আই চি চি ‘হল অব ফে’ম’ত সৌৰভ গাংগুলী
এই মৰ্যাদাপূৰ্ণ সন্মান লাভ কৰা সৌৰভ গাংগুলী হৈছে ভাৰতৰ দ্বাদশগৰাকী ক্ৰিকেটাৰ
ভাৰতীয় ক্ৰিকেটৰ অন্যতম সফল আৰু প্ৰভাৱশালী অধিনায়ক সৌৰভ গাংগুলীলৈ এক ডাঙৰ সন্মান । আন্তৰ্জাতিক ক্ৰিকেট পৰিষদে (ICC) সোমবাৰে আনুষ্ঠানিকভাৱে ঘোষণা কৰে যে ভাৰতৰ এই প্ৰাক্তন তাৰকা ক্ৰিকেটাৰগৰাকীক আই চি চি ‘হল অব ফে’ম’ (ICC Hall of Fame) ৰ শেহতীয়া তালিকাত অন্তৰ্ভুক্ত কৰা হৈছে । এই মৰ্যাদাপূৰ্ণ সন্মান লাভ কৰা সৌৰভ গাংগুলী হৈছে ভাৰতৰ দ্বাদশগৰাকী ক্ৰিকেটাৰ । ক্ৰিকেট জগতৰ অন্যতম সৰ্বোচ্চ ব্যক্তিগত সন্মান লাভ কৰি গাংগুলীয়ে পুনৰ এবাৰ বিশ্ব ক্ৰিকেটত ভাৰতৰ নাম উজলাই তুলিছে ।
ভাৰতীয় ক্ৰিকেটক এক নতুন দিশ দিয়াৰ পুৰস্কাৰ
আই চি চিয়ে এক বিবৃতিত প্ৰকাশ কৰা অনুসৰি, এজন বেটছমেন আৰু এগৰাকী শ্ৰেষ্ঠ অধিনায়ক হিচাপে ক্ৰিকেটলৈ আগবঢ়োৱা অভূতপূৰ্ব অৱদানৰ বাবেই ৫৪ বছৰীয়া গাংগুলীক এই সৰ্বোচ্চ সন্মানেৰে বিভূষিত কৰা হৈছে । ভাৰতীয় ক্ৰিকেটৰ ইতিহাসত সৌৰভ গাংগুলীৰ নাম এক সুকীয়া স্থানত আছে । ২০০০ চনৰ আৰম্ভণিতে যেতিয়া ভাৰতীয় ক্ৰিকেট দলটো এক কঠিন সময়ৰ মাজেৰে পাৰ হৈছিল, তেতিয়া গাংগুলীয়ে দলৰ নেতৃত্ব কান্ধত তুলি লৈছিল । তেওঁ কেৱল দলটোক চম্ভালিয়েই ক্ষান্ত থকা নাছিল, বৰঞ্চ এক নিৰ্ভীক আৰু আক্ৰমণাত্মক নতুন ভাৰতীয় দল গঢ়ি তুলিছিল, যিয়ে দেশৰ লগতে বিদেশৰ মাটিত গৈও বিপক্ষক ধূলিসাৎ কৰিবলৈ শিকিছিল ।
এক দশক ধৰি বিশ্ব ক্ৰিকটেত আধিপত্য
সৌৰভ গাংগুলীৰ নেতৃত্বত ভাৰতে প্ৰায় এটা দশক ধৰি সমগ্ৰ বিশ্ব ক্ৰিকেটতে নিজৰ আধিপত্য বিস্তাৰ কৰিছিল । তেওঁৰ অধিনায়কত্বতে ভাৰতে ২০০২ চনত শ্ৰীলংকাৰ সৈতে যুটীয়াভাৱে আই চি চি চেম্পিয়নছ ট্ৰফীৰ খিতাপ অৰ্জন কৰিছিল । ইয়াৰ পিছত ২০০৩ চনৰ এদিনীয়া বিশ্বকাপত তেওঁ দলটোক ফাইনেললৈ লৈ গৈছিল, য’ত ভাৰতে ৰানাৰ্ছ-আপৰ খিতাপ লাভ কৰে । কেৱল ফলাফলৰ বাবেই নহয়, দলৰ খেলুৱৈসকলৰ মাজত ‘আমিও জিকিব পাৰো’ বুলি যি আত্মবিশ্বাস আৰু যুঁজি থকাৰ মানসিকতা গাংগুলীয়ে গঢ়ি তুলিছিল, তাৰ বাবেই তেওঁক ভাৰতৰ সৰ্বকালৰ শ্ৰেষ্ঠ অধিনায়কসকলৰ ভিতৰত অন্যতম বুলি গণ্য কৰা হয় ।
অফ-চাইডৰ ৰজা আৰু এদিনীয়া ক্ৰিকেটৰ কিংবদন্তি
বেটিং ক্ৰিজত সৌৰভ গাংগুলীৰ এলিগেঞ্চ বা আকৰ্ষণীয় শ্বট খেলা শৈলী আছিল চকুত লগা । বিশেষকৈ অফ-চাইডত তেওঁ খেলা কভাৰ ড্ৰাইভ আৰু স্কুৱেৰ কাটসমূহ আছিল অনন্য । সেইবাবেই তেওঁক ক্ৰিকেট জগতত ‘অফ-চাইডৰ ভগৱান’ বুলিও অভিহিত কৰা হৈছিল । এদিনীয়া ক্ৰিকেটৰ ফৰ্মেটত গাংগুলীৰ ৰেকৰ্ড আজিও অতি ঈৰ্ষণীয় । এদিনীয়া ক্ৰিকেটত ১১,০০০ তকৈও অধিক ৰান সংগ্ৰহ কৰি তেওঁ আজিও ভাৰতৰ সৰ্বাধিক ৰান সংগ্ৰহকাৰী বেটছমেনসকলৰ ভিতৰত অন্যতম হৈ আছে ।
যুৱ প্ৰতিভাক সুযোগ আৰু ভৱিষ্যতৰ মেচ-উইনাৰ সৃষ্টি
সৌৰভ গাংগুলীৰ আটাইতকৈ ডাঙৰ সফলতা আছিল তেওঁৰ দূৰদৰ্শিতা । তেওঁ সদায় যুৱ প্ৰতিভাক চিনি পাইছিল আৰু তেওঁলোকক সম্পূৰ্ণ সমৰ্থন দিছিল । আজিৰ তাৰিখত ভাৰতীয় ক্ৰিকেটৰ যিসকল খেলুৱৈক কিংবদন্তি বুলি কোৱা হয়, যেনে— এম এছ ধোনী, যুৱৰাজ সিং, হৰভজন সিং, বীৰেন্দ্ৰ সেহৱাগ আৰু জহীৰ খান- এই আটাইকেইগৰাকী খেলুৱৈক গাংগুলীয়েই প্ৰথমতে আন্তৰ্জাতিক ক্ৰিকেটত নিজৰ প্ৰতিভা প্ৰদৰ্শন কৰাৰ মুকলি সুযোগ দিছিল । এই খেলুৱৈসকলেই পৰৱৰ্তী সময়ত ভাৰতক ২০১১ চনৰ বিশ্বকাপ জয় কৰাত আটাইতকৈ গুৰুত্বপূৰ্ণ ভূমিকা পালন কৰিছিল ।
অৱসৰৰ পিছতো ক্ৰিকেটৰ সৈতে সম্পৰ্ক
ক্ৰিকট খেলুৱৈ হিচাপে অৱসৰ গ্ৰহণ কৰাৰ পিছতো সৌৰভ গাংগুলী ক্ৰিকেটৰ পৰা আঁতৰি থকা নাছিল । তেওঁ ক্ৰিকেট প্ৰশাসনত প্ৰৱেশ কৰে আৰু পৰৱৰ্তী সময়ত ভাৰতীয় ক্ৰিকেট নিয়ন্ত্ৰণ ব’ৰ্ড অৰ্থাৎ বি চি চি আই (BCCI) ৰ সভাপতি হিচাপে সফলতাৰে কাৰ্যনিৰ্বাহ কৰে । তেওঁৰ কাৰ্যকালত ভাৰতীয় ক্ৰিকেটৰ ঘৰুৱা আন্তঃগাঁথনি আৰু খেলুৱৈসকলৰ কল্যাণৰ বাবে কেইবাটাও ঐতিহাসিক পদক্ষেপ গ্ৰহণ কৰা হৈছিল ।
কিংবদন্তিসকলৰ এলিট ক্লাবত অন্তৰ্ভুক্ত ‘দাদা’
আই চি চিৰ এই ‘হল অব ফে’ম’ সন্মান লাভ কৰাৰ পিছত সৌৰভ গাংগুলীয়ে এতিয়া ক্ৰিকেটৰ এনে এটা এলিট ক্লাবত স্থান পালে, য’ত পূৰ্বৰে পৰা ভাৰতৰ কেইবাগৰাকীও মহান খেলুৱৈ উপস্থিত আছে । গাংগুলীয়ে এতিয়া বিনু মানকাড, কপিল দেৱ, সুনীল গাভাস্কাৰ, বিষেণ সিং বেদী, অনিল কুম্বলে, ৰাহুল দ্ৰাবিড়, শচীন টেণ্ডুলকাৰ, বীৰেন্দ্ৰ ছেহৱাগ, এম এছ ধোনীৰ দৰে মহান ক্ৰিকেটাৰসকলৰ সৈতে এই তালিকাত নাম অন্তৰ্ভুক্ত কৰি নিজৰ কেৰিয়াৰত আৰু এক সোণালী অধ্যায় সংযোগ কৰিলে ।
লগতে পঢ়ক : ক্ৰিকেট ইতিহাসৰ লজ্জাজনক পৰাজয়! ইংলেণ্ডৰ বিৰুদ্ধে ১২৫ ৰানত ধৰাশায়ী টীম ইণ্ডিয়া