জম্মু-কাশ্মীৰৰ ত্ৰালত নিৰাপত্তা বাহিনী আৰু সন্ত্ৰাসবাদীৰ মাজত পুনৰ সংঘৰ্ষৰ ঘটনা সংঘটিত হৈছে । এই সংঘৰ্ষত নিৰাপত্তা বাহিনীয়ে তিনিটা সন্ত্ৰাসবাদীক হত্যা কৰাত সফল হৈছে । ইতিমধ্যে সমগ্ৰ অঞ্চলটো ঘেৰাও কৰি ৰখা হৈছে । অব্যাহত আছে অনুসন্ধান অভিযান ।

সীমান্তত গুলীচালনা বন্ধ হোৱাৰ লগে লগে নিৰাপত্তা বাহিনীয়ে আত্মগোপন কৰি থকা সন্ত্ৰাসবাদীক নিৰ্মূল কৰিবলৈ আৰম্ভ কৰিছে । ইয়াৰ পূৰ্বে দক্ষিণ কাশ্মীৰৰ শ্বোপিয়ান জিলাত মঙলবাৰে পুৱা ৮ বজাত সন্ত্ৰাসবাদী আৰু নিৰাপত্তাৰক্ষীৰ মাজত সংঘৰ্ষৰ সৃষ্টি হয় । এই সংঘৰ্ষত লস্কৰ-ই-তৈবাৰ শীৰ্ষ সেনাধ্যক্ষ শ্বাহিদ কুট্টে আৰু আদনান শ্বাফীকে ধৰি তিনিটা সন্ত্ৰাসবাদী নিহত হয় ।

তৃতীয়টো সন্ত্ৰাসবাদী মুৰাণ (পুলৱামা)ৰ বাসিন্দা আহছান-উল হক শ্বেখ বুলি চিনাক্ত কৰা হৈছে । নিহত সন্ত্ৰাসবাদী কেইটাৰ হাতৰ পৰা বিপুল পৰিমাণৰ অস্ত্ৰ-শস্ত্ৰ আৰু গোলাবাৰুদ উদ্ধাৰ কৰা হৈছে । ইয়াৰ ভিতৰত আছে AK 47 ৰাইফল, মেগজিন, গ্ৰেনেড আৰু অন্যান্য সামগ্ৰী ।

পহলগাম আক্ৰমণৰ পিছত নিৰাপত্তা বাহিনীয়ে আন এক বৃহৎ সফলতা লাভ কৰিছে । অপাৰেচন সিন্দুৰৰ পিছত জম্মু-কাশ্মীৰত নিৰাপত্তা বাহিনীয়ে তিনি লস্কৰ সন্ত্ৰাসবাদীক হত্যা কৰিছে । মঙলবাৰে শ্বোপিয়াত সেনাই বৃহৎ অভিযান আৰম্ভ কৰি এই সফলতা অৰ্জন কৰে ।

তথ্য অনুসৰি মঙলবাৰে দক্ষিণ কাশ্মীৰৰ শ্বপিয়াৰ শুক্ৰু কেলৰ অঞ্চলত সন্ত্ৰাসবাদী আৰু নিৰাপত্তাৰক্ষীৰ যৌথ দলৰ মাজত সংঘৰ্ষৰ সৃষ্টি হয় । মঙলবাৰে পুৱাৰ ভাগত শ্বোপিয়ান জিলাত তালাচী অভিযানৰ সময়ত নিৰাপত্তা বাহিনীয়ে লস্কৰ-ই-তৈবাৰ সন্ত্ৰাসবাদী কেইটাক ঘেৰাও কৰে ।

এই অভিযানত দুয়ো পক্ষৰ পৰা গুলীচালনাৰ সূত্ৰপাত হয় । প্ৰথম সংঘৰ্ষত নিৰাপত্তা বাহিনীয়ে এটা সন্ত্ৰাসবাদীক হত্যা কৰে । কিছু সময়ৰ পাছত আৰু দুটা সন্ত্ৰাসবাদীক হত্যা কৰি সফলতা লাভ কৰে সেনাবাহিনীয়ে । উল্লেখ্য যে পহলগাম আক্ৰমণৰ লগত জড়িত পাকিস্তানী সন্ত্ৰাসবাদীৰ সন্ধানত নিৰাপত্তা বাহিনীয়ে অবিৰতভাৱে অভিযান চলাই আহিছে ।

এই অভিযানৰ অধীনত শ্বোপিয়ানৰ শুক্ৰু কেলৰ অঞ্চলত সন্ত্রাসবাদীক বিচাৰি অভিযান চলোৱা হৈছিল । এই সময়ছোৱাত নিৰাপত্তাৰক্ষীৰ লস্কৰ সন্ত্ৰাসবাদীৰ সৈতে মুখামুখি হয় । অৱশ্যে এই এনকাউণ্টাৰত নিহত সন্ত্ৰাসবাদী পহলগাম আক্ৰমণ কৰা সন্ত্ৰাসবাদী নহয় ।

ইতিমধ্যে নিহত দুটা সন্ত্ৰাসবাদীক শ্বাহিদ কুট্টাই আৰু আদনান শ্বাফি দাৰ বুলি চিনাক্ত কৰা হৈছে । শ্বাহিদ কুট্টাই ৮ এপ্ৰিলত ডেনিছ ৰিজ’ৰ্টত সংঘটিত হোৱা গুলীচালনাৰ কাণ্ডত জড়িত আছিল । ১৮ মে’ত শ্বোপিয়ানৰ হীৰপোৰাত বিজেপিৰ সৰ্পঞ্চক হত্যা কৰা ঘটনাৰ লগত জড়িত আছিল শ্বাহিদ কুট্টাই । আদনান শ্বাফি দাৰ ১৮ অক্টোবৰত শ্বোপিয়ানৰ ৱাচিত শ্ৰমিকক হত্যাৰ সৈতে জড়িত আছিল । বৰ্তমানেও ১টা সন্ত্ৰাসবাদী পৰিচয় উদ্ধাৰ হোৱা নাই ।

পহলগাম সন্ত্ৰাসবাদী আক্ৰমণৰ পিছতে জম্মু-কাশ্মীৰৰ বহু পৰ্যটনস্থলী বন্ধ হৈ পৰিছে । তথ্য অনুসৰি জম্মু-কাশ্মীৰ চৰকাৰে নিৰাপত্তা সংস্থাৰ পৰামৰ্শ মতে এই সিদ্ধান্ত গ্ৰহণ কৰিছে । কাশ্মীৰৰ ৮৭ খন পৰ্যটনস্থলীৰ ভিতৰত ৪৮ টা সন্ত্ৰাসবাদী আক্ৰমণৰ সম্ভাৱনা সন্দৰ্ভত চোৰাংচোৱাৰ সতৰ্কবাণীৰ বাবে বন্ধ কৰি দিয়া হৈছে ।

পহলগাম আক্ৰমণৰ পিছত উপত্যকাত সক্ৰিয় সন্ত্ৰাসবাদীৰ ঘৰ উৰুৱাই দিয়াৰ প্ৰতিশোধ ল’বলৈ টি আৰ টিয়ে এক বৃহৎ আক্ৰমণ সংঘটিত কৰাৰ চেষ্টাৰ লগতে একাংশ লক্ষ্যভিত্তিক হত্যাকাণ্ডৰ সন্দৰ্ভত অহৰহ চোৰাংচোৱা সতৰ্কবাণী প্ৰকাশ পাইছে । গুলমাৰ্গ, সোণামাৰ্গ আৰু হ্ৰদ অঞ্চলকে ধৰি কেইবাটাও স্পৰ্শকাতৰ পৰ্যটন স্থানত নিৰাপত্তা বাহিনীয়ে আৰক্ষীৰ স্পেচিয়েল অপ্ছ গ্ৰুপৰ এণ্টি ফিডাইন স্কোৱাড মোতায়েন কৰিছে । উপত্যকাত সংঘটিত সন্ত্ৰাসবাদী ঘটনাৰ পিছত সাধাৰণভাৱে নিৰাপত্তাও বৃদ্ধি কৰা হৈছে ।

আক্ৰমণৰ ফলত গভীৰভাৱে প্ৰভাৱিত হ’ব এই খণ্ডসমূহ !

এই আক্ৰমণে কাশ্মীৰৰ সকলো খণ্ডকে প্ৰভাৱিত কৰিব পাৰে । বিশেষকৈ পৰ্যটন ক্ষেত্ৰত প্ৰভাৱ বেছি হ’ব পাৰে । হোটেল, কোম্পানী আৰু ফলৰ ব্যৱসায় কৰাৰ মন থকা বিনিয়োগকাৰীৰ আত্মবিশ্বাস কমি যাব পাৰে । ইয়াৰ ফলত বছৰ বছৰ ধৰি কষ্টৰ অন্তত সুস্থিৰ হোৱা কাশ্মীৰৰ অৰ্থনৈতিক অগ্ৰগতি লক্ষ্যৰ বিচ্যুত হ’ব পাৰে । কেৱল এয়াই নহয়, কাশ্মীৰৰ জনসাধাৰণৰ আয়ৰ ওপৰতো গভীৰ প্ৰভাৱ পৰিব পাৰে ।

পৰ্যটকৰ বাবে কি পৰামৰ্শ-

কাশ্মীৰ উপত্যকা ভ্ৰমণৰ পৰিকল্পনা কৰা পৰ্যটকসকলক নতুন ভ্ৰমণ পৰামৰ্শৰ প্ৰতি গুৰুত্ব দিবলৈ আৰু সতৰ্ক হৈ থাকিবলৈ পৰামৰ্শ দিয়া হৈছে । নিৰাপত্তা বাহিনীৰ অভিযান চলি থকা অঞ্চলৰ পৰা আঁতৰি থকাৰ লগতে স্থানীয় কৰ্তৃপক্ষৰ নিৰ্দেশনা মানি চলাৰ পৰামৰ্শ দিযা হৈছে । ২২ এপ্ৰিলত হোৱা সন্ত্ৰাসবাদী আক্ৰমণত ২৫ জন ভাৰতীয় পৰ্যটক আৰু এজন নেপালৰ নাগৰিককে ধৰি কমেও ২৬ জন সাধাৰণ নাগৰিকে প্ৰাণ হেৰুৱাইছিল । এই আক্ৰমণৰ পিছত ভাৰত আৰু পাকিস্তানৰ মাজত উত্তেজনা আৰু অধিক বৃদ্ধি পোৱাৰ লগতে অঞ্চলটোত নিৰাপত্তা কটকটীয়া কৰা হৈছে ।