পাৰ হৈ যোৱা ৰে’লসমূহ আপ লাইনলৈ ডাইভাৰ্ট কৰা হৈছে আৰু ৰে’ল যাতায়ত পুনৰুদ্ধাৰৰ কাম চলি আছে । ছাইৰাং-নতুন দিল্লী ৰাজধানী এক্সপ্ৰেছে মিজোৰামৰ চাইৰাং (আইজলৰ ওচৰত)ক আনন্দ বিহাৰ টাৰ্মিনেল (দিল্লী)ৰ সৈতে সংযোগ কৰে ।

লগতে পঢ়ক : দুদিনীয়া কাৰ্যসূচীৰে অসমত উপস্থিত প্ৰধানমন্ত্ৰী নৰেন্দ্ৰ মোদী, মুকলি কৰিলে বৰঝাৰ বিমানবন্দৰৰ নতুন টাৰ্মিনেল