হংকঙৰ বিধ্বংসী অগ্নিকাণ্ডত ৯৪ জনৰ মৃত্যু

হংকঙৰ টাই প’ অঞ্চলৰ ৱাং ফুক ক’ৰ্টৰ আৱাসিক কমপ্লেক্সত বিগত তিনিদিন ধৰি চলি থকা ভয়ংকৰ অগ্নিকাণ্ডই চহৰখনক জোকাৰি গৈছে।

আঠ মহলীয়া এই পুৰণি আৱাসিক কমপ্লেক্সটোত বেছিভাগ বাসিন্দা বৃদ্ধ আৰু পৰিয়াল আছিল।জুইয়ে সম্পূৰ্ণৰূপে সাতটা টাৱাৰ আগুৰি ধৰে।বৃহস্পতিবাৰে পুৱালৈকে ৯০ শতাংশ জুই নিয়ন্ত্ৰণ কৰা হৈছিল যদিও মৃতকৰ সংখ্যা বৃদ্ধি পাইয়েই আছে।

পুৱা ৯ বজাৰ ভিতৰত অনুসন্ধান অভিযান সম্পূৰ্ণ হোৱাৰ সম্ভাৱনা আছে।এই পৰ্যন্ত ৯৪ জন লোকৰ মৃত্যু হোৱা বুলি নিশ্চিত হৈছে,আনহাতে ৭৬ জন লোক আহত হোৱাৰ বিপৰীতে ইয়াৰে ১৫ জনৰ অৱস্থা অতি ভয়াৱহ হৈ আছে।

এতিয়াও ৩০০ৰো অধিক লোক সন্ধানহীন হৈ আছে। হংকঙৰ ইতিহাসত ৮০ বছৰৰ ভিতৰত এইটোৱেই হৈছে আটাইতকৈ ভয়ংকৰ অগ্নিকাণ্ড।

প্ৰাথমিক অনুসন্ধানত প্ৰকাশ পাইছে যে টাৱাৰটোৰ কামৰ সময়ত শ্ৰমিকসকলে চিগাৰেট খোৱাটোৱেই এই অগ্নিকাণ্ডৰ মূল কাৰণ হ’ব পাৰে।

প্ৰচণ্ড বতাহে মূহূৰ্ততে জুই এটা টাৱাৰৰ পৰা সাতটা টাৱাৰলৈ বিয়পাই দিয়ে।তাৰ বাসিন্দা সকলে কেইবামাহো ধৰি শ্ৰমিকসকলৰ গাফিলতিৰ অভিযোগো উত্থাপন কৰি আহিছিল বুলি জানিব পৰা গৈছে।

লগতে পঢ়ক: সুউচ্চ অট্টালিকাত বিধ্বংসী অগ্নিকাণ্ড; মৃত্যুৰ সংখ্যা ৪৪লৈ বৃদ্ধি