হিমাচল প্ৰদেশৰ বিলাসপুৰত ভয়ংকৰ অঘটন; এতিয়ালৈকে উদ্ধাৰ ১৫টা মৃতদেহ
হিমাচল প্ৰদেশৰ বিলাসপুৰত ভয়ংকৰ অঘটন
হিমাচল প্ৰদেশৰ বিলাসপুৰত সংঘটিত হৈছে এক ভয়ংকৰ ঘটনা । এখন যাত্ৰীবাহী বাছত ভূমিস্খলনৰ ধ্বংসাৱশেষ বাগৰি পৰাত এই ভয়ংকৰ অঘটন সংঘটিত হৈছে । জানিব পৰা মতে হিমাচল প্ৰদেশৰ বিলাসপুৰৰ মৰোটানৰ পৰা ঘুমাৰউইনলৈ যোৱা এখন যাত্ৰাবাহী বাছত শুক্ৰ খাদৰ পাৰৰ বৰথিনৰ ভল্লু দলঙৰ সমীপৰ এটা পাহাৰৰ পৰা ভূমিস্খলনৰ ধ্বংসাৱশেষ বাগৰি পৰে । ধ্বংসাৱশেষে বাছখন সম্পূৰ্ণৰূপে পুতি পেলাই । বাতৰি লিখাৰ সময়লৈকে বাছখনৰ ভিতৰৰ পৰা উদ্ধাৰ হৈছে ১৫টা মৃতদেহ । আনহাতে তিনিগৰাকী লোকক নিৰাপদে উদ্ধাৰ কৰা হৈছে ।
স্থানীয় প্ৰশাসন আৰু দুৰ্যোগ ব্যৱস্থাপনা দলে ধ্বংসাৱশেষ নিষ্কাশন আৰু আৱদ্ধ লোকসকলক উদ্ধাৰৰ বাবে কাম কৰি আছে । বাছখনত থকা লোকৰ সঠিক সংখ্যা এতিয়াও নিশ্চিত হোৱা নাই ।
আনহাতে উদ্ধাৰ আৰু সাহায্যৰ কামত স্থানীয় ৰাইজেও সহযোগিতা আগবঢ়াইছে । প্ৰশাসনে জনোৱা মতে, উদ্ধাৰ প্ৰচেষ্টা নিশাটো চলি থাকিব আৰু বাছৰ ভিতৰত আবদ্ধ হৈ থকাসকলক যিমান পাৰি সোনকালে নিৰাপদে উলিয়াই অনাৰ প্ৰচেষ্টা চলি আছে ।
মুখ্যমন্ত্ৰীৰ শোক প্ৰকাশ-
এই বাছ দুৰ্ঘটনাক লৈ গভীৰ শোক প্ৰকাশ কৰি হিমাচল প্ৰদেশৰ মুখ্যমন্ত্ৰী সুখবিন্দৰ সিং সুখুৱে উদ্ধাৰ অভিযান ক্ষিপ্ৰতাৰে কৰিবলৈ নিৰ্দেশ দিয়ে । তেওঁ মৃতকৰ প্ৰতি শোক প্ৰকাশ কৰাৰ লগতে তেওঁলোকৰ আত্মাৰ চিৰশান্তিৰ বাবে প্ৰাৰ্থনা কৰে । তেওঁ উল্লেখ কৰে যে এই জটিল সময়ত ৰাজ্য চৰকাৰে ক্ষতিগ্ৰস্ত পৰিয়ালসমূহৰ সৈতে দৃঢ়তাৰে থিয় দিছে আৰু তেওঁলোকক সম্ভৱপৰ সকলো সহায় আগবঢ়াব ।
মুখ্যমন্ত্রী সুখুৱে জিলা প্রশাসনৰ সৈতে অহৰহ যোগাযোগত আছে আৰু তেওঁলোকক সাহায্য আৰু উদ্ধাৰ অভিযান ক্ষিপ্ৰতাৰে কৰিবলৈ নিৰ্দেশ দিছে । আহতসকলক যাতে শীঘ্ৰেই চিকিৎসালয়লৈ লৈ যোৱা হয় আৰু তেওঁলোকৰ চিকিৎসাৰ বাবে পৰ্যাপ্ত ব্যৱস্থা কৰা হয় তাৰ বাবেও তেওঁ নিৰ্দেশ দিছে । মুখ্যমন্ত্রীয়ে চিমলাৰ পৰা অহৰহ পৰিস্থিতি নিৰীক্ষণ কৰি আছে ৷
লগতে পঢ়ক : ভয়ংকৰ দুৰ্ঘটনাৰ পৰা কথমপি ৰক্ষা পৰিল এয়াৰ ইণ্ডিয়াৰ বিমান
